អភិបាល អូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញរួមជាមួយលោកស្រី គា សុភូ អភិបាលខេត្តតាកែវ បានចូលរួមជាអធិបតីភាពក្នុងកម្មវិធីអបអរសាទរទិវាវប្បធម៌ជាតិ៣មីនា ខួបលើកទី២៥ ឆ្នាំ២០២៣ រៀបចំឡើងដោយមន្ទីរវប្បធម៌ និងវិចិត្រសិល្បៈខេត្តតាកែវ នាថ្ងៃទី២១ ខែមីនា ឆ្នាំ២០២៣ ក្រោមប្រធាន «យុវជនដើម្បីវប្បធម៌ជាតិ»។
ពិធីក៏មានការចូលរួមពីព្រះសង្ឃទាំងពីរគណៈ មន្រ្តីនៃមន្ទីរអង្គភាពក្រុង ស្រុក គ្រឹះស្ថានឯកជន សិល្បករសិល្បការិនី អាជីវករ សិស្សានុសិស្ស សរុបប្រមាណជា ៣៥០ នាក់។
ថ្លែងក្នុងពិធីនោះ លោក ជេត ពិសុទ្ធ ប្រធានមន្ទីរវប្បធម៌ និងវិចិត្រសិល្បៈខេត្តតាកែវ បានលើកឡើងថា ការប្រារព្ធទិវាវប្បធម៌ជាតិ៣មីនានេះកម្លាំងយុវជនជាសក្ដានុពលធនធានមនុស្សដ៍សំខាន់ដែលមិនអាចខ្វះបានក្នុងការរួមចំណែក អភិរក្ស អភិវឌ្ឍន៍ជាតិក្នុងបរិបទនៃការរីកចម្រើនបែបឌីជីថល។
លោកបានថ្លែងថា ៖ «ជាការពិតណាស់ ទិវាវប្បធម៌៣មីនាឆ្នាំនេះ ក៏ដូចរៀងរាល់ឆ្នាំកន្លងមកដែលសម្រេចជោគជ័យបាន គឺពិតជាបានមកពីការសហការជិតស្និតរវាងមន្ទីរវប្បធម៌ និងវិចិត្រសិល្បៈជាមួយមន្ទីរអប់រំយុវជន និងកីឡា ជាពិសេសយុវជនមកពីវិទ្យាល័យសន្តហ្វ្រង់ស្វ័រដែលមានលោកអូលីវីយ៉េ ជាអភិបាលព្រះសហគមន៍កាតូលិកភូមិភាគភ្នំពេញជាស្ថាបនិកដែលមិនអាចបំភ្លេចគុណបានឡើយ»។
លោកបានបន្តដោយសង្កត់ធ្ងន់ថា ៖ «សូមឱ្យទិវានេះក្លាយជាទឹកមន្តដ៏សក្តិសិទ្ធដាស់រំលឹកដល់កូនខ្មែរឱ្យស្រលាញ់ថែរក្សា ការពារ និងបណ្ដុះលើកតម្កើងវប្បធម៌ជាតិជារៀងរហូត»។
ក្នុងឱកាសនោះដែរ លោកអភិបាល អូលីវីយ៉េ ជ្មីតហស្លេ ក៏បានថ្លែងសំណេះសំណាល និងបានលើកឡើងថា សព្វថ្ងៃវប្បធម៌ថ្មីរបស់យុវជន យុវនារី គឺប្រើកុំព្យូទ័រដើម្បីគិតជំនួសមនុស្សដែលកម្មវិធីនោះហៅថា AI ប្រសិនបើចង់រកព័ត៌មាន ឬឯកសារអ្វីមួយ។
លោកបានថ្លែងថា ៖ «នៅថ្ងៃនេះយើងបានឃើញនូវប្រធានបទ ស្តីពី យុវជនដើម្បីវប្បធម៌ជាតិ ដោយគិតថានៅពេលនឹកឃើញដល់វប្បធម៌ដែលកំពុងកើតឡើងក្នុងសតវត្សទី២១ ដែលជាវប្បធម៌ថ្មីសម្រាប់កូនក្មេងកំពុងកើតសព្វថ្ងៃ សម្រាប់យុវជន យុវនារី ដោយជឿថាប្រធានបទនេះនឹងបានណែនាំឱ្យគិតពិចារណាថា តើទៅថ្ងៃអនាគតចង់បង្កើតវប្បធម៌អ្វីខ្លះសម្រាប់ប្រទេសជាតិ និងសម្រាប់ពិភពលោក»។
លោកអភិបាល អូលីវីយ៉េ បានបញ្ជាក់ថា មនុស្សគ្រប់គ្នាកើតនៅក្នុងវប្បធម៌មួយដែលទទួលពីបុព្វបុរស ហើយបានចូលនៅក្នុងខ្លួនមនុស្សម្នាក់ៗដោយមិនអាចនិយាយថាវប្បធម៌មិនមែនជាអ្វីដែលសិក្សា មិនមែនជាអ្វីដែលទទួលពីឪពុកម្ដាយ ពីលោកតាលោកយាយនោះទេ ប៉ុន្តែជាវប្បធម៌មួយដែលណែនាំឱ្យគ្រប់គ្នាសព្វថ្ងៃមានអត្តសញ្ញាណជាជនជាតិខ្មែរមួយរូបដែលរស់នៅក្នុងប្រទេស និងវប្បធម៌របស់ខ្លួន។
អភិបាលរងខេត្តតាកែវ លោកស្រី គា សុភូ ក៏បានថ្លែងនាពិធីនោះដែរថា រាជរដ្ឋាភិបាលបានរក្សាប្រធានបទ «យុវជនដើម្បីវប្បធម៌ជាតិ» ក្នុងទស្សនទានជម្រុញការផ្សព្វផ្សាយ ដើម្បីឱ្យយុវជនបានទទួលយកការផ្ទេរចំណេះដឹង ចំណេះធ្វើ ជំនាញពីមនុស្សជំនាន់មុនក្នុងកាតព្វកិច្ចជាអ្នកថែរក្សាការពារវប្បធម៌ជាតិ វប្បធម៌ចម្រុះរបស់សហគមន៍ជាតិ និងជនជាតិឱ្យគង់វង្សរុងរឿង។
លោកស្រីមានប្រសាសន៍ថា៖ «ដើម្បីចូលរួមថែរក្សាការពារវប្បធម៌ប្រពៃណី និងសម្បត្តិបេតិកភណ្ឌ វប្បធម៌ជាតិ មន្ទីរបានខិតខំផ្សព្វផ្សាយការអប់រំសីលធម៌សង្គម ផ្សព្វផ្សាយច្បាប់ស្ដីពីកិច្ចការពារបេតិកភណ្ឌវប្បធម៌ និងផ្សព្វផ្សាយតួនាទីសារៈមន្ទីរព្រមទាំងផ្សព្វផ្សាយក្រមសីលធម៌ដល់សិល្បករ ពលរដ្ឋ និងយុវជនដែលជាទំពាំងស្នងឬស្សីដើម្បីរួមគ្នាអភិរក្ស និងអភិវឌ្ឍន៍វប្បធម៌ ប្រពៃណី សម្បត្តិបេតិកភណ្ឌឱ្យបានស្ថិតស្ថេរជានិរន្តន៍»៕
