កម្មវិធីបូជនីយចរសម្រាប់យុវជន ត្រូវបានរៀបចំឡើងដោយការិយាល័យយុវជន ជំទង់ និងកុមារភូមិភាគភ្នំពេញ កាលពីថ្ងៃទី២៤ ដល់២៦ ខែមីនា ឆ្នាំ២០២៣ កន្លងទៅនេះ នៅព្រះសហគមន៍កំពង់សោម ក្នុងខេត្តព្រះសីហនុ។
កម្មវិធីនេះធ្វើឡើងក្រោមប្រធានបទ «នៅគ្រានោះនាងម៉ារីក្រោកឡើងប្រញាប់ប្រញាល់ធ្វើដំណើរទៅកាន់ភូមិមួយនៅតំបន់ភ្នំក្នុងស្រុកយូដា» ដោយមានការចូលរួមរពីលោក អូលីវីយ៉េ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញ រួមជាមួយនឹងលោកបូជាចារ្យ លោកឧបដ្ឋាក បងប្រុស បងស្រី និងយុវជនជាង ២៦០នាក់។
លោកអភិបាល អូលីវីយ៉េ បានថ្លែងនាឱកាសនោះដោយលោកបានសុំឱ្យបងប្អូននឹកឃើញដល់ព្រះវិញ្ញាណដ៍វិសុទ្ធដែលជាដង្ហើមរបស់ព្រះជាម្ចាស់បានណែនាំឱ្យបងប្អូនបន្តធ្វើដំណើរដោយមានព្រះវិញ្ញាណដ៍វិសុទ្ធដែលជំរុញនឹងមានព្រះវិញ្ញាណដ៍វិសុទ្ធដែលបំភ្លឺឱ្យបងប្អូនមើលឃើញ ប៉ុន្តែមិនមែនគ្រាន់តែឱ្យមើលឃើញនោះទេ តែឱ្យបងប្អូនទៅជាពន្លឺមួយនៅក្នុងពិភពលោក។
លោកបានសង្កត់ធ្ងន់ថា៖ «មុនពេលក្លាយជាពន្លឺត្រូវតែទទួលពន្លឺជាមុនសិន ដោយនៅថ្ងៃនេះយើងទទួលពន្លឺក្នុងព្រះវិញ្ញាណដ៍វិសុទ្ធដើម្បីក្លាយជាយុវជនយុវនារីដែលពោរពេញដោយកម្លាំងក្នុងការបំពេញបេសកកម្មមួយថ្មី ជាអ្នកចម្បាំងដើម្បីការពារពន្លឺនៅក្នុងពិភពលោក ជាអ្នកចម្បាំងដើម្បីបង្ហាញពីសេចក្ដីពិត បង្ហាញពីផ្លូវដែលព្រះជាម្ចាស់បានបំភ្លឺដើម្បីបំភ្លឺដល់បងប្អូនឯទៀតៗ»។
នាឱកាសនោះដែរ លោកអភិបាលក៏បានអំពាវនាវសុំឱ្យបងប្អូននឹកឃើញដល់ជីវិតថា តើធ្វើដូចម្ដេចដើម្បីភា្ជប់ជាមួយព្រះជាម្ចាស់បន្ថែមទៀត នៅក្នុងការអធិដ្ឋានហើយថ្ងៃនេះជាថ្ងៃមានអំណរសប្បាយដោយសារទាំងអស់រួមគ្នា ដែលអាចទៅជាក្រុមទ័ពមួយដ៍ធំជាអ្នកចម្បាំងការពារពន្លឺ។
ជាមួយគ្នានោះដែរ លោក ស៊ាន់ សារឿន អ្នកទទួលខុសត្រូវការិយាល័យយុវជន ជំទង់ និងកុមារភូមិភាគភ្នំពេញបានថ្លែងឱ្យដឹងដែរថា ការិយាល័យបានរៀបចំកម្មវិធីបូជនីយចរ យុវជនភូមិភាគភ្នំពេញ ជារៀងរាល់ឆ្នាំរហូតមកដល់ពេលនេះអស់រយៈពេល១១លើកហើយ។
