ព្រះសហគមន៍ភូមិភាគភ្នំពេញ ជំរុញឱ្យគ្រីស្តបរិស័ទប្រកាសដំណឹងល្អតាមរយ:ក្រុមគ្រួសារ ដោយមានផែនការទំនាក់ទំនងជាមួយក្រុមគ្រួសារផ្ទាល់ខ្លួន ជាមួយក្រុមគ្រួសារផ្សេងទៀត និងជាមួយព្រះជាម្ចាស់។
កម្មវិធីនេះប្រព្រឹត្តទៅនាថ្ងៃទី២៣ តុលា ២០២២ ដឹកនាំដោយលោកអភិបាលអូលីវីយ៉េ ជ្មីតហស្លេ នៅព្រះវិហារសន្តសិលានិងសន្តប៉ូល ភ្នំពេញថ្មី ដោយមានគ្រីស្តបរិស័ទជាក្រុមគ្រួរសារចូលរួមជាច្រើនកុះករ ជាពិសេសមានតំណាងក្រុមគ្រួសារកាតូលិកទាំង៩មណ្ឌលសកម្មភាពចូលរួមផងដែរ។
លោកអភិបាលណែនាំគ្រីស្តបរិស័ទឱ្យរីកចម្រើននៅក្នុងជីវិតជាគ្រីស្តបរិស័ទដោយ ត្រូវដាក់ខ្លួននិងទទួលស្គាល់ជាមនុស្សតូចតាច និងសូមព្រះអង្គប្រទានក្ដីស្រឡាញ់ ក្ដីសង្ឃឹម និងជំនឿយ៉ាងរឹងមាំ។ លោកបញ្ជាក់ថា ការដាក់ខ្លួនទទួលស្គាល់ពីព្រំដែននិងចំណុចខ្សោយរបស់ខ្លួន នាំឱ្យបង្កើតទំនាក់ទំនងជាមួយព្រះជាម្ចាស់ នៅក្នុងគ្រួសារនិងជាមួយមនុស្សឯទៀតៗ។
លោកអភិបាលបញ្ជាក់ថាយើងបង្កើតទំនាក់ទំនងជាមួយព្រះជាម្ចាស់បានលុះត្រាតែ យើងដាក់ខ្លួនទទួលស្គាល់ឋានៈរបស់យើងជាមនុស្សទាប និងយកគំរូគ្រួសារដ៏វិសុទ្ធមានសន្តយ៉ូសែប ព្រះនាងម៉ារី និងព្រះកុមារយេស៊ូ។
ជាមួយគ្នានេះដែរ លោកបូជាចារ្យទទួលបន្ទុកថែទាំគ្រួសារគ្រីស្តបរិស័ទភូមិភាគភ្នំពេញ អ៊ុន សុន មានប្រសាសន៍ថា ទិវាក្រុមគ្រួសារយ៉ាងឱឡារិកនៅក្នុងថ្ងៃនេះដើម្បីបង្ហាញអំពីបេសកកម្មដែលព្រះសហគមន៍ត្រូវប្រកាសដំណឹងល្អ និងឱ្យគ្រួសារទទួលស្គាល់តម្លៃជាជីវិតជាគ្រួសារគ្រីស្តបរិស័ទហើយរៀនរស់នៅតាមរបៀបជាសហគមន៍គ្រីស្តបរិស័ទ។
ក្នុងនាមជាបូជាចារ្យទទួលខុសត្រូវថែទាំក្រុមគ្រួសារគ្រីស្តបរិស័ទភូមិភាគភ្នំពេញ លោកមានគម្រោងនឹងរៀបចំផែនការយុទ្ធសាស្ត្រ ដោយមានទាំងការអប់រំមុនពេលរៀបចំអាពាហ៍ពិពាហ៍ រហូតដល់ជីវិតជាគ្រួសារ។
លោកបញ្ជាក់ថា លោកបានរៀបចំឯកសារកម្មវិធីអធិដ្ឋាននិងកម្មវិធីអប់រំមួយចំនួនសម្រាប់ឪពុកម្តាយនិងកូនៗរបស់ពួកគាត់ ព្រោះកូនៗទាំងនេះនឹងមានការត្រាស់ហៅពីព្រះជាម្ចាស់ ហើយការត្រាស់ហៅនឹងមាន លុះត្រាតែគ្រួសារនោះចេះអប់រំចេះណែនាំកូនរបស់ខ្លួន។
កន្លងមកព្រះសហគមន៍ភូមិភាគភ្នំពេញបានរិះគិតអំពីក្រុមគ្រួសារ តែក្រោយមកក៏បានផ្អាកមួយរយៈដោយសារកូវីដ-១៩ ដោយផ្តោតសំខាន់លើជីវិតគ្រួសារនៃការប្រកាសដំណឹងល្អ។
