លុតជង្គង់នៅមុខអាសនៈក្នុងព្រះវិហារ យុវជន១៣នាក់បានប្រកាសពាក្យសន្យារបស់ខ្លួន ដោយ «យកព្រះគ្រីស្ត ព្រះបន្ទូលនិងព្រះសហគមន៍ជាទីពឹង» ចំពោះមុខព្រះសហគមន៍ ដែលមានលោកអភិបាលអូលីវីយ៉េ ជ្មីតហស្លេជាអធិបតី នាថ្ងៃទី៧ ឧសភា ២០២៣ នៅព្រះវិហារព្រះកុមារយេស៊ូបឹងទំពុននារាជធានីភ្នំពេញ។
«ខ្ញុំយល់ថាព្រះគ្រីស្តជាព្រះសង្គ្រោះដែលធ្វើឱ្យខ្ញុំអាចផ្ញើជីវិតទាំងស្រុងលើព្រះអង្គ។ ព្រះបន្ទូល អាចឱ្យខ្ញុំសិក្សាឈ្វេងយល់បន្ថែមដើម្បីដឹកនាំជីវិតរបស់ខ្ញុំ។» នេះជាការលើកឡើងរបស់ សិលា កាំប្រែ ខាវី ក្នុងវ័យ១៩ឆ្នាំ បេក្ខជនដែលមានដើមកំណើតជាជនជាតិភាគតិចព្នងនៅខេត្តរតនគិរី។
ខាវី ឲ្យដឹងទៀតថា ព្រះសហគមន៍ ជាទីពឹងរបស់គាត់ ហើយគ្រប់កិច្ចការនិងក្នុងជីវិតរស់នៅប្រចាំថ្ងៃ ទាំងជំនឿ និងទាំងការរៀនសូត្រ គាត់ទទួលបានដោយក្ដីស្រឡាញ់ ហើយធ្វើឱ្យជីវិតរបស់គាត់មានអំណរសប្បាយ ហើយឲ្យគាត់យល់ឃើញថា ព្រះបន្ទូលជាសេចក្ដីពិត និងជាអ្វីដែលកើតមាននៅក្នុងជីវិតសព្វថ្ងៃ។
លោកអភិបាលអូលីវីយ៉េ មានប្រសាសន៍ទៅកាន់បេក្ខជនទាំង១៣នាក់ ឲ្យជ្រើសរើសដើរតាមពន្លឺ ជាមាគ៌ារបស់ព្រះជាម្ចាស់ បន្តដើរតាមមាគ៌ាព្រះយេស៊ូជានិច្ច និងស្ដាប់ព្រះសូរសៀងរបស់ព្រះអង្គដោយរស់នៅឱ្យសមជាមនុស្សមានពន្លឺនៅក្នុងខ្លួន ហើយពឹងលើព្រះប្រាជ្ញាញាណរបស់ព្រះអង្គ។
លោកអភិបាលបន្ថែមថា ជាគ្រីស្តបរិស័ទ គឺត្រូវផ្ញើខ្លួនទាំងស្រុងទៅលើព្រះគ្រីស្ត ដោយផ្ញើជីវិតទៅព្រះយេស៊ូជារៀងរាល់ថ្ងៃ ដោយអានគម្ពីរដែលនាំឲ្យជីវិតមានពន្លឺថ្មី។
លោកបានស្នើសុំឲ្យ ព្រះសហគមន៍ដែលជាគ្រីស្តបរិស័ទ ជាថ្មដ៏មានជីវិត សូមថែរក្សាបងប្អូនថ្មីៗដើម្បីធ្វើដំណើររួមគ្នា និងធ្វើដំណើរជាមួយព្រះយេស៊ូដើម្បីរកឃើញព្រះយេស៊ូដែលជាផ្លូវនៃជីវិត។
ជាសិស្សថ្នាក់ទី១០នៃវិទ្យាល័យចម្រើនផល គង់ បញ្ញាសោភ័ណ អាយុ១៦ឆ្នាំ បានឱ្យដឹងថា ការគូសសញ្ញាឈើឆ្កាង ជាសញ្ញាសម្គាល់នៃសេចក្ដីស្រឡាញ់របស់ព្រះយេស៊ូរហូតដល់គេឆ្កាងព្រះអង្គ។
សោភ័ណ ចាប់អារម្មណ៍ព្រះសហគមន៍តាមរយៈសកម្មភាពធម៌មេត្តាករុណានៅតាមសហគមន៍នានាតាំងពីគាត់រៀនថ្នាក់ទី៦។ គាត់ឲ្យដឹងថា «ពេលខ្ញុំមានអារម្មណ៍មិនល្អខ្ញុំអានព្រះគម្ពីរ«ចូរស្រឡាញ់ខ្មាំងសត្រូវ» បានដាស់តឿនសតិរបស់ខ្ញុំ» ដែលឲ្យគាត់អាចមានកំលាំងតស៊ូជម្នះអស្មិមានះរបស់ខ្លួន។
នៅក្នុងពិធីជំហានទី១នេះ លោកអភិបាលសួរបញ្ជាក់ដល់បេក្ខជនទាំង ១៣ ដែលក្នុងនោះមាន៨នាក់ជាស្ត្រី អំពីការសុខចិត្តរបស់ខ្លួនក្នុងការលះបង់មារសាតាំង និងរបៀ់បរស់នៅពីដើមដើម្បីដើរតាមព្រះយេស៊ូគ្រីស្ត។
បន្ទាប់ពីពាក្យសន្យា បងធម៌របស់បេក្ខជនបានគូសសញ្ញាឈើឆ្កាងលើត្រចៀក ដើម្បីស្ដាប់ព្រះសូរសៀងព្រះជាម្ចាស់ គូសលើភ្នែកដើម្បីសម្លឹងមើលព្រះជាម្ចាស់និងស្នាព្រះហស្តរបស់ព្រះអង្គ គូសលើមាត់ ដើម្បីឆ្លើយតបទៅព្រះជាម្ចាស់វិញ គូសលើទ្រូងដើម្បីដាក់ជំនឿ គូសលើស្មានិងលើបាតដៃដើម្បីបំពេញភារកិច្ចជាគ្រីស្តបរិស័ទ។
ចុងក្រោយលោកអភិលបានគូសសញ្ញាឈើឆ្កាងលើបេក្ខជនទាំងអស់ដើម្បីឱ្យបងប្អូនទាំងនោះមានជីវិតអស់កល្បជានិច្ចក្នុងព្រះនាមព្រះបិតាព្រះបុត្រានិងព្រះវិញ្ញាណដ៏វិសុទ្ធ៕
ដោយដាលីស
