យុវជនយុវនារីចំនួន១១រូបសុំចូលព្រះសហគមន៍
ព្រះសហគមន៍សន្តសិលា និងសន្តប៉ូល ភ្នំពេញថ្មី បានទទួលបេក្ខជនចំនួន១១រូប សុំចូលព្រះសហគមន៍ (ជំហានទី១) នៅថ្ងៃទី០៦ ខែវិច្ឆិកា ឆ្នាំ២០២២ ក្រោមអធីបតីភាព លោកបូជាចារ្យ អ៊ុន សុន។
ថ្លែងក្នុងធម្មទេសនា លោកបូជាចារ្យ យ៉ូហាន អ៊ុន សុន បានថ្លែងថាថ្ងៃនេះព្រះសហគមន៍មានអំណរសប្បាយដែលបានទទួលកូនៗ១១នាក់សុំធ្វើជំហានទី១ ក្នុងឱកាសដែលព្រះសហគមន៍គោរពសន្តបុគ្គលទាំងឡាយ។
លោកបូជាចារ្យបន្ថែមថា យើងត្រូវរៀនពីសន្តបុគ្គលទាំងឡាយ ដែលបានរស់នៅនិងដែលបានប្រព្រឹត្តកន្លងមក ឱ្យយើងទៅជាធ្លុងតែមួយ ជាគ្រួសារតែមួយ។ សេចក្ដីល្អពិតប្រាកដសម្រាប់យើង គឺជួយឱ្យយើងរួចផុតពីទុក្ខលំបាក និងនាំសេចក្ដីសុខរួមជាមួយសន្តបុគ្គលដែលនៅស្ថានបរមសុខ។
បញ្ជាក់បន្ថែមទៅកាន់បេក្ខជនទាំង១១រូប លោកសុន និយាយថា «នេះជាផ្លូវ ដើម្បីឱ្យយើងដឹងថាផ្លូវ មាគ៌ារបស់ព្រះជាម្ចាស់គឺចង់ឱ្យមនុស្សទាំងអស់ទទួលសុភមង្គលដ៏ពិតប្រាកដ។»
លោកបន្ថែមថា ការរស់នៅជាគ្រីស្តបរិស័ទគឺត្រូវយកគំរូបតាមព្រះយេស៊ូ ដោយរស់នៅខុសពីលោកីយ៍នេះ គឺចេះបន្ទាបខ្លួន ដាក់ខ្លួនជាអ្នកក្រខ្សត់ ដាក់ខ្លួនជាអ្នកស្លូតបូត ដាក់ខ្លួនជាអ្នកសុចរិត ដាក់ខ្លួនបង្ហាញធម៌មេត្តាករុណារបស់ព្រះជាម្ចាស់។
«ការស្រេកឃ្លានសេចក្តីសុចរិតជួយយើង ដើម្បីឱ្យយើងយល់ថា ទីពឹងរបស់យើងគឺមកពីព្រះគ្រីស្តផ្ទាល់។» លោកបូជាចារ្យបញ្ជាក់។
ក្នុងពិធីជំហានទី១នេះ បេក្ខជនទាំងអស់បានប្រកាសយកព្រះគ្រីស្ត ព្រះបន្ទូល និងព្រះសហគមន៍ជាទីពឹង នៅមុខគ្រីស្តបរិស័ទទាំងឡាយ។
កញ្ញា លឿង លីណា មកពីខេត្តបន្ទាយមានជ័យ ដែលកំពុងសិក្សាវិជ្ជាជីវៈនៅសាលាដុនបូស្កូទួលគោក បានថ្លែងថា ការយកព្រះគ្រីស្តជាទីពឹង មានន័យថានាងនឹងដើរតាមមាគ៌ារបស់ព្រះយេស៊ូគ្រីស្ត ដោយចេះស្រឡាញ់អ្នកដទៃ ជួយគេ និងធ្វើជាមនុស្សល្អ។ ការយកព្រះបន្ទូលជាទីពឹង គឺត្រូវអនុវត្តតាមព្រះបន្ទូលរបស់ព្រះជាម្ចាស់នៅក្នុងការរស់នៅប្រចាំថ្ងៃរបស់គាត់។ ការយកព្រះសហគមន៍ជាទីពឹង គឺព្រះសហគមន៍អាចជួយនាងមានជំនឿកាន់តែរឹងមាំ និងមានសេចក្តីក្លាហានកាន់តែខ្លាំង។
លីណាបានសិក្សាក្នុងថ្នាក់អប់រំជំនឿ៣ឆ្នាំមកហើយ ហើយនាងជឿថា រូបនាងផ្ទាល់អាចដើរតាមព្រះយេស៊ូបាន និងធ្វើជាគ្រីស្តបរិស័ទដ៏ល្អសម្រាប់ព្រះសហគមន៍។
យុវជន សុង គឹមហុង បានថ្លែងថា គាត់បានទទួលការអប់រំជំនឿនៅព្រះសហគមន៍សន្តសិលា និងសន្តប៉ូល ភ្នំពេញថ្មីរយៈពេល៥ឆ្នាំមកហើយ មុនទទួលជំហានទី១ថ្ងៃនេះ។ លោកបន្ថែមថា «មូលហេតុដែលខ្ញុំសម្រេចចិត្តសុំចូលព្រះសហគមន៍ ដោយសារតែព្រះសហគមន៍បានផ្តល់ឱ្យខ្ញុំដូចជា ទំនាក់ទំនងល្អ សេចក្តីស្រឡាញ់ ការចេះចែករំលែក ការយកចិត្តទុកដាក់។»
បន្ទាប់ពីមើលឃើញរបៀបទំនាក់ទំនងនេះ គឹមហុងបានចូលរួមសកម្មភាពព្រះសហគមន៍ដូចជា អ្នកបម្រើអាសនៈ ក្រុមពិធីបុណ្យ ក្រុមយុវជន ជំទង កាយរិទ្ធិ បានជំរុញឲ្យលោកមានជំនឿនិងមានសេចក្តីស្រឡាញ់ទៅលើព្រះជាម្ចាស់កាន់តែខ្លាំងឡើងៗ។
គឹមហុងបន្ថែមថា «ខ្ញុំក៏សូមលើកទឹកចិត្តដល់យុវជនយុវនារី ដែលកំពុងទទួលការអប់រំជំនឿពីព្រះសហគមន៍ សូមស្វែងរកព្រះជាម្ចាស់ដោយខ្លួនឯង និងចំណាយពេលវេលាផ្ទាល់ខ្លួនឱ្យបានច្រើនសម្រាប់ចូលរួមជាមួយព្រះសហគមន៍ និងធ្វើជាយុវជនគំរូសម្រាប់សង្គមជាតិ៕»
ដោយង៉ែត សុធីរិទ្ធ
