ក្នុងអំឡុងពេលរដូវបុណ្យព្រះយេស៊ូប្រសូត្រ ព្រះវិហារសន្តយ៉ូសែបផ្សារតូចបានចែករំលែកអំណរសប្បាយជូន ជនមានពិការភាពប្រមាណជា៨០នាក់ មកទទួលទានអាហាររួមគ្នា ទទួលគ្រឿងឧបភោគមួយចំនួន ឈ្វេងយល់អំពីអត្ថន័យនៃបុណ្យព្រះយេស៊ូប្រសូត និងចូលរួមប្រឡងទស្សទាយបទចម្រៀងយករង្វាន់អនុស្សាវរីយ៍ជាដើម។
កម្មវិធីនេះអញ្ជើញចូលរួមជាអធិបតីភាពដោយ លោកបូជាចារ្យ រឿង ឆ័ត្រសិរី ប្រធានមណ្ឌលសកម្មភាពព្រះសហគមន៍កាតូលិកភូមិភាគខាងជើង លោកឧបដ្ឋាកប៊ុនលី និងគណៈកម្មការក្នុងព្រះសហគមន៍ព្រះវិហារសន្តយ៉ូសែបផ្សារតូច ជាតំបន់ភាគខាងជើងនៃរាជធានីភ្នំពេញ នៅព្រឹកថ្ងៃទី០៤ ខែមករា។
មានមតិសំណេះសំណាលជាមួយជនមានពិការភាព លោកបូជាចារ្យ រឿង ឆ័ត្រសិរី មានប្រសាសន៍ថាដើម្បីអបអរសាទរបុណ្យព្រះយេស៊ូប្រសូត្រ ព្រះសហគមន៍តែងតែនឹកឃើញដល់បងប្អូនដែលជួបការលំបាក មានការខ្វះខាត និងជាពិសេសនៅថ្ងៃនេះ ព្រះសហគមន៍បានអញ្ជើញបងប្អូនជនពិការមកទទួលសេចក្ដីសុខសាន្តជាមួយគ្នាដើម្បីឱ្យបងប្អូនមានអំណរសប្បាយ មានចិត្តសង្ឃឹមនៅក្នុងជីវិត ហើយត្រូវតែតស៊ូជំនះរាល់ឧបសគ្គដោយមានចិត្តអត់ធ្មត់បំផុត។
ក្នុងឱកាសនេះដែរលោកបូជាចារ្យបានជំរុញលើកទឹកចិត្តបងប្អូនជនពិការអោយរស់នៅពោរពេញដោយសេចក្ដីស្រលាញ់ ត្រូវមានចិត្តសង្ឃឹមជានិច្ច នឹងជាពិសេសកុំបាក់ទឹកចិត្ត ដែលធ្វើឲ្យជីវិតកាន់តែជួបបញ្ហាច្រើនឡើង។ លោកបានលើកទឹកចិត្តដល់បងប្អូនទាំងនោះ ឲ្យនឹកដល់ព្រះយេស៊ូគ្រីស្តនៅពេលជួបលំបាកផ្សេងៗ ព្រោះទ្រង់តែងតែតាមថែរក្សាការពារយើងទាំងអស់គ្នា ហើយទ្រង់ជាពន្លឺសម្រាប់បំភ្លឺនឹងណែនាំអោយជីវិតយើងមានសេចក្ដីសុខសាន្ត។
ជាមួយគ្នាដែរ លោក ស៊ុយ ប៊ុនថង អាយុ៧៧ឆ្នាំ ជាប្រធានក្រុមប្រឹក្សាព្រះសហគមន៍បានឱ្យដឹងថា បងប្អូនជនពិការដែលយើងអញ្ជើញមកចូលរួមភាគច្រើនជាអ្នកច្រៀងតាមស្តុបនានាក្នុងរាជធានីភ្នំពេញ ហើយជាជនពិការដៃជើងពីកំណើត ពិការភ្នែក នឹងខ្លះទៀតពិការដោយសារជួបឧបទ្ទេវហេតុកាលពីសង្គ្រាមផងដែរ។
លោកប្រធានក្រុមប្រឹក្សាបានបន្តថា សម្រាប់អំណោយដែលព្រះសហគមន៍បានរៀបចំគឺជាថវិកាផ្ទាល់ខ្លួនរបស់បងប្អូនគ្រីស្តបរិស័ទដែលមកចូលរួមបុណ្យអភិបូជារៀងរាល់សប្ដាហ៍ ដោយខ្លះបានជួយជាគ្រឿងបរិភោគ ខ្លះជួយជាថវិកា ខ្លះទៀតបានចំណាយទាំងកម្លាំងកាយចិត្តនិងយានជំនិះផ្ទាល់ខ្លួនទៅដឹកបងប្អូនជនពិការមកចូលរួមជាមួយកម្មវិធីក្នុងព្រះសហគមន៍។
