ស្ត្រីវ័យ៨១ឆ្នាំ ជាជនជាតិជប៉ុនបានមករស់នៅក្នុងប្រទេសកម្ពុជា ជិត២០ឆ្នាំ ដោយខិតខំបម្រើការងារក្នុងវិស័យអប់រំសម្រាប់កុមារកម្ពុជា ឲ្យមានទស្សនវិស័យវែងឆ្ងាយ។
ដូនជី ហាស៊ីម៉ូតុ ស៊ីនកុ មកពីក្រុមគ្រួសារបងស្រីស្រឡាញ់ព្រះយេស៊ូនៅចូហ្វែល មានប្រសាសន៍ថា «១៩ឆ្នាំមកហើយមានរឿងជាច្រើនខ្ញុំចង់និយាយ និងសូមអរគុណទាំងអស់គ្នាដែលបានស្និទ្ធស្នាលជាមួយនឹង(ក្រុមគ្រួសារ)បងស្រីមកដល់សព្វថ្ងៃនេះ ដោយមានទាំងអស់គ្នាចូលរួមជាមួយខ្ញុំគ្រប់កិច្ចការ»។
រយៈពេលកន្លងមកនេះ ដូនជីស៊ីនកុ តែងតែធ្វើសកម្មភាពរបស់ខ្លួននៅក្នុងតំបន់កំពត ដោយផ្តោតសំខាន់លើអំណានសម្រាប់កុមារនិងជំទង់។ គាត់បានឲ្យដឹងថា «សមត្ថភាពនៅក្នុងការអាននាំឱ្យមានសមត្ថភាពក្នុងការគិតវែកញែកវិនិច្ឆ័យ។ ខ្ញុំជឿថាការអាននិងការរិះគិតនាំឲ្យការយល់ដឹងរបស់យើងរីកចម្រើន សុំធ្វើការអានជាមួយមិត្តរបស់អ្នក ខ្ញុំអានជាមួយអ្នក»។
ទោះបីមកដល់ប្រទេសកម្ពុជាក្នុងវ័យ៦៣ឆ្នាំហើយក៏ដោយ ក៏ដូនជីរូបនេះនៅតែខិតខំរៀនភាសាខ្មែរផង និងអង់គ្លេសផង ដើម្បីអាចប្រាស្រ័យទាក់ទងជាមួយមនុស្សក្នុងតំបន់ និងអាចជួយដល់កុមារឲ្យចេះអានភាសារបស់ខ្លួន តាមរយៈបណ្ណាល័យដែលគាត់បានរៀបចំ។
នៅថ្ងៃទី១៩ ខែកុម្ភៈនេះ ព្រះសហគមន៍មណ្ឌលសកម្មភាពកំពតកែបប្រារព្ធពិធីថ្លែងអំណរគុណបងស្រី ហាស៊ីម៉ុតុ ស៊ីនកុ ដែលបានបម្រើព្រះសហគមន៍មណ្ឌលសកម្មភាពកំពតកែបក្នុងវិស័យអប់រំអស់រយៈពេល១៩ឆ្នាំកន្លងទៅនេះ។
កម្មវិធីនេះធ្វើឡើង ក្រោមអធិបតីភាពលោកអភិបាលព្រះសហគមន៍ភូមិភាគភ្នំពេញ អូលីវីយ៉េ ជ្មីតហស្លេ នៅព្រះវិហារសន្តអូគូស្តាំង ក្នុងខេត្តកំពត ដោយមានគ្រីស្តបរិស័ទចូលរួមជាច្រើនកុះករ។
ឆ្លៀតក្នុងឱកាសនេះដែរលោកអភិបាលព្រះសហគមន៍អូលីវីយ៉េមានប្រសាសន៍ ថ្លែងអំណរគុណអស់ពីដួងចិត្តដល់បងស្រី ស៊ីងកុ ដែលបានចាប់ផ្ដើមបេសកកម្មជាមួយមណ្ឌលកំពតនេះក្នុងឆ្នាំ ២០០៤ បន្ទាប់ពីលោកបានទាក់ទងជាមួយក្រុមដូនជីនៅប្រទេសជប៉ុន ដោយបង្កើតបណ្ណាល័យតូចៗនៅតាមភូមិដើម្បីជួយឲ្យកុមារមានម៉ោងពិសេសក្នុងការអានសៀវភៅ។