ហើយនៅក្នុងទិវានេះ លោកអភិបាលព្រះសហគមន៍កាតូលិកភូមិភាគភ្នំពេញ បានស្នើសុំឲ្យបូជាចារ្យទទួលខុសត្រូវនៅតាមមណ្ឌលសកម្មភាពទាំង៩ ប្រមូលក្រុមគ្រួសារ និងថ្វាយអភិបូជា ទទួលព្រះពរនិងរិះគិតអំពីជីវិតគ្រួសាររួមជាមួយគ្នា។
លោកអភិបាលអូលីវីយ៉េមានប្រសាសន៍ថា «គ្រួសារដែលជាមូលដ្ឋានគ្រឹះនៃសង្គមនិងជាមូលដ្ឋានគ្រឹះនៃព្រះសហគមន៍ផងដែរ។»
លោកអភិបាលបញ្ជាក់ថា «ខ្ញុំមានរបៀបសម្រាប់ក្រុមគ្រួសារដែលរៀបការហើយឲ្យរួមគ្នាធ្វើដំណើរ ជាពិសេសគ្រួសារដែលមានសមាជិកជាអន្តរសាសនានិងគ្រួសារដែលមានបញ្ហាផងដែរ ដោយទទួលបានការលើកទឹកចិត្តពីក្រុមគ្រួសារផ្សេងៗ និងពីព្រះសហគមន៍ ដើម្បីឱ្យគេមានសេចក្តីសុខ និងមានកម្លាំងថែមទៀត។»
«តាមរយៈការណែនាំរបស់លោកអភិបាល ថ្មីៗនេះខ្ញុំនឹងខិតខំរស់នៅជាគ្រួសារគំរូដល់គ្រួសារផ្សេងៗទៀត» ជាការរៀបរាប់របស់លោកអន វិចិត្រ អាយុ៣៩ឆ្នាំ ជាតំណាង គ្រួសារនៅព្រះវិហារសន្តសិលានិងសន្តប៉ូលភ្នំពេញថ្មី។
លោកវិចិត្របន្តថា «គ្រួសារខ្ញុំខ្វះភាពកក់ក្ដៅដោយមិនសូវបានមើលឃើញពីអត្ថន័យជីវិតជាគ្រួសារ ជាពិសេសការអប់រំដល់កូនចៅរបស់យើងសព្វថ្ងៃ»។
លោកបញ្ជាក់ថា ការអប់រំកូនចៅនេះគឺណែនាំឱ្យពួកគាត់យកចិត្តទុកដាក់ រស់នៅសមរម្យដោយធ្វើជាគំរូរបស់គាត់តាមរយៈពាក្យសម្ដីនិងសកម្មភាពល្អៗ ជាពិសេសនៅក្នុងជំនឿ ដូចជាចូលវិហារ អធិដ្ឋាន និងស្ដាប់ព្រះបន្ទូលជាអ្វីដែលសំខាន់សម្រាប់ផ្លូវវិញ្ញាណ និងអាចឱ្យគាត់មើលឃើញនិងចង់អនុវត្តតាម។
នៅក្នុងទិវាថ្ងៃនេះ លោកអភិបាលផ្ដល់នូវអនុសាសន៍ដល់ក្រុមគ្រួសារនៅក្នុងការប្រកាសដំណឹងល្អ ដែលរួមមាន ប្រកាសដំណឹងល្អតាមរយៈវប្បធម៌និងជីវិតរស់នៅប្រចាំថ្ងៃរបស់ខ្លួន បង្កើតទំនាក់ទំនងនៅក្នុងគ្រួសារផ្ទាល់ខ្លួននិងជាមួយគ្រួសារដទៃដោយស្ដាប់គ្នា លើកលែងទោសឱ្យគ្នា និងមិនមើលងាយគ្នា ម្យ៉ាងទៀតគឺត្រូវរៀនទំនាក់ទំនងជាមួយព្រះជាម្ចាស់ដើម្បីឱ្យគ្រួសារចាក់គ្រឹះនៃក្នុងប្រទេសកម្ពុជាតាមរយៈគ្រួសារព្រះសហគមន៍ ។
ក្នុងនោះដែរ លោកអភិបាលបានប្រាប់អំពី គម្រោងការដែលភូមិភាគភ្នំពេញនឹងត្រូវអនុវត្តសម្រាប់ក្រុមគ្រួសារនោះរួមមាន អប់រំយុវជនដែលត្រៀមខ្លួនរៀបអាពាហ៍ពិពាហ៍ រៀបចំមេរៀននិងឯកសារច្បាស់លាស់ដើម្បីអប់រំគូស្រករមុនពេលរៀបការឱ្យមានចិត្តតែមួយ មានភក្ដីភាពជានិច្ច និងអប់រំកូន រួមនិងរៀបចំពីរបៀបធ្វើអគ្គសញ្ញាអាពាហ៍ពិពាហ៍ឲ្យបានត្រឹមត្រូវ និងត្រូវគិតពីកន្លែងសំណាក់ធម៌ជាគ្រួសារ៕
ដោយដាលីស
More Photos: https://catholiccambodia.org/?p=28647
