អតីតបូជាចារ្យទទួលខុសត្រូវមណ្ឌលសកម្មភាពភ្នំពេញខាងត្បូង លោកដាមីញ៉ាំង ហ្វារនឺ បានធ្វើការក្រើនរំឭកពីទឹកដែលជាប្រភពនៃជីវិតដ៏ពិតប្រាកដ ដោយលោកបានស្នើឱ្យគ្រីស្តបរិស័ទចូលមកអភិបូជានៅក្នុងព្រះវិហារឲ្យបានទៀងទាត់ ដើម្បីទទួលទឹកដែលជាប្រភពនៃជីវិតគឺ «ព្រះយេស៊ូផ្ទាល់»។
ទីប្រឹក្សាក្រុមសាសនទូតក្រៅប្រទេសនៃទីក្រុងប៉ារីស លោក ដាមីញ៉ាំង បានលើកឡើងដូចនេះនៅក្នុងធម្មទេសនានៃពិធីជម្រះចិត្តគំនិតលើកទីមួយសម្រាប់យុវជន៦នាក់ នៅព្រះវិហារព្រះកុមារយេស៊ូបឹងទំពុន កាលពីថ្ងៃទី១២ ខែមីនា ឆ្នាំ២០២៣កន្លងមកនេះ។
លោកបានថ្លែងថា ៖ «យើងជាគ្រីស្តបរិស័ទបានទទួលអគ្គសញ្ញាជ្រមុជទឹក និងបេក្ខជនទាំង ៦នាក់ ដែលនឹងទទួលអគ្គសញ្ញាជ្រមុជទឹក គឺបានទទួលអំណោយទានពីព្រះជាម្ចាស់តាមរយ:ទឹកដែលជាព្រះវិញ្ញាណដ៏វិសុទ្ធ»។
អ្នករាល់គ្នាស្រេកទឹកដែលជាសេចក្តីស្រឡាញ់ និងជាសុភមង្គល រីឯទឹកលើលោកីយ៍នេះសូមកុំងប់ងល់ពេកដូចជា ស្រា ជាទឹកធ្វើឱ្យអ្នករាល់គ្នាសប្បាយមួយរយៈរួចផ្ដល់បញ្ហាពេលក្រោយ។ ចំណែកទឹកប្រាក់ នាំឱ្យមានការស្រឡាញ់គ្នា ស្អប់គ្នា មានអយុត្តិធម៌ក្នុងសង្គម និងនាំឲ្យមានបាក់បែកគ្នា ហើយនិងទឹកមួយទៀត គឺជាសេចក្ដីស្នេហា នាំឱ្យអ្នករាល់គ្នាសប្បាយ និងពេលខ្លះមើលងាយគ្នាទៅវិញទៅមក ហើយក៏ធ្វើឱ្យខកចិត្តផងដែរ។ នេះបើតាមការបញ្ជាក់ពីលោកដាមីញ៉ាំង ហ្វារនឺ។
«អគ្គសញ្ញាជ្រមុជទឹកដើម្បីក្លាយទៅជាបុត្រធីតារបស់ព្រះជាម្ចាស់ គឺជាទឹកដែលខ្ញុំស្រេកឃ្លានខ្លាំងបំផុត»។ នេះជាសម្ដីរបស់បេក្ខនារី ផុន ដានី ដែលទទួលពិធីជម្រះចិត្តគំនិតជាលើកដំបូងមុននឹងទទួលអគ្គសញ្ញាជ្រមុជទឹកនៅថ្ងៃបុណ្យចម្លងខាងមុខនេះ។
ក្នុងវ័យ២១ឆ្នាំ ដានី រៀបរាប់ទៀតថា ព្រោះទឹកនេះ លាងជម្រះដួងចិត្តរបស់នាង ដើម្បីឱ្យនាងស្លាប់ និងកើតជាថ្មីរួមជាមួយព្រះយេស៊ូនៅថ្ងៃបុណ្យចម្លង។
កញ្ញាថា ៖ «ដោយសារខ្ញុំធ្លាប់អានព្រះគម្ពីរមួយនិយាយថា មានតែអគ្គសញ្ញាជ្រមុជទឹកទេដែលនាំឱ្យយើងនឹងក្លាយទៅជាសរីរាង្គរបស់ព្រះជាម្ចាស់។ ប្រសិនបើខ្ញុំក្លាយជាគ្រីស្តបរិស័ទខ្ញុំត្រូវការជាងគេគឺ អគ្គសញ្ញាជ្រមុជទឹក នៅថ្ងៃបុណ្យចម្លងនេះ ជាទឹកដ៏ចាំបាច់បំផុតសម្រាប់ខ្ញុំ»។
បេក្ខនារី ផុន ដានី បានប្រាប់ទៀតថា រីឯទឹកផ្សេងៗដែលលោកបូជាចារ្យបានលើកយកមកពន្យល់ ក្នុងនាមជាមនុស្សនរណាក៏ចង់បាន ក៏ប៉ុន្តែសម្រាប់អ្នកដែលជាគ្រីស្តបរិស័ទ ទោះបីជាពេលខ្លះមានការលោភលន់ តែព្យាយាមកែប្រែចិត្តគំនិតរបស់ខ្លួនឯងដោយគិតពីអ្នកដទៃ កុំអាត្មានិយមពេក។
និស្សិតរៀនផ្នែកធនាគារ និងហិរញ្ញវត្ថុ ឆ្នាំទី៣ រូបនេះ បានបញ្ជាក់ក់ទៀតថា ៖ «នៅពេលដែលខ្ញុំជ្រមុជទឹកហើយ ខ្ញុំនឹងព្យាយាមស្ដាប់ ព្យាយាមកែប្រែចិត្តគំនិតបន្តទៀត ព្រោះខ្ញុំបានសម្រេចចិត្តធ្វើជាគ្រីស្តបរិស័ទរួចហើយ»។
នាឱកាសនោះដែរ លោកបូជាចារ្យ ដាមីញ៉ាំងបានដាស់តឿនគ្រីស្តបរិស័ទថា ទឹកដែលលោកបានលើកឡើងទាំងនេះ មិនមែនជាប្រភពជីវិតអស់កល្បជានិច្ចទេ មានតែទឹកនៃក្ដីសង្ឃឹម និងសេចក្តីស្រឡាញ់ដែលមកពីព្រះជាម្ចាស់ផ្ទាល់ គឺជាប្រភពនៃជីវិតដ៏ពិតប្រាកដ។
លោកក៏បានស្នើដល់បងប្អូនដែលនឹងទទួលអគ្គសញ្ញាជ្រមុជទឹក ត្រៀមខ្លួន និងអស់អ្នកដែលមានជំនឿថ្មីៗ ជួយជំរុញអ្នកដែលមានជំនឿចាស់ដែលភ្លេចជំនឿ និងមិនសូវមកព្រះវិហារ ឲ្យវិលមករកព្រះជាម្ចាស់វិញ។
នៅក្នុងពិធីបុណ្យអភិបូជានេះដែរ លោកបូជាចារ្យរួមជាមួយព្រះសហគមន៍បានប្រារព្ធពិធីជម្រះចិត្តគំនិតដល់បេក្ខជនទាំង៦រូប ដោយអធិដ្ឋានផ្ញើបេក្ខជនទៅព្រះជាម្ចាស់ និងសូមព្រះអង្គការពារ និងរំដោះពួកគាត់ពីមារកំណាច ព្រមទាំងជម្រះចិត្តពួកគេឱ្យបានបរិសុទ្ធ៕
ដោយដាលីស