លោកអភិបាលក៏បានរំឭកសកម្មភាពមណ្ឌលវប្បធម៌និងភាសាបរទេស ដែលសម្ពោធកាលពីឆ្នាំ២០០៧ ជាពូជនៃសាលាដែលយើងមាននៅសព្វថ្ងៃ និងអនុស្សាវរីយ៍ស្នាដៃមួយយ៉ាងពិសេសដែលលោកបានទទួលពីដូនជីស៊ីនកុ ក្នុងអំឡុងពេលលោកនៅជាបូជាចារ្យទទួលខុសត្រូវព្រះសហគមន៍ខេត្តកំពតកែបជាមួយលោកបូជាចារ្យ សួន ហង្សលី ដែលបច្ចុប្បន្នលោកជាអភិបាលព្រះសហគមន៍ភូមិភាគកំពង់ចាម។
លោកអភិបាលបន្ថែមថា ដូនជីបានខិតខំអស់ពីសមត្ថភាពនៅក្នុងសេចក្ដីស្រឡាញ់និងបម្រើដូចជាអ្នកបម្រើរបស់ព្រះជាម្ចាស់ ហើយគាត់ជាម្ដាយរបស់យើង និងកម្លាំងរបស់គាត់គឺការអធិដ្ឋាន។
លោកបន្ថែមថា កិច្ចការដែលសាមញ្ញរបស់គាត់ប្រចាំថ្ងៃគឺ គាត់បានយកចិត្តទុកដាក់រៀបចំផ្កានិងគ្រឿងអភិបូជាប្រចាំថ្ងៃ។
លោកអភិបាលអូលីវីយ៉េបានជូនពរ និងអធិដ្ឋានជូនដូនជីរូបនេះ ក្នុងបេសកកម្មរបស់គាត់នៅក្នុងភូមិភាគបាត់ដំបង ក្នុងខេត្តសៀមរាប នៅក្នុងសេចកីសុខ និងអាចចែករំលែកសេចក្ដីស្រឡាញ់ដែលមានចំពោះប្រទេសកម្ពុជាក៏ដូចជាចំពោះមនុស្សទាំងអស់ដែលកំពុងទន្ទឹងរង់ចាំវត្តមានរបស់ព្រះជាម្ចាស់។
អ្នកស្រី ជូ អាន តំណាងគណៈកម្មការព្រះសហគមន៍សន្តយ៉ូសែបជុំគិរី ក្នុងខេត្តកំពតមានប្រសាសន៍ថា នៅជុំគីរីដូនជីស៊ីនកុ បានជួយបំពេញតម្រូវការ ចាំបាច់មួយគឺបង្កើតបណ្ណាល័យមួយនៅក្នុងព្រះសហគមន៍ ដើម្បីផ្ដល់ឱកាសឲ្យកុមារបានសិក្សានិងស្រាវជ្រាវអាននិងស្ដាប់។
អ្នកស្រី ជូ អាន បន្តថា ពិតមែនការអានសៀវភៅបានផ្ដល់អត្ថប្រយោជន៍ដ៏អស្ចារ្យ គឺជាមូលដ្ឋានមួយដ៏សំខាន់គ្រប់មុខវិជ្ជាទាំងអស់ ដោយផ្ដល់ឲ្យកុមារមានសមត្ថភាពអាន ពូកែគិត ពូកែសង្កេត និងចេះវិនិច្ឆ័យដោយភាពត្រឹមត្រូវ ហើយការអានសៀវភៅបង្កើតបញ្ញាក្នុងការរស់នៅ។
«អ្វីដែលសំខាន់បំផុតការអានសៀវភៅក៏ជាជំនួយស្មារតីដើម្បីឲ្យគេបម្រើព្រះជាម្ចាស់បានល្អប្រសើរ។» អ្នកស្រីជូ អានបន្ថែម។
