បេក្ខជន ២៤ នាក់នៃព្រះសហគមន៍អរិយក្សត្រ ទទួលអគ្គសញ្ញាលាបថ្ងាស ដែលជាការទទួលព្រះអំណោយទានរបស់ព្រះជាម្ចាស់ ដើម្បីធ្វើជាគ្រីស្តបរិស័ទដ៏ពេញលក្ខណៈ នៅព្រះវិហារក្សត្រីនៃសន្តិភាព ក្រោមអធិបតីភាពលោកអភិបាលព្រះសហគមកាតូលិកភូមិភាគភ្នំពេញអូលីវីយ៉េ ជ្មីតអ៊ីស្លេរ ក្នុងភូមិអារីយក្សត្រ នេះព្រឹកថ្ងៃទី ៥ កុម្ភៈ ២០២៣ ដោយមានគ្រីស្តបរិស័ទចូលរួមជាច្រើនកុះករផងដែរ។
ក្នុងធម្មទេសនានៃអគ្គសញ្ញាលាបថ្ងាស២៤នាក់នេះផងដែរលោកអភិបាលបានមានប្រសាសន៍ថា ខ្ញុំដៅអគ្គសញ្ញាលាបថ្ងាសដោយព្រះវិញ្ញាណដ៏វិសុទ្ធ ដែលជាព្រះអំណោយទានរបស់ព្រះជាម្ចាស់ គឺចូលទៅក្នុងអត្តសញ្ញាណថ្មីរបស់យើង ដែលមិនមែនត្រឹមតែជាប្រជាជនដែលរស់នៅប្រទេសកម្ពុជា ប៉ុន្តែយើងគឺជាប្រជាជនរបស់ព្រះជាម្ចាស់ផ្ទាល់ ដោយមានព្រះយេស៊ូជាសិរិសាដែលណែនាំឱ្យរស់នៅជាគ្រីស្តបរិស័ទនៅក្នុងព្រះសហគមន៍ និងជាគ្រីស្តស័ទនៅក្នុងសង្គម។
លោកអភិបាលមានប្រសាសន៍ទៀតថា «ខ្ញុំដៅព្រះវិញ្ញាណដ៏វិសុទ្ធដល់បងប្អូន ដើម្បីធ្វើជាពន្លឺ និងជាអំបិលសម្រាប់ពិភពលោក តាមរយ:ការដាក់ខ្លួននិងព្រះវិញ្ញាណដ៏វិសុទ្ធផ្ទាល់ដែលណែនាំឱ្យយើងទៅជាពន្លឺ»។ ប៉ុន្តែជាពន្លឺនៅក្នុងរបៀបជាអ្នកបម្រើ ជាពន្លឺ ដោយមានព្រះវិញ្ញាណដ៏វិសុទ្ធណែនាំោឱ្យទៅជាអ្នកបម្រើដ៏សាមញ្ញបំផុត តាមរយៈការផ្ដល់អាហារ សួរសុខទុក្ខអ្នកជំងឺ និងផ្ដល់កន្លែងស្នាក់នៅដល់អ្នកដែលគ្មាន លើកទឹកចិត្ត ចាប់អារម្មណ៍ និងយកចិត្តគេដ៏ពិតប្រាកដ។ ដោយសារយើងជាប្រជាជនរបស់ព្រះជាម្ចាស់ដែល មានបេសកកម្មទៅជាពន្លឺនៅក្នុងការបម្រើបងប្អូនឯទៀតៗ។ សូមឱ្យយើងរស់នៅក្នុងសង្គមជាប្រចាំដោយអនុវត្តវិន័យរបស់ព្រះយេស៊ូ។ លោកអភិបាលបញ្ជាក់បន្ថែម។
ទាក់ទងទៅនឹងបេសកកម្មជាគ្រីស្តបរិស័ទធ្វើជាអំបិលនិងពន្លឺនេះ លោកឧបដ្ឋាក អ៊ុក ប៊ុនលី មានប្រសាសន៍ថា បច្ចុប្បន្នពិភពលោករបស់យើងបាត់ជាតិប្រៃនិងខ្វះពន្លឺដែរ ដូច្នេះក្នុងនាមជាឧបដ្ឋាក តាមរយៈការរស់នៅធ្វើជាអំបិលនិងពន្លឺនេះមិនសូវស្រួសលទេ ដោយសារមនុស្សជាច្រើនយកចិត្តទុកដាក់លើរឿងលោកីយច្រើន តែយើងជាគ្រីស្តបរិស័ទត្រូវព្យាយាមរស់នៅតាមព្រះបន្ទូលឱ្យបានត្រឹមត្រូវជារៀងរាល់ថ្ងៃ យកចិត្តទុកដាក់អធិដ្ឋាន ដើម្បីឈ្វេងយល់អំបីរបៀបធ្វើជាពន្លឺសម្រាប់ពិភពលោក។ តាមរយៈការណែនាំរបស់លោកអភិបាលឱ្យធ្វើជាពន្លឺសម្រាប់បងប្អូនឯទៀតតាមរបៀបមេត្តាករុណា ជានិមិត្តរូបនៃអំបិលដោយចែករំលែកនូវអ្វីដែលយើងមានតាមសមត្ថភាព។
