ក្នុងពិធីបុណ្យគោរពវិញ្ញាណក្ខន្ធសម្តេចប៉ាបបេណេឌិកទី១៦ និងបុណ្យគោរពព្រះនាងម៉ារីជាមាតានៃព្រះសហគមន៍កាលពីថ្ងៃទី២ ខែធ្នូកន្លងទៅ លោកអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញមានប្រសាសន៍ថា យប់នេះឱ្យយើងស្តាប់ម្តងទៀតអំពីការអប់រំរបស់សម្តេចប៉ាប បេណេឌិកតូ ទី១៦ ដែលបានជម្រុញយើង ដើម្បីឱ្យយើងបន្តបេសកកម្មរបស់ព្រះជាម្ចាស់។
ថ្លែងក្នុងធម្មទេសនា នៅព្រះវិហារក្សត្រីនៃសន្តិភាពអរិយក្សត្រ ក្នុងស្រុកល្វាឯម ខេត្តកណ្តាល ដែលមានអង្គទូតពីប្រទេសអាល្លឺម៉ង់និងបារាំង រដ្ឋលេខាធិការនៃក្រសួងធម្មការនិងសាសនាចូលរួម និងគ្រីស្តបរិស័ទចាស់ក្មេងយ៉ាងច្រើនកុះករផង លោកអភិបាលបានលើកឡើងថា ក្នុងកិច្ចជំរុញនោះ មាន៥ចំណុចសំខាន់ៗ ដែលអតីតសម្តេចប៉ាបបានផ្តល់ជាទិសដៅសម្រាប់គ្រីស្តបរិស័ទរស់នៅក្នុងសង្គមនិងមានជំនឿរឹងមាំ។
«ទី១ ព្រះជាម្ចាស់ជាសេចក្តីស្រឡាញ់ ទី២ជំនឿបំភ្លឺជីវិតរបស់យើង ទី៣សេចក្តីពិតជាផ្លូវនៃជីវិតរបស់យើង ទី៤ មានតែព្រះយេស៊ូគ្រីស្តដែលអាចសង្រ្គោះយើង និងទី៥ អំណាចនៃសេចក្តីស្រឡាញ់អាចឈ្នះអំពើអាក្រក់និងអំពើឃោរឃៅនៅក្នុងពិភពលោក»។
លោកអភិបាលអូលីវីយ៉េសង្កត់ធ្ងន់ថា «ពិតមែន យើងមិនអាចសង្ខេបទាំងគំនិត ទាំងជីវិត ទាំងស្នាដៃរបស់សម្តេចប៉ាប បេណេឌិកតូទី១៦ ដោយពាក្យខ្លីៗបានទេ។ ប៉ុន្តែ ខ្ញុំគិតថាយប់នេះ ឱ្យយើងស្តាប់អត្ថន័យនៃជីវិតរបស់សម្តេចប៉ាបគឺ “ប្រសិនបើយើងចង់ឱ្យពិភពលោករបស់យើងមានជីវិតសាជាថ្មី ប្រសិនបើយើងចង់ឱ្យពិភពលោករបស់យើងទទួលការសង្រ្គោះដ៏ពិតប្រាកដ មានផ្លូវតែមួយ គឺឱ្យយើងរកឃើញព្រះជាម្ចាស់សាជាថ្មី”។»
ប្រសិនបើ យើងចេះទទួលស្វាគមន៍វត្តមានរបស់ព្រះជាម្ចាស់នៅក្នុងដួងចិត្តយើង ប្រសិនបើយើងចេះចែករំលែកសេចក្តីស្រឡាញ់របស់ព្រះអង្គដល់បងប្អូនឯទៀតៗ នោះយើងអាចដើរតាមផ្លូវនៃសុភមង្គលដ៏ពិតប្រាកដបាន។ លោកអភិបាលបញ្ជាក់។
អតីតសម្តេចប៉ាបបេណេឌិកទី១៦ បានសុគតកាលពីថ្ងៃទី៣១ ខែធ្នូថ្មីៗនេះ នៅនិវេសនដ្ឋានរបស់ទ្រង់នាបុរីវ៉ាទីកង់។ លោកអភិបាលបន្ថែមថា រូបលោកផ្ទាល់បានទទួលអំណោយមួយយ៉ាងពិសេសពីសម្តេចប៉ាបអង្គនេះ ដោយទ្រង់ផ្ទាល់បានជ្រើសតាំងលោកជាអភិបាលឧបត្ថម្ភកសម្រាប់ព្រះសហគមន៍កាតូលិកភូមិភាគភ្នំពេញក្នុងឆ្នាំ២០០៩ និងជាអភិបាលពេញសិទ្ធិក្នុងឆ្នាំ២០១០។