លោកបានបន្តថា កម្មវិធីបូជនីយចរ មានគោលបំណងតែមួយ ចង់ឱ្យយុវជនមានឱកាសក្នុងការដើររួមគ្នាជាលក្ខណៈគ្រួសារ ដើម្បីអាចមានពេលវេលារិះគិតពីជីវិត ជំនឿ សេចក្ដីស្រលាញ់ដែលជាយុវជន យុវនារីកាតូលិក។
លោកថា ៖ «ដូច្នេះការដើរបូជនីយចរជាពេលវេលាមួយដូចជាផ្លូវនៃជីវិតអញ្ចឹងអាចឱ្យគេរិះគិតពីអត្ថន័យជីវិត ពីគោលបំណង និងពីក្ដីសុបិន្ត អញ្ចឹងហើយការដើរមិនមែនជារឿងងាយស្រួលទេ។ គោលបំណងគឺចង់ឱ្យយុវជនមានបទពិសោធន៍ក្នុងការដើរដូចជាការដើរនៅក្នុងជីវិតរបស់ពួកគេដែលរស់នៅសព្វថ្ងៃដែរ»។
តាមពិតប្រធានបទដែលបានលើកឡើងជាប្រធានបទទិវាយុវជនពិភពលោកឆ្នាំ២០២៣ដែលប្រព្រឹត្តទៅប្រទេសប័រទុយហ្គាល់ ហើយលោកអភិបាលបានសម្រេចចិត្តឱ្យការិយាល័យយកប្រធានបទនេះដើម្បីរួមជាមួយពិភពលោកទាំងមូល ដោយសារនៅខែកក្កដា និងខែសីហា ខាងមុខនេះ នឹងមានទិវាយុវជនពិភពលោកដែលមានប្រទេសទូទាំងពិភពលោកជាច្រើននឹងមកជួបជុំគ្នានៅក្នុងប្រទេសប័រទុយហ្គាល់។
ស្របពេលជាមួយគ្នានេះ លោក ស្ទេផាន ឡេង សម្បិត្ត ជាអ្នកបួសមកពីព្រះសហគមន៍សំរោងធំ ដែលទើបតែត្រឡប់មកសិក្សាពីប្រទេសថៃ បាននិយាយថា សម្រាប់កម្មវិធីបូជនីយចរជាពេលវេលាដែលមានអំណរសប្បាយរួមជាមួយយុវជន និងបងប្អូនឯទៀតៗ។
លោកថា ៖ «សូមឱ្យអំណរសប្បាយជាការត្រាស់ហៅមួយ ជាពន្លឺមួយសម្រាប់ដំណើរជីវិត ជាគ្រីស្តជន ជាគ្រីស្តបរិស័ទនៅក្នុងព្រះសហគមន៍នីមួយៗ សូមឱ្យយុវជនទាំងអស់ក្រោកឈរឡើងធ្វើជាពន្លឺជាមួយគ្នា យើងដើរជាមួយគ្នា យើងចាប់ដៃគ្នាដើម្បីនាំពន្លឺទៅប្រកាសដំណឹងល្អរបស់ព្រះជាម្ចាស់»។
យុវជន ឡាំ វិបុល អាយុ២៥ឆ្នាំ បាននិយាយថា នេះជាលើកទី៤ហើយដែលលោកបានចូលរួមបូជនីយចរនេះ ហើយលោកមានអារម្មណ៍សប្បាយជាងលើកមុនៗ ដោយសារកម្មវិធីនេះជួយអស់បងប្អូនដែលមិនទាន់ក្លាយជាគ្រីស្តបរិស័ទមានទំនាក់ទំនងជាមួយបងប្អូនដែលជាគ្រីស្តបរិស័ទស្រាប់៕