វត្តមានរបស់ព្រះជាម្ចាស់បានលេចចេញមកតាមរយៈដូនជី ដោយនាំឲ្យយើងចេះបម្រើគ្នាទៅវិញទៅមកដោយចិត្តមេត្តាករុណា។ អ្នកស្រីជូ អាន បញ្ជាក់ថា សកម្មភាពទាំងនេះយើងខ្ញុំទាំងអស់គ្នានឹងចងចាំក្នុងចិត្ត ដើម្បីធ្វើជាគំរូនៃការបម្រើ និងសូមថ្លែងអំណរគុណចំពោះការខិតខំប្រឹងប្រែងយកចិត្តទុកដាក់នៅក្នុងគ្រប់សកម្មភាពរបស់ដូនជិក្នុងព្រះសហគមន៍។
កញ្ញាញ៉ែម សុភាព នាយិកាសាលាបឋមសិក្សាមជ្ឈមណ្ឌលវប្បធម៌និងភាសាបរទេស (FLCC) និងជាតំណាងព្រះសហគមន៍កំពត បាននិយាយថា ១៩ឆ្នាំកន្លងមកនេះដូនជីបានធ្វើជាគំរូដ៏ល្អបំផុតដែលប្រៀបបានទៅនឹងម្ដាយ ថែរក្សាកូនដោយភាពទន់ភ្លន់ និងបង្ហាញថាព្រះជាម្ចាស់ស្រឡាញ់យើងនិងថែរក្សាយើងដូចដូនជីបានប្រព្រឹត្តនៅក្នុងជីវិតរស់នៅប្រចាំថ្ងៃយ៉ាងដូច្នោះដែរ។
សុភាពបន្តថា ដូនជីជាគំរូក្នុងការអធិដ្ឋានដោយចិត្តស្ងៀមស្ងាត់ មានចិត្តល្អជាមួយកុមារ និងថែរក្សាព្រះវិហារព្រមទាំងចូលរួមគ្រប់សកម្មភាពព្រះសហគមន៍។
ដូនជីស៊ីនកុ ហាស៊ីម៉ុតុ មកពីក្រុមគ្រួសារបងស្រីនៃព្រះកុមារយេស៊ូនៅចូហ្វែល ដែលចូលមកបំពេញបេសកកម្មនៅកម្ពុជាតាមការស្នើរបស់លោកអភិបាលអេមីលដេតម្ប និងលោកអូលីវីយ៉េ កាលពីខែមីនា ២០០៤ ក្នុងខេត្តកំពត។
បេសកកម្មដំបូងរបស់គាត់គឺការអប់រំតាមរបៀបម៉ុងតេសូរី។ បេសកកម្មទី២គឺបម្រើផ្នែកសុខភាព កាលពីខែកុម្ភៈ ២០០៨ ដល់២០១៣។ បន្ទាប់មកក្នុងខែមករា ២០១២ រហូតមមកដល់បច្ចុប្បន្ននេះ គាត់បានចូលរួមបង្រៀនគ្រូមត្តេយ្យនិងបឋមសិក្សានៅព្រះសហគមន៍កំពត ឱ្យចេះបង្រៀនសិស្សតាមរបៀបម៉ុងតេសូរី។ ជាមួយគ្នានេះ គាត់បានរៀបចំបង្កើតឱ្យមានកូនបណ្ណាល៏យនៅតាមភូមិនានាដែលមានព្រះសហគមន៍ក្នុងមណ្ឌលសកម្មភាពកំពត ដោយសកម្មភាពនេះមានចាប់តាំងពីខែតុលា ២០០៤ រហូតដល់ខែមីនា ២០២៣នេះ មានចំនួន ៧កន្លែងរួមមាននៅភូមិកោះស្លា ជុំគិរី គិរីវង់ ចំការទៀង ត្រពាំងរុន ព្រែកប្រស់ និងភូមិសុខសាន្ត។
ដូនជីស៊ីនកុ នឹងចេញពីខេត្តកំពតទៅខេត្តសៀមរាបក្នុងខែមីនាខាងមុខនេះ ដើម្បីបន្តបេសកកម្មផ្នែកអប់រំក្នុងតំបន់សម្រាប់កុមារតូច៕
ដោយដាលីស