ព្រះសហគមន៍កាតូលិកនៅកម្ពុជា មានអំណរសប្បាយ ដែលបានទទួលសារវីដេអូពីអតីតសម្តេចប៉ាបបេណេឌិកទី១៦ មុនពេលទ្រង់លាលែងពីតំណែងក្នុងខែមករា ឆ្នាំ២០១៣ សម្រាប់ចូលរួមពិធីខួប៥០ឆ្នាំនៃមហាសន្និបាតបុរីវ៉ាទីកង់ទី២ និងខួប២០ឆ្នាំនៃសៀវភៅសង្ខេបគោលលទ្ធិព្រះសហគមន៍កាតូលិក។
«ព្រះអង្គបានផ្ញើសារវីដេអូតិចបំផុត នៅក្នុងអំឡុងពេលព្រះអង្គកាន់តួនាទីជាសម្តេចប៉ាប។ ប៉ុន្តែ សារវីដេអូចុងក្រោយរបស់ព្រះអង្គ គឺសម្រាប់ព្រះសហគមន៍កាតូលិកកម្ពុជាយើង ព្រះអង្គបានទូលអង្វរព្រះនាងម៉ារីនៃទន្លេមេគង្គ ឱ្យការពារថែរក្សាព្រះសហគមន៍របស់យើង និងការពារថែរក្សាជំនឿរបស់យើង។» លោកអភិបាលអូលីវីយ៉េបញ្ជាក់។
នៅចុងបញ្ចប់នៃធម្មទេសនា លោកគង្វាលព្រះសហគមន៍បានជំរុញឲ្យគ្រីស្តបរិស័ទយកចិត្តទុកដាក់យកគំរូតាមអតីតសម្តេចប៉ាបអង្គនេះ ដោយពោលថា សម្តេចប៉ាបអញ្ជើញយើងឱ្យយើងដើរតាមគំរូរបស់ព្រះអង្គ«ឱ្យយើងដើរតាមផ្លូវនៃសេចក្តីស្រឡាញ់ដោយសុខចិត្តលះបង់ចោលជីវិតរបស់យើង ដើម្បីផលប្រយោជន៍សម្រាប់បងប្អូនឯទៀតៗ នៅក្នុងការដាក់ចិត្តគំនិតយ៉ាងទាបបំផុត។ ពិតមែន ដើរឆ្ពោះទៅរកព្រះជាម្ចាស់បន្តិចម្តងៗ គឺជាសុភមង្គលដ៏ពេញលក្ខណៈ។»
ដូនជី អានលូស៊ី ង្វៀង គីមង៉ា ជាប្រធានក្រុមគ្រួសារបងស្រីឧបការគុណ មានប្រសាសន៍ថា ជីវិតរបស់សម្តេចប៉ាបបេណេឌិកទី១៦ គឺរស់នៅស្ងៀមស្ងាត់ ហើយពេលសុគតក៏ស្ងប់ស្ងាត់ «ខ្ញុំគិតថាយើងជាគ្រីស្តបរិស័ទ មិនមែនបង្ហាញតែអ្វីដែលនៅខាងក្រៅ ប៉ុន្តែជីវិតនៅខាងក្នុង ជីវិតខាងវិញ្ញាណគឺមានតម្លៃខ្លាំងជាង និងអំពីរបៀបរបស់យើងដែលទាក់ទងជាមួយព្រះជាម្ចាស់និងការរស់នៅរបស់យើងជាមួយព្រះជាម្ចាស់អស់មួយជីវិត»។
ដូនជីប្រធានរូបនេះ បានបន្ថែមទៀតថា ចំពោះការសោយទិវង្គតរបស់អតីតសម្តេចប៉ាប «ខ្ញុំគិតថា ព្រះអង្គនឹងជួបមនុស្សជាច្រើននាក់នៅស្ថានបរមសុខ ហើយគាត់និងអធិដ្ឋានមកឲ្យយើងវិញ។
