មានប្រសាសន៍អរគុណដល់មនុស្សជាច្រើនដែលបានមកចូលរួមលើកទឹកចិត្ត ក្នុងពិធីតែងតាំងជាឧបដ្ឋាកក្នុងក្រុមគ្រួសារបព្វជិតសហជីវិនព្រះយេស៊ូ លោកប៉ូល ដូ ថាញ ង្វៀន ហៅសាន្ត បាននិយាយដោយអួលដើមករព្រោះមិននឹកស្មានថា មានមនុស្សចូលរួមច្រើនជាងការរំពឹងទុករបស់គាត់។
លោកសាន្ត ជាគ្រីស្តបរិស័ទតែម្នាក់គត់ ក្នុងចំណោមសមាជិកគ្រួសារដែលមានកូនចំនួន២នាក់ ហើយលោកជាកូនប្រុសតែម្នាក់គត់។ លោកបានស្គាល់ព្រះសហគមន៍ដោយក្រុមសហជីវិនព្រះយេស៊ូ ក្នុងឆ្នាំ១៩៩៩ ហើយមានចិត្តផ្លាស់ប្តូរជំនឿរបស់ខ្លួនក្នុងឆ្នាំ២០០២ និងចង់ចូលរួមប្រកាសដំណឹងល្អរបស់ព្រះជាម្ចាស់។
លោកបានខិតខំតស៊ូជំនះរាល់ទុក្ខលំបាកនានាក្នុងក្រុមគ្រួសារដោយសារការមិនពេញចិត្តរបស់ឪពុកម្តាយដែលមិនមានជំនឿលើកាតូលិក។ តែទោះជាយ៉ាងនេះក្តី នៅថ្ងៃទី១៩ ខែឧសភា ឆ្នាំ២០២៣នេះ លោកត្រូវបាន លោកអភិបាលព្រះសហគមន៍ភូមិភាគភ្នំពេញ អូលីវីយ៉េ ជ្មីតហស្លេ តែងតាំងជាឧបដ្ឋាកក្នុងក្រុមបព្វជិតសហជីវិនព្រះយេស៊ូ នៅព្រះសហគមន៍សន្តសិលានិងសន្តប៉ូល ភ្នំពេញថ្មី នារាជធានីភ្នំពេញ ដោយមានគ្រីស្តបរិស័ទចូលរួមជាង២០០នាក់។
ក្នុងសម្លៀកបំពាក់ជាឧបដ្ឋាក ប៉ូល ដូ ថាញ ង្វៀន ហៅសាន្ត បានឲ្យដឹងថា «សម្រាប់ខ្ញុំផ្ទាល់មានបំណងតែមួយគឺប្រកាសដំណឹងល្អនៅក្នុងប្រទេសកម្ពុជា និងនៅទីនេះ ខ្ញុំបានឃើញតាមរយៈរបៀបដែលយើងរស់នៅដោយបង្ហាញសេចក្ដីសុខសាន្តនៃវត្តមានរបស់ព្រះជាម្ចាស់នៅក្នុងដួងចិត្ត»។
លោកសាន្តចាកចេញពីប្រទេសវៀតណាម និងមកដល់ប្រទេសកម្ពុជាក្នុងឆ្នាំ២០១៤ ក្នុងនាមជានិស្សិតទេវវិទ្យាល័យ។ អំឡុងឆ្នាំ២០១៦ លោកត្រលប់ទៅវៀតណាមវិញដើម្បីរៀនទេវវិទ្យា ហើយ៦ឆ្នាំក្រោយមក លោកវិលមកកម្ពុជាវិញ ដោយបានរៀនភាសាខ្មែរបន្ថែម។
