កាលពីចុងខែមេសា ឆ្នាំ២០២៣កន្លងមកនេះ ព្រះសហគមន៍កាតូលិកកម្ពុជា បានប្រារព្ធទិវានៃការត្រាស់ហៅអន្តរភូមិភាគ ដែលធ្វើឡើងនៅព្រះសហគមន៍សន្តីម៉ារីញញឹមចំការទៀង ខេត្តតាកែវ នៃភូមិភាគភ្នំពេញ ក្រោមប្រធានបទ «ផ្លូវនាំខ្ញុំទៅដល់ព្រះជាម្ចាស់»។
កម្មវិធីនេះមានការចូលរួមជាអធិបតីភាព ពីលោកអភិបាល អូលីវីយ៉េ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញ និងលោកអភិបាល សិលា សួន ហង្សលី អភិបាលនៃព្រះសហគមន៍កាតូលិកភូមិភាគកំពង់ចាម រួមជាមួយលោកបូជាចារ្យ លោកឧបដ្ឋាក ក្រុមបព្វជិត បព្វជីតា និងយុវជនចូលរួមប្រមាណជា៤៣០នាក់។
ថ្លែងនៅក្នុងកម្មវិធីនេះ លោកអភិបាលអូលីវីយ៉េ បានលើកឡើងថា ទិវានៃការត្រាស់ហៅកំពុងតែសាបព្រោះព្រះបន្ទូលព្រះជាម្ចាស់សម្រាប់បងប្អូនមានឱកាសដើម្បីជួបជុំគ្នា ស្ដាប់ព្រះបន្ទូល អធិដ្ឋាន ជួបជាមួយបព្វជិតបព្វជិតា ដែលមានអំណោយទានផ្សេងៗពីគ្នា ដែលមានសម្រាប់អ្នកក្រីក្រ សម្រាប់អ្នកជំងឺ សម្រាប់ការសិក្សា សម្រាប់ព្រះសហគមន៍ទូទៅ ដូច្នេះការត្រាស់ហៅត្រូវតែមានវិន័យ ត្រូវមានការលះបង់ ការបូជានឹងស្ដាប់បង្គាប់។
លោកមានប្រសាសន៍ថា ៖ «នេះជាទិវានៃការត្រាស់ហៅលើកទី៦០នៅក្នុងពិភពលោក និងសម្រាប់ព្រះសហគមន៍កាតូលិកក្នុងប្រទេសកម្ពុជាបានប្រមូលយុវជនយុវនារីទាំង៣ភូមិភាគ ជាពេលវេលាដើម្បីអធិដ្ឋានរួមគ្នា បង្កើតទំនាក់ទំនងជាកូនចៅរបស់ព្រះជាម្ចាស់ ជាបុត្រាបុត្រីរបស់ព្រះបិតា»។
លោកឧបដ្ឋាក វី សំណាង ដែលជាគណៈកម្មានៃការរៀបចំកម្មវិធីត្រាស់ហៅអន្តរភូមិភាគ បានលើកឡើងនាឱកាសនោះដែរថា ជារៀងរាល់ឆ្នាំព្រះសហគមន៍កាតូលិកនៅទូទាំងពិភពលោក រួមទាំងព្រះសហគមន៍កាតូលិកក្នុងប្រទេសកម្ពុជានៅអាទិត្យទី៤នៃបុណ្យចម្លងគឺអធិដ្ឋាន ពិសេសសម្រាប់ការត្រាស់ហៅជីវិតជាអ្នកថ្វាយខ្លួន។
លោកបានបន្តថា ៖ «ដូច្នេះ កម្មវិធីបានប្រមូលយុវជនមកចូលរួមដើម្បីជួយឱ្យពួកគាត់រិះគិតអំពីជីវិតផ្ទាល់ខ្លួន អំពីជីវិតជាអ្នកបួស ជីវិតដែលត្រូវកសាងគ្រួសារ ដែលទាំងអស់នេះសុទ្ធតែជាការត្រាស់ហៅរបស់ព្រះជាម្ចាស់ ប៉ុន្តែចង់ពួកគាត់ផ្ដោតសំខាន់ទៅលើជីវិតជាអ្នកថ្វាយខ្លួន»។
លោក វី សំណាង បានបន្តទៀតថា រយៈពេល២ថ្ងៃ លោកសង្កេតឃើញថា យុវជនមានការចាប់អារម្មណ៍ខ្លាំងជាមួយប្រធានបទដែលអប់រំដោយលោកអភិបាល ហើយយុវជនមានពេលវេលាដើរតាមស្តង់ដែលក្រុមបព្វជិតបព្វជីតាប្រមាណជា ១២ ក្រុមផងដែរ។
