«បងប្អូនជាជនដ៏វិសុទ្ធ ហើយភាពដ៏វិសុទ្ធរបស់យើងមកពីជំនឿរបស់យើង មកពីព្រះអំណោយទានរបស់ព្រះជាម្ចាស់ ដែលបានប្រទានឲ្យយើង។ យើងទទួលបានភាពដ៏វិសុទ្ធនោះ ដោយគ្មានការចំណាយ ទទួលបាននៅពេលយើងទទួលអគ្គសញ្ញាជ្រមុជទឹក។» នេះជាប្រសាសន៍របស់លោកបូជាចារ្យ ប៉ូល រឿង ឆ័ត្រសិរី បូជាចារ្យទទួលខុសត្រូវមណ្ឌលសកម្មភាពភ្នំពេញខាងជើង បានណែនាំគ្រីស្តបរិស័ទឲ្យយកចិត្តទុកដាក់នឹងការរស់នៅរបស់ខ្លួន ដោយយកគំរូតាមសន្តបុគ្គលដែលពួកគាត់ទទួលបានក្នុងពេលទទួលអគ្គសញ្ញានានា។
លោកបូជាចារ្យមានប្រសាសន៍នេះ ក្នុងឱកាសបុណ្យព្រះសហគមន៍គោរពសន្តបុគ្គល នៅព្រះសហគមន៍សន្តយ៉ូសែប ផ្សារតូច កាលពីថ្ងៃទី៦ ខែវិចិ្ឆកា ឆ្នាំ២០២២ ដោយមានគ្រីស្តបរិស័ទចូលរួមយ៉ាងកុះករ។
លោកបូជាចារ្យបានបន្ថែមទៀតថា ថា ការគោរពសន្តសន្តីបុគ្គល គឺមិនមែនជាការគោរពព្រះទេ តែជាការគោរពមនុស្សដែលមានគុណធម៌ខ្ពស់ ដែលជួយយើង ដែលតែងតែអធិដ្ឋានសម្រាប់យើង និងជាអ្នកនាំផ្លូវយើង។
តាមការលើកឡើងរបស់យុវជន រ៉ាវី សុភារ៉ុង ជាយុវជននៅព្រះសហគមន៍កាតូលិកសន្តយ៉ូសែប ផ្សារតូច បានបញ្ជាក់ថា ការរស់នៅតាមគំរូរបស់សន្តបុគ្គល គឺជាការល្អប្រសើរបំផុត។ ដោយសារ គ្រីស្តបរិស័ទត្រូវតែមានបុគ្គលនៃជំនឿម្នាក់ដែលជាគំរូឲ្យយើងដើរតាម។
សុភារ៉ុង មានសន្តប៉ូលជាគំរូនៃជំនឿរបស់លោក ក្នុងការប្រកាសដំណឹងល្អរបស់ព្រះជាម្ចាស់។ គាត់បានឲ្យដឹងថា ការរស់នៅជាគ្រីស្តបរិស័ទ មិនមែនរស់នៅតែក្នុងព្រះសហគមន៍តែប៉ុណ្ណោះទេ គឺយើងត្រូវតែចេញទៅខាងក្រៅ ដើម្បីប្រកាសដំណឹងល្អ ដោយមិនមានការស្ទាក់ស្ទើរ។
ទោះបីជាមិនសូវមានទ្រព្យសម្បត្តិច្រើនដើម្បីចែករំលែកក៏ដោយ យុវតី លឹម ស្រ៊ាវយ៉ា ដែលជាគ្រីស្តបរិស័ទនៃព្រះសហគមន៍សន្តយ៉ូសែប ផ្សារតូច បានប្រាប់ថា នាងរស់នៅតាមរបៀបរបស់សន្តី អាកាតា ជាមនុស្សស្រីម្នាក់ដែលមិនចាញ់ការល្បួង និងជាកូនអ្នកមាន ដែលតែងតែលះបង់ទ្រព្យសម្បត្តិទាំងអស់ដែលគាត់មាន ដើម្បីដើរតាមព្រះយេស៊ូ។
ស្រ៊ាវយ៉ា បន្តថាដោយសារគំរូរបស់សន្តីអាកាតា នាំឲ្យនាងចេះចែកនូវសេចក្ដីស្រឡាញ់ ជួយអ្នកក្រីក្រ និងលើកទឹកចិត្តមិត្តភក្ភិរបស់នាងគ្រប់ពេល ហើយនាងក៏មិនដែលភ្លេចយកពេលវេលាផ្ទាល់ខ្លួនជួបជាមួយព្រះជាម្ចាស់ដោយការអធិដ្ឋានផងដែរ។
ព្រះសហគមន៍កាតូលិកបានប្រារព្ធបុណ្យគោរពសន្តបុគ្គលទាំងឡាយនៅដើមខែវិច្ឆិកាជារៀងរាល់ឆ្នាំ។
សន្តបុគ្គលជាគ្រីស្តបរិស័ទដែលបានរស់លើផែនដីនេះ ហើយបានផ្ញើជីវិតទាំងស្រុងលើព្រះជាម្ចាស់ ដោយប្រព្រឹត្តកិច្ចការនានាដើម្បីប្រកាសដំណឹងល្អរបស់ព្រះអង្គ។ ក្នុងចំណោមសន្តបុគ្គលដែលព្រះសហគមន៍ទទួលស្គាល់ មានចាស់ មានក្មេង មានបុរស មានស្ដ្រី មានអ្នកមាន មានអ្នកក្រ មានគ្រីស្ដបរិស័ទធម្មតា មានគ្រីស្តបរិស័ទដែលបំពេញមុខងារនៅក្នុងព្រះសហគមន៍ ជាគ្រហស្តនិងអ្នកបួស មានព្រះមហាក្សត្រ មានរាស្ត្រសាមញ្ញ មានអ្នកមានគ្រួសារ និងមានបុព្វជិតជាដើម តែសន្តបុគ្គលទាំងនោះបានរួមរស់ជាមួយព្រះគ្រីស្ត៕
ដោយ សុង គឹមហេង
