ប្រជាពលរដ្ឋចំនួន៤០គ្រួសារ បានទទួលអំណោយពីវិហារព្រះកុមារយេស៊ូបឹងទំពុន ក្នុងអាទិត្យទី៣នៃ រដូវអប់រំពិសេស ក្រោមអធិបតីភាពលោកបូជាចារ្យ ដាមីញ៉ាំង ហ្វានឺ អតីតជាបូជាចារ្យទទួលខុសត្រូវ ព្រះវិហារព្រះកុមារយេស៊ូបឹងទំពុន រួមជាមួយគណៈកម្មាការប្រចាំក្នុងព្រះសហគមន៍ កាលពីថ្ងៃទី១២ ខែមីនា ឆ្នាំ២០២៣។
លោកបូជាចារ្យ ដាមីញ៉ាំង ហ្វានឺ បានថ្លែងនាឱកាសនោះថា ជារៀងរាល់ឆ្នាំមិនថាបុណ្យរ បស់ ព្រះស ហគមន៍ ឬថ្ងៃធម្មតានោះទេ ព្រះសហគមន៍តែងតែមានការចែកអំណោយ ការទៅសួរសុខទុក្ខបងប្អូន ដែលក្រីក្រ ខ្វះខាតក្នុងគ្រួសារ អ្នកជំងឺនៅតាមផ្ទះ តាមមន្ទីរពេទ្យ ដោយបង្ហាញថាព្រះសហគមន៍ជា គ្រួសារ ជាបងប្អូនដែលមានការយកចិត្តទុកដាក់ ផ្ដល់ភាពកក់ក្ដៅ ផ្ដល់សេចក្ដីស្រលាញ់ ធម៌មេត្តា ករុណា ទាំងនេះសុទ្ធតែជាព្រះអំណោយទានដែលទទួលបានពីព្រះជាម្ចាស់។
កញ្ញា ឃុន កញ្ញា ជាប្រធានគណៈកម្មាការព្រះវិហារព្រះកុមារយេស៊ូបឹងទំពុន បានប្រាប់ឱ្យដឹងថាអំណោយដែលបានចែកជូនដល់បងប្អូន៤០គ្រួសារ គឺសុទ្ធតែជាការឧបត្ថម្ភពីគ្រីស្តបរិស័ទនឹងឪពុកម្ដាយដែលមានកូនៗសិក្សានៅសាលាអប់រំពិសេសនៃការលូតលាស់។
កញ្ញាបានបន្តថា ៖ «ក្នុងរដូវអប់រំពិសេសឬរដូវត្រណម្យ គ្រីស្តបរិស័ទបានឧបត្ថម្ភបន្ថែមជាមួយថវិការនិងគ្រឿងឧបភោគបរិភោគសម្រាប់ចែកជូនទៅដល់បងប្អូនទាំង៤០គ្រួសារដែលមកពីកន្លែងផ្សេងៗគ្នាដូចជា តំបន់គំនរសម្រាមចាស់ខាងចំការដូង សន្សំកុសល ចំរើនផល ក្បាលទំនប់ បឹងត្របែក ចាក់អង្រែក្រោម នឹងម្ដុំលូទឹកស្អុយជិតបឹងទំពុន ហើយភាគច្រើនជាអ្នករើសអេតចាយ»។
កញ្ញា ឃុន កញ្ញា បន្ថែមថា តាមពិតទៅព្រះសហគមន៍បានសល់អង្ករខ្លះៗកាលពីរដូវបុណ្យព្រះយេស៊ូប្រសូត្រ ហើយព្រះសហគមន៍បានឧបត្ថម្ភទៅតាមមណ្ឌលសិស្ស និងយុវជនក្រីក្រមួយចំនួននៅជុំវិញព្រះវិហារផងដែរ។