«ឆ្នាំនេះ ជាឆ្នាំដែលលោកអភិបាលសុំឱ្យព្រះសហគមន៍ទាំងបីភូមិភាគចាប់អារម្មណ៍ទៅលើ២ចំណុច គឺជិវិតគ្រួសារ និងការត្រាស់ហៅ ហើយសង្ឃឹមថាឆ្នាំនេះ ជាឆ្នាំមួយដែលពោរពេញដោយព្រះអំណោយទានរបស់ព្រះជាម្ចាស់សម្រាប់យុវជនក្លាហានក្នុងការឆ្លើយតបទៅនឹងការត្រាស់ហៅដើម្បីក្លាយជាបព្វជិត បព្វជិតា និងក្លាយជាបូជាចារ្យ»។ នេះបើតាមការបញ្ជាក់បន្ថែមពីលោកឧបដ្ឋាក វី សំណាង។
ជាមួយគ្នានេះ ដូនជី តេរេសា ហេង ផល្លា ជាក្រុមគ្រួសារបងស្រីអ្នកបម្រើសេចក្ដីស្រលាញ់ដ៍និមលរបស់ព្រះនាងម៉ារី ក៏បានលើកទឹកចិត្តដល់យុវជន យុវនារីដែលបានមកចូលរួមកម្មវិធីទិវាត្រាស់ហៅនេះផងដែរ។
ដូនជី តេរេសា ហេង ផល្លា បានថ្លែងថា ៖ «កុំមានការភ័យខ្លាចក្នុងការឆ្លើយតបជាមួយព្រះជាម្ចាស់ ព្រោះការត្រាស់ហៅ ព្រះជាម្ចាស់បានត្រាស់ហៅឱ្យក្លាយជាគ្រីស្តបរិស័ទ ជាអ្នកបួស ជាអ្នកមានគ្រួសារ ដោយព្រះជាម្ចាស់បានធ្វើការជាមួយយើងម្នាក់ៗ គ្រាន់តែមានសេចក្ដីក្លាហាន និងមានការអធិដ្ឋាន»។
ទន្ទឹងនេះដូនជី បេនីឌីតា ឡាវ៉ាន សៀន យ៉ាគល់ ជាក្រុមគ្រួសារព្រះហឬទ័យរបស់ព្រះយេស៊ូក្រុងបាងកក បាននិយាយដែរថា ដូនជីសង្ឃឹមថាកម្មវិធីត្រាស់ហៅបានជួយដល់យុវជនកូនខ្មែរទាំងអស់ហ៊ានបើកចិត្តស្ដាប់ព្រះបន្ទូលនឹងការត្រាស់ហៅរបស់ព្រះជាម្ចាស់ដែលទ្រង់បានហៅយុវជនម្នាក់ៗតាមបទពិសោធន៍រៀងៗខ្លួន។
ចំណែក យុវជន ចាន់ វិជ្ជា វ័យ២០ឆ្នាំ មកពីព្រះសហគមន៍សន្តយ៉ូហានសៀមរាប នៃភូមិភាគបាត់ដំបង បាននិយាយថា ទិវានៃការត្រាស់ហៅគឺល្អសម្រាប់លោកដោយសារបានដាស់តឿនលោកជាច្រើនជាមួយនឹងការថ្វាយខ្លួនទៅលើព្រះជាម្ចាស់ ទោះលោកមិនបានថ្វាយខ្លួនជាអ្នកបួស ជាលោកបូជាចារ្យ ប៉ុន្តែអាចក្លាយខ្លួនជាអ្នកបម្រើក្នុងព្រះសហគមន៍ ជាគ្រីស្តបរិស័ទមួយដ៍ល្អផងដែរ។
ជាមួយគ្នានេះ យុវជនវ័យ២៥ ឆ្នាំ ម៉ៅ សឿម មកពីព្រះសហគមន៍ភ្នំពេញថ្មីនៃភូមិភាគភ្នំពេញបានផ្ញើសារខ្លីដល់យុវជន យុវនារីថា ៖ «សូមកុំខ្លាចជាមួយនឹងការឆ្លើយតបព្រះហឬទ័យរបស់ព្រះជាម្ចាស់ សម្រាប់ជីវិតផ្ទាល់ខ្លួនម្នាក់ៗ ហើយត្រូវចាំថាព្រះជាម្ចាស់គង់នៅជាមួយ ព្រះជាម្ចាស់ ជាព្រះបិតាដែលពោរពេញដោយសេចក្ដីស្រលាញ់ ដែលទ្រង់បានបង្កើតមនុស្សលោកឱ្យមានចិត្តតស៊ូ ការលះបង់ ការហ៊ានបូជា មានវិន័យក្នុងខ្លួន និងចេះស្ដាប់បង្គាប់»៕