«ការសោយទិវង្គតរបស់លោក សម្រាប់ខ្ញុំមានលក្ខណៈស្ងៀមស្ងាត់ ជាការមួយបង្ហាញអំពីការបន្ទាបខ្លួនរបស់លោកនៅចំពោះមុខព្រះជាម្ចាស់។ ដូច្នេះសម្ដេចប៉ាបជាគំរូមួយសម្រាប់យើង(ឧបដ្ឋាក) និងគ្រីស្តបរិស័ទនៅក្នុងការបន្ទាបខ្លួន ក្នុងការចែករំលែកសេចក្ដីស្រឡាញ់ចំពោះបងប្អូនទៅវិញទៅមក» នេះជាការលើកឡើងរបស់លោកឧបដ្ឋាក វី សំណាង ក្នុងពិធីគោរពវិញ្ញាណក្ខន្ធអតីតសម្តេចប៉ាបកាលពីពេលថ្មីៗនេះ។
លោកឧបដ្ឋាកបន្ថែមថា ទោះបីជាយ៉ាងណា យើងសូមអរគុណព្រះជាម្ចាស់ ចំពោះវត្តមានរបស់សម្តេចប៉ាបបេណេឌិកទី១៦ ដែលលោកបានខិតខំជួយឲ្យព្រះសហគមន៍ ដើរលើមាគ៌ារបស់ព្រះជាម្ចាស់ជួយដល់គ្រីស្ដបរិស័ទស្គាល់ព្រះជាម្ចាស់កាន់តែច្រើនឡើងៗ តាមរយៈការបកស្រាយទេវវិទ្យាដែលណែនាំឲ្យគ្រីស្តបរិស័ទយល់អំពីព្រះជាម្ចាស់កាន់តែខ្លាំងឡើងៗ។
អតីតសម្តេចប៉ាបបេណេឌិកទី១៦(Pope Emeritus Benedict XVI) មានព្រះនាមដើមថា យ៉ូសែប អាឡូស៊ីយូស រ៉ាតស៊ីងហ្គឺ ប្រសូតនៅថ្ងៃទី១៦ ខែមេសា ឆ្នាំ១៩២៧ នៅប្រទេសអាឡឺម៉ង់។ លោកមានបងប្អូនចំនួន៣នាក់។ លោកជាសម្ដេចប៉ាបទី២៦៥បន្តមុខងារពីសន្តសិលា កាលពីថ្ងៃទី១៩ ខែមេសា ឆ្នាំ២០០៥ ហើយព្រះអង្គបានលាលែងពីតំណែងនាថ្ងៃទី២៨ ខែកុម្ភៈ ឆ្នាំ២០១៣ដោយកត្តាសុខភាព។
អតីតសម្តេចប៉ាប បេណេឌីកទី១៦ បានសុគតក្នុងព្រះជន្មាយុ ៩៥ឆ្នាំ នៅថ្ងៃសៅរ៍វេលាម៉ោង៩៖៣៤នាទីព្រឹក (ម៉ោង៣៖៣៤នាទីរសៀលនៅកម្ពុជា)នៅក្នុងនិវេសនដ្ឋានរបស់ព្រះអង្គ (Mater Ecclesiae) ក្នុងបុរីវ៉ាទីកង់។
ក្នុងរយៈពេលទទួលមុខងារជាសម្តេចប៉ាប ចាប់ពីឆ្នាំ២០០៥ដល់ឆ្នាំ២០១២ អតីតសម្តេចប៉ាបបេណេឌិកទី១៦ បានធ្វើដំណើរទស្សនកិច្ចជាផ្លូវរដ្ឋ ចំនួន២៧ដង ដោយទៅកាន់ប្រទេសក្នុងទ្វីបអឺរ៉ុប អាមេរិក អាមេរិកឡាទីន អាហ្វ្រិក និងអាស៊ីបូព៌ា ដើម្បីរឹតចំណងការទូត សួរសុខទុក្ខគ្រីស្តបរិស័ទ និងទំនាក់ទំនងអន្តរសាសនា។
ក្នុងមួយជីវិតរបស់អតីតសម្តេចប៉ាប ចាប់តាំងពីទ្រង់បានសិក្សាអំពីទេវវិទ្យា និងបានក្លាយជាសាស្ត្រាបង្រៀន ព្រះអង្គបានសរសេរសៀវភៅទេវវិទ្យា អប់រំជីវិតផ្លូវវិញ្ញាណ និងអប់រំគ្រីស្តបរិស័ទចំនួន៦៦ក្បាល៕
