សហព័ន្ធកាតូលិកដើម្បីមនុស្សធម៌ និងការអភិវឌ្ឍន៍ដែលហៅកាត់ថា (CACD) បានបង្កើតកម្មវិធីសំណាក់ធម៌មួយនៅវិទ្យាស្ថានសន្តប៉ូល ដែលស្ថិតនៅភូមិអង្គគគីរ ឃុំតាភេម ស្រុកត្រាំកក់ ខេត្តតាកែវ ក្រោមអធិបតីភាពលោកអភិបាល អូលីវីយេ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញ។
កម្មវិធីនេះមានការចូលរួមពី២៤អង្គការ ដែលមានមនុស្សជាង៥០នាក់ ក្រោមប្រធានបទ «ឱ្យយើងទៅជាតួអង្គសំខាន់ដើម្បីបង្កើតសង្គមថ្មី» ដែលកម្មវិធីនេះធ្វើឡើងកាលពីពេលកន្លងទៅថ្មីៗនេះ។
លោកអូលីវីយេ ជ្មីតហស្លេ បានថ្លែងដោយជំរុញឱ្យគ្រប់អង្គភាពទាំងអស់ធ្វើខ្លួនឱ្យក្លាយជាតួអង្គសកម្មក្នុងការទទួលខុសត្រូវជាន់ខ្ពស់បំផុតដើម្បីបង្កើតសង្គមថ្មីដោយដឹងថាក្នុងសង្គមសព្វថ្ងៃមានតួអង្គដែលអង្គុយមើល និងតួអង្គដែលសកម្ម។
លោកអភិបាលអូលីវីយេក៏បានស្នើឱ្យសមាជិក CACD ខិតខំធ្វើការដោយសហការគ្នាមិនមែនត្រឹមតែបំពេញតួនាទីជាបុគ្គលិកសម្រាប់អង្គការតែប៉ុណ្ណោះ ប៉ុន្តែត្រូវដាក់ខ្លួនបម្រើជាព្រះសហគមន៍ ជាគ្រួសារតែមួយនឹងធ្វើដំណើររួមជាមួយគ្នាដោយប្រកាសដំណឹងល្អនៅក្នុងអង្គព្រះយេស៊ូគ្រីស្ត។
លោកមានប្រសាសន៍ថា ៖ «នេះជាមូលហេតុទី១ដែលសមាជិកCACDត្រូវតែជួបជុំគ្នាជាព្រះសហគមន៍កាតូលិកតែមួយ បម្រើព្រះសហគមន៍តែមួយ ហើយត្រូវរិះគិតសហការគ្នាដោយធ្វើការរួមជាមួយគ្នា តាមប្រធានបទផ្សេងៗ ដូចជាការសិក្សា ដូចជាជីវិតពិការ ដូចជាសហក្រិនសង្គមជាដើម»។
នាឱកាសនោះដែរ លោក គឹម រតនា នាយកប្រតិបិត្តអង្គការការីតាសកម្ពុជា បានធ្វើការបែងចែកអង្គភាពជា៤ក្រុម ដើម្បីរិះគិតលើ៤ចំណុចជុំវិញCACD ក្នុងនោះរួមមាន៖ និយាយអំពីភាពខ្លាំង, និយា យពីភាពខ្សោយ និងការធ្វើឱ្យល្អប្រសើរឡើងជាងនេះ, និយាយពីឱកាសដើម្បីឱ្យCACDរីកចម្រើនទៅ មុខ និងចំណុចចុងក្រោយ និយាយពីហានីភ័យដែលប្រឈមមុខជាមួយCACD។
លោកបានបន្តថា ក្នុងការបែងចែក និងពិភាក្សាតាមក្រុមនីមួយៗនោះ ក៏មានចំនុចមួយចំនួនដែលណែនាំឱ្យអង្គភាពត្រូវតែពង្រឹងបន្ថែមផងដែរ ដោយចំណុចទាំងនោះរួមមាន៖ ទី១ ត្រូវបង្កើនការផ្សព្វផ្សាយទៅក្នុងប្រព័ន្ធសង្គម ប្រព័ន្ធបច្ចេកវិទ្យា ដើម្បីដឹងថាពត៌មានដែលបានជោគជ័យនឹងចែករំលែកទៅដល់សមាជិកCACDទាំងអស់។
ទី២ បង្កើនកិច្ចសហប្រតិបិត្តការការងារជាមួយសមាជិកCACDតាមតំបន់នៅក្នុងភូមិភាគ និងទី៣ គួតែបញ្ចូលនឹងអញ្ជើញអង្គការសមាគមកាតូលិកទាំងអស់តាមតំបន់ក្នុងភូមិភាគដែលមាន នៅតាមបណ្ដាខេត្ត នឹងនៅទីក្រុងភ្នំពេញឱ្យចុះឈ្មោះចូលជាសមាគមCACDដើម្បីឱ្យសមាជិកទាំងអស់បានស្គាល់គ្នា។ ចំណែកចំណុច ទី៤ គឺធ្វើឱ្យប្រសើរឡើងចំពោះរចនាសម្ព័ន្ធCACDហើយត្រង់ចំនុចនេះគឺ បង្កើតជាFaceBook Webside CACD ហើយក៍គួរតែបង្កើតតួអង្គសកម្មដើម្បីគ្រប់គ្រងទៅលើកិច្ចការហើយជាក្រុមរួចចងក្រងជាសម្ព័ន្ធមួយជាក់លាក់។
ក្នុងពិធីនោះ លោកអភិបាលអូលីវីយេ បានបញ្ជាក់ដែរដោយឆ្នាំនេះលោកបានសុំឱ្យអង្គការទាំងមូលធ្វើដំណើរជាមួយគ្នារិះគិតទៅលើគុណភាពវិជ្ជាជីវៈ ការអប់រំពីសមត្ថភាព ពីអន្តរសាសនា និងការរៀបចំគម្រោងការច្បាស់លាស់។
លោកអភិបាលបានបន្ថែមទៀតថា ៖ «ដើម្បីឱ្យសហព័ន្ធកាតូលិកដើម្បីមនុស្សធម៌ និងការអភិវឌ្ឍន៍រីកចម្រើនទៅមុខលុះត្រាតែសមាជិក CACD មានគំនិតជាធ្លុងតែមួយ សហការគ្នាដោយមាន Action Plan តែមួយហើយចង់បានភាពជោគជ័យគឺត្រូវតែពង្រឹងទៅលើធនធានមនុស្សជាចំបង»។
លោកអភិបាលអូលីវីយេបានសង្កត់ធ្ងន់ទៀតថា ចំពោះការបង្កើតធនធានមនុស្សត្រូវការប្រើពេលវេលាយូរ ដូចគ្នានឹងអ្វីដែល CACD សហការគ្នាដែរ ដោយខិតខំអនុវត្តបន្តិចម្ដងៗ នោះCACD នឹងបង្កើតបានផលផ្លែយ៉ាងច្រើនផងដែរ៕