លោកបន្តថា ក្នុងនាមជាឧបដ្ខាក លោកត្រូវអធិដ្ឋាននិងធ្វើកិច្ចការជារបៀបគ្រីស្តទូត ហើយអ្វីដែលសំខាន់គឺ បម្រើអាសនៈ បម្រើព្រះសហគមន៍ ជាពិសេសប្រកាសដំណឹងល្អដោយប្រកាសអំពីព្រះបន្ទូលរបស់ព្រះជាម្ចាស់ជាការងារទីមួយពិតប្រាកដ។
«អគ្គសញ្ញាតែងតាំងឧបដ្ឋាកនេះមានន័យថាព្រះជាម្ចាស់ទទួលស្វាគមន៍ ដោយស្រឡាញ់ហើយរួមរស់ជាមួយនឹងព្រះយេស៊ូ ដែលនាំឱ្យស្នាមរបួស នៅក្នុងដួងចិត្តបានជាសះស្បើយ ប្រែក្លាយជាអំណរសប្បាយ»។ នេះជាប្រសាសន៍ក្នុងធម្មទេសនារបស់លោកអភិបាលព្រះសហគមន៍ភូមិភាគបាត់ដំបង អេនរីគេ (គីគេ)ហ្វីការេដូ នៃក្រុមគ្រួសារសហជីវិនព្រះយេស៊ូ។
លោកអភិបាលអេនរីគេ បន្តថា ការស្វាគមន៍ដោយសេចក្ដីស្រឡាញ់រួមជាមួយព្រះយេស៊ូ គឺចូលក្នុងអាថ៌កំបាំងនៃបុណ្យចម្លង ដោយបម្រើតាមមាគ៌ាព្រះយេស៊ូគឺ ត្រូវបម្រើព្រះសហគមន៍និងបងប្អូនឯទៀតៗដោយដាក់ខ្លួន ដោយការបន្ទាបខ្លួននិងមានរបៀបសុភាពរាបសារ។ លោកអភិបាលគីគេបញ្ជាក់ទៅកាន់ ឧបដ្ឋាកថ្មី ឱ្យតស៊ូនិងចេះទ្រាំ ឱ្យបង្ហាញសេចក្ដីស្រឡាញ់ពីព្រះជាម្ចាស់ ដោយយកគំរូតាមព្រះយេស៊ូ។
អគ្គសញ្ញាតែងតាំងជាឧបដ្ឋាក ពិធីមួយដែលឈានទៅរកមុខងារជាបូជាចារ្យកាតូលិក។ លោកសាន្តបានប្រកាសពាក្យសន្យារបស់គាត់ ដោយសុខចិត្តទទួលអគ្គសញ្ញានេះ ដើម្បីបម្រើព្រះសហគមន៍ សុខចិត្តបំពេញមុខងារប្រកបដោយចិត្តមេត្តាករុណានិងភាពសាមញ្ញដើម្បីជួយនិងស្តាប់បង្គាប់អភិបាលព្រះសហគមន៍ និងសហការជាមួយអស់លោកបូជាចារ្យ និងបម្រើគ្រីស្តបរិស័ទ។
លោកឧបដ្ឋាក ប៉ូលដូ ថាញ ង្វៀន ហៅសាន្ត ប្រសូតនៅ១៦ វិច្ឆិកា ១៩៧៥ នាទីក្រុងហាណូយ ប្រទេសវៀតណាម ក្នុងគ្រួសារគ្រូបង្រៀន និងទាហានផ្នែកវិស្វករ។ លោកជាស្ថាបត្យករមួយរូបផងដែរ។
ក្នុងឆ្នាំ២០២២ដល់បច្ចុប្បន្ន លោកសាន្ត បង្រៀនអប់រំជំនឿនៅព្រះសហគមន៍កំពង់ស្ពឺ និងកំពុងទទួលខុសត្រូវនៅមណ្ឌលរួម នៅទួលពង្ររ ជាកន្លែងទទួលបង្រៀននិងទំនាក់ទំនងជាមួយកម្មកររោងចក្រ ដោយរស់នៅជាមួយគ្នា និងបង្ហាញសេចក្ដីសុខដល់គ្នា៕
ដោយដាលីស