ការសាមគ្គីរវាងគ្រីស្តបរិស័ទបែបនេះ បានធ្វើឲ្យលោកប៊ុនថងយល់ថា ព្រះសហគមន៍មានជីវិតពោរពេញដោយសេចក្ដីស្រលាញ់ពីព្រះជាម្ចាស់។ ហើយការចូលរួមរបស់បងប្អូនជនមានពិការភាពដោយស្នាមញញឹម និងសំឡេងអបអរទ្រហឹងអឺងកងនេះ គឺជាផលផ្លែមួយដែលហៅថាផលផ្លែនៃសេចក្ដីស្រលាញ់ចេញពីឫសគល់របស់ព្រះជាម្ចាស់។
អ្នកស្រី ដារីយ៉ា មានអាយុ២៦ឆ្នាំ សព្វថ្ងៃរស់នៅភូមិទ្រា២ សង្កាត់ស្ទឹងមានជ័យ ខណ្ឌមានជ័យ បានរៀបរាប់ថា«ថ្ងៃនេះខ្ញុំមានអារម្មណ៍សប្បាយចិត្តជាខ្លាំងដែលបានចូលរួមក្នុងកម្មវិធី។ ហើយជារៀងរាល់ឆ្នាំខ្ញុំតែងតែមកចូលរួម ហើយបានលេងហ្គេមសប្បាយៗជាច្រើន ហើយបើទោះជាខ្ញុំរវល់ប៉ុណ្ណាក៏ខ្ញុំឈ្លៀតពេលមកចូលរួមដែរ ពីព្រោះកម្មវិធីនេះចែករំលែកសេចក្ដីស្រលាញ់ដល់បងប្អូនពិការភាព និងបងប្អូនដែលមានជីវភាពទីទ័លក្រជាដើម»។
អ្នកស្រីបន្តថា សព្វថ្ងៃរូបគាត់និងស្វាមីដែលពិការដៃមានអាយុ២៩ឆ្នាំ ដើរច្រៀងនៅតាមភ្លើងបញ្ជាចរាចរណ៍ក្នុងរាជធានីភ្នំពេញ ដើម្បីបានថវិកាផ្គត់ផ្គង់កូនស្រីមានអាយុ៣ឆ្នាំដែលកំពុងសិក្សានៅសាលាមត្តេយ្យ និងបង់ថ្លៃផ្ទះជួល។
អ្នកស្រីបន្ថែមថា គាត់បានចូលរួមកម្មវិធីចំនួន៣ដង ហើយទង្វើរបស់ព្រះសហគមន៍ជាទង្វើមួយធ្វើឱ្យចងចាំមិនភ្លេចពីព្រោះព្រះសហគមន៍បានចែករំលែកសេចក្ដីស្រលាញ់ និងផ្ដល់ឱកាសឱ្យបងប្អូនជនពិការបានមកជួបជុំគ្នា បានស្គាល់គ្នានិងលើកទឹកចិត្តគ្នាទៅវិញទៅមក ជាពិសេសសម្រាប់អាហារនៅថ្ងៃនេះគឺឆ្ងាញ់ណាស់ហើយមានម្ហូបច្រើនមុខនឹងសម្រាប់អំណោយវិញទោះជាមិនច្រើនប៉ុន្តែអាចដោះស្រាយបានមួយគ្រា។
«ជីវិតជាជនពិការពិតជាពិបាកណាស់ពីព្រោះមានភ្នែកខ្វាក់មើលមិនឃើញ មិនដឹងថាពិភពលោកស្រស់ស្អាតយ៉ាងណានោះទេ ប៉ុន្តែព្រះសហគមន៍បានធ្វើឱ្យជីវិតរបស់ជនពិការពោរពេញដោយស្នាមញញឹម»នេះជាសម្ដីរបស់លោក អ៊ុក សូឡាវី មានអាយុ៥២ឆ្នាំជាជនពិការភ្នែករស់នៅខណ្ឌពោធិ៍សែនជ័យ។
លោកបានបន្តថា សព្វថ្ងៃនេះលោកមានភរិយាពិការភ្នែកដូចគ្នាច្រៀងនៅតាមស្តុប នៅតាមរោងបុណ្យ រោងការជាដើមដើម្បីបានថវិកាចិញ្ចឹមជីវិតហើយនៅថ្ងៃនេះព្រះសហគមន៍បានអញ្ជើញលោករួមទាំងភរិយាមកចូលរួមកម្មវិធីថ្ងៃនេះ។
លោកបន្ថែមថា បើនិយាយពីអារម្មណ៍សប្បាយវិញរកអ្វីមកគណនាមិនបានទេហើយការពិសារអាហារថ្ងៃនេះវិញគឺប្រៀបដូចជា បានចូលព្រះដំណាក់ព្រះជាម្ចាស់ពេញមួយឆ្នាំ។
ព្រះវិហារសន្តយ៉ូសែបផ្សារតូចតែងរៀបចំកម្មវិធីផ្តល់អាហារនិងគ្រឿងឧបភោគបរិភោគនេះ ដល់គ្រួសារក្រីក្រយ៉ាងតិចណាស់២ដងក្នុង១ឆ្នាំ តាមរយៈការរៃអង្គាសថវិកាពីគ្រីស្តបរិស័ទក្នុងវិហារនិងសប្បុរជននានា៕
ដោយ ចាន់ ម៉ានុត