ជាមួយគ្នានេះ ដូនជី អេង សានី ជាក្រុមគ្រួសារបងស្រីឧបការគុណ និងជាសមាជិកគណៈកម្មាការ ព្រះសហគមន៍ បានឱ្យដឹងដែរថា សម្រាប់ការចែកអំណោយទៅដល់បងប្អូនក្រីក្រក្នុងរដូវអប់រំពិសេសនេះ គឺព្រះសហគមន៍មានគោលបំណងមួយចង់ឱ្យគ្រីស្តបរិស័ទម្នាក់ៗចេះចែករំលែកគ្នាទៅវិញទៅមកតាមអ្វីដែលព្រះសហគមន៍បានរៀបចំសម្រាប់រដូវអប់រំពិសេសគឺការធ្វើទាន អធិដ្ឋាននឹងតមអាហារ។
ដូនជីបានបន្តថា ៖ «នេះជាឱកាសមួយដើម្បីជួយឱ្យគ្រីស្តបរិស័ទបង្ហាញសេចក្ដីស្រលាញ់តាមរយៈការចែករំលែក ទោះបីជាមិនច្រើនប៉ុន្តែជាទឹកចិត្តរបស់ពួកគាត់ម្នាក់ៗចូលរួមជាមួយគ្នាបន្តិចបន្តួចហើយការរួបរួមគ្នារបស់ពួកគាត់អាចជួយដល់បងប្អូនដែលខ្វះខាតក្នុងជីវភាពគ្រួសារប្រចាំថ្ងៃ»។
ដូនជីអេង សានី បានបន្ថែមថា រដូវអប់រំពិសេសមិនមែនសម្រាប់តែបងប្អូនជាគ្រីស្តបរិស័ទត្រូវរៀបចំខ្លួនប៉ុណ្ណោះទេ ប៉ុន្តែត្រូវចេះចែករំលែកសេចក្ដីស្រលាញ់តាមរយៈកិច្ចការដែលធ្វើដែរ ដូច្នេះមានបងប្អូនគ្រីស្តបរិស័ទខ្លះមិនមានពេលវេលាទៅសួរសុខទុក្ខ ចែករំលែកជាមួយអ្នកដទៃ ប៉ុន្តែគាត់បានចូលរួមតាមរយៈសកម្មភាពរបស់ព្រះសហគមន៍ ហើយឃើញថាបងប្អូនគ្រីស្តបរិស័ទមានជំនឿនឹងសេចក្ដីស្រលាញ់យ៉ាងពិតប្រាកដ។
ស្របពេលជាមួយគ្នានេះ អ្នកស្រី ប៉ក់ ស៊ីវន អាយុ៦៤ឆ្នាំ ប្រកបរបរដើរកោសខ្យល់តាមផ្ទះ រស់នៅក្នុងសង្កាត់បឹងទំពុន២ ខណ្ឌមានជ័យ រាជធានីភ្នំពេញ បាននិយាយថា នេះជាលើកទីមួយដែលអ្នកស្រីមកទទួលអំណោយពីព្រះសហគមន៍ធ្វើឱ្យគាត់យល់ឃើញថា ព្រះសហគមន៍ជាកន្លែងមួយដែលល្អ ជាកន្លែងដែលផ្ដល់ស្នាមញញឹម ផ្ដល់ភាពកក់ក្ដៅ ការយកចិត្តទុកដាក់ទៅដល់បងប្អូនដែលជួបការលំបាកផ្សេងៗក្នុងគ្រួសារ។
លោកស្រីបន្តថា សព្វថ្ងៃគាត់ដើរកោសខ្យល់បានប្រាក់កម្រៃមួយថ្ងៃ២ទៅ៣ម៉ឺនរៀលដើម្បីយកមកចិញ្ចឹមចៅចំនួន៣នាក់ ដែល២នាក់កំពុងសិក្សានឹងម្នាក់ទៀតទើបតែអាយុ៣ឆ្នាំ ប៉ុន្តែនៅពេលដែលព្រះសហគមន៍បានអញ្ជើញគាត់អោយទទួលអំណោយរួមជាមួយបងប្អូនឯទៀត គឺគាត់ពិតជាសប្បាយចិត្តរកអ្វីមកនិយាយតបស្នងសងគុណអោយល្អទៅកាន់ព្រះសហគមន៍វិញនោះទេ ព្រោះថាអំណោយដែលមានជាអង្ករ និងគ្រឿងបរិភោគនេះ អាចឱ្យគាត់ដោះស្រាយនឹងឱ្យចៅហូបបានមួយគ្រាធំដែរ៕