ក្នុងវ័យ១៧ឆ្នាំ សុខ ចាន់វី ជាបេក្ខនារីទទួលអគ្គសញ្ញាលាបថ្ងាសនៅថ្ងៃនេះនិយាយថា ខ្ញុំមានអំណរសប្បាយដោយបានទទួលអគ្គសញ្ញាលាបថ្ងាសថ្ងៃនេះ គឺមានសារៈសំខាន់ដោយបានទទួលព្រះអំណោយទានរបស់ព្រះវិញ្ញាណដ៏វិសុទ្ធ ដែលជាពន្លឺរបស់ព្រះគ្រីស្តដែលធ្វើឱ្យខ្ញុំមានជំនឿមុតមាំអាចទៅបង្រៀនអប់រំជំនឿបានផងដែរ។ ព្រះវិញ្ញាណដ៏វិសុទ្ធជាពន្លឺ ដែលនាំខ្ញុំឱ្យទៅប្រកាសដំណឹងល្អដល់បងប្អូនឯទៀតៗឱ្យបានស្គាល់ព្រះជាម្ចាស់ តាមរយៈអប់រំជំនឿនិងការរស់នៅប្រចាំថ្ងៃដោយជួយអ្នកក្រីក្រផងដែរ។
បេក្ខជនអគ្គសញ្ញាលាបថ្ងាស ចាង វឹងហុង ក្នុងវ័យ១៨ឆ្នាំ និយាយថាអគ្គសញ្ញាលាបថ្ងាសថ្ងៃនេះបានជួយខ្ញុំជាគ្រីស្តបរិស័ទមានជំនឿរឹងមាំជាងមុនដោយបានទទួលព្រះវិញ្ញាណដ៏វិសុទ្ធ។
តាមជំនឿរបស់គ្រីស្តបរិស័ទកាតូលិក ព្រះវិញ្ញាណដ៏វិសុទ្ធផ្ដល់ឱ្យមានប្រាជ្ញាឈ្លាសវៃ ស្គាល់សេចក្ដីពិត មានចិត្តអង់អាច មានសេចក្ដីក្លាហាន មានចិត្តអត់ធ្មត់ ស្គាល់ព្រះជាម្ចាស់ និងគោរពកោតខ្លាចព្រះជាម្ចាស់ជានិច្ច។ លោកអភិបាលអូលីវីយ៉េមានប្រសាសន៍ទៀតថា ទាំងនេះជាព្រះអំណោយទានមកពីព្រះវិញ្ញាណដ៏វិសុទ្ធ ដែលណែនាំឱ្យយើងរស់នៅក្នុងពិភពលោក ក្នុងសង្គមបច្ចុប្បន្ននេះ និងនៅក្នុងជីវិតយើងសព្វថ្ងៃតាមមេត្តាករុណារបស់ព្រះអង្គ។
នៅក្នុងកម្មវិធីនេះដែរលោកអភិបាលបានសួរបញ្ជាក់អំពីជំនឿទៅកាន់បេក្ខជនទាំងនោះ ដោយស្នើឲ្យបេក្ខជនប្រកាសជំនឿសាជាថ្មីដោយសន្យាថាបោះបង់ចោលមារសាតាំង និងបម្រើព្រះជាម្ចាស់នៅក្នុងព្រះសហគមន៍កាត់តូលិកដ៏វិសុទ្ធ។
បេក្ខជនទាំងនោះក្រាបខ្លួនដល់កន្ទេលនិងដូចបានទ្រាបដៃ អធិដ្ឋានទូលអង្វរព្រះជាម្ចាស់សូមព្រះវិញ្ញាណដ៏វិសុទ្ធយើងមក និងបង្ហាញអំពីផលថ្លៃនៃព្រះវិញ្ញាណដ៏វិសុទ្ធ។ រួចលោកអភិបាលដៅបេក្ខជនម្នាក់ម្ដងៗដោយព្រះវិញ្ញាណដ៏វិសុទ្ធដែលជាព្រះអំណោយទានរបស់ព្រះជាម្ចាស់។
ដោយដាលីស
