«ព្រះវិញ្ញាណដ៏វិសុទ្ធជាដង្ហើមចូលទៅក្នុងដួងចិត្តរបស់យើង ដើម្បីឱ្យយើងរស់នៅជាគ្រីស្តបរិស័ទ ហើយ ជាការអស្ចារ្យដែលយើងទទួលដោយមានកម្លាំងប្រកាស និងធ្វើជាសាក្សីអំពីសេចក្ដីពិតនៅក្នុងសង្គមបច្ចុប្បន្ននេះ ដោយមានសេចក្ដីអង់អាច ដឹងខុសដឹងត្រូវ និងស្គាល់សេចក្ដីពិត។» នេះជាប្រសាសន៍របស់លោកអភិបាល អូលីវីយ៉េ នៅក្នុងធម្មទេសនានៅថ្ងៃបុណ្យព្រះវិញ្ញាណយាងមក។
ក្នុងធម្មទេសនាដដែលនេះលោកអភិបាលបានក្រើនរំឭកទៅកាន់គ្រីស្តបរិស័ទទាំងអស់ ឱ្យអរព្រះគុណព្រះជាម្ចាស់ដែលប្រទានព្រះវិញ្ញាណដ៏វិសុទ្ធ និងណែនាំឱ្យគ្រីស្តបរិស័ទរិះគិតពិចារណាអំពីអត្ថន័យនៃជីវិតជាគ្រីស្តបរិស័ទ។
មានប្រសាសន៍ទៅកាន់ បេក្ខជនចំនួន៥៥នាក់ ដែលបានត្រៀមខ្លួនទទួលអគ្គសញ្ញាលាបថ្ងាសពីលោកនៅក្នុងព្រះវិហារសន្តយ៉ូសែបផ្សារតូច នារាជធានីភ្នំពេញថ្ងៃនេះ លោកអភិបាលនិយាយថា ជីវិតរបស់យើងរកឃើញសេចក្ដីសុខសាន្ត គឺនៅពេលមានព្រះយេស៊ូ។
លោកបន្តថា សេចក្ដីសុខសាន្តដែលយើងទទួលពីព្រះជាម្ចាស់ គឺព្រះវិញ្ញាណដ៏វិសុទ្ធដែលយើងទទួលណែនាំឱ្យយើងឈ្នះគ្រប់អារម្មណ៍ គ្រប់កាលៈទេសៈដែលយើងជួបដោយចូលយ៉ាងជ្រៅដើម្បីឱ្យយើងស្ងប់ស្ងាត់នៅក្នុងដួងចិត្តគ្រប់ពេលវេលា។
លោកអភិបាលស្នើដល់បេក្ខជន «ពេលដែលយើងទទួលអគ្គសញ្ញាលាបថ្ងាសដែលជាការទទួលព្រះវិញ្ញាណដ៏វិសុទ្ធរួចហើយ សូមចាប់ផ្ដើមនៅក្នុងថ្ងៃនេះដោយមានទំនាក់ទំនងជាមួយព្រះគ្រីស្ត ទាំងពេលភ្ញាក់ពីគេង មុនចូលគេង និងគ្រប់កាលៈទេសៈទាំងអស់»។
ជាមួយគ្នានេះដែរលោកបន្តដោយផ្ដល់នូវអនុសាសន៍ថា នៅពេលយើងបង្កើតទំនាក់ទំនងជាមួយព្រះយេស៊ូហើយអនុវត្តនៅក្នុងជីវិតរបស់យើង គឺត្រូវយកចិត្តទុកដាក់ស្រឡាញ់ ដោយទទួលជីវិត និង មានជីវិតផ្ទាល់ខុសពីជីវិតបងប្អូនឯទៀតៗនៅក្នុងសង្គមបច្ចុប្បន្ន ដោយលះបង់ចោលជីវិតផ្ទាល់ខ្លួននិងអាត្មានិយមនិងចិត្តចង្អៀតចង្អល់ បូជា តស៊ូ អធិដ្ឋាននិងយកចិត្តទុកដាក់ជាមួយព្រះជាម្ចាស់ជាប្រចាំ និងលីឈើឆ្កាងរបស់ខ្លួនជារៀងរាល់ថ្ងៃ ដោយដើរតាមព្រះយេស៊ូដូចព្រះនាងម៉ារី។
បេក្ខជនទាំង៥៥នាក់នេះ មកពីព្រះសហគមន៍មណ្ឌលសកម្មភាពភ្នំពេញខាងជើង ព្រះសហគមន៍និយាយភាសាអង់គ្លេស ព្រះសហគមន៍និយាយភាសាបារាំង និងព្រះសហគមន៍និយាយភាសាកូរ៉េ។ ពួកគាត់បានប្រកាសជំនឿរបស់ខ្លួន និងសុខចិត្តលះបង់ចោលចិត្តលោភលន់ចិត្តខឹងចិត្តមារ ដើម្បីរួចផុតពីអំណាចនៃកិលេសតណ្ហាមុននឹងអគ្គសញ្ញាលាបថ្ងាសពីលោកអភិបាល។
ក្នុងសំលៀកបំពាក់ចងក្បិននិងពានាកន្សែងពណ៌ក្រហម ម៉ារី ចាន់ ស្រីគីម វ័យ១៦ឆ្នាំ រៀបរាប់ថា នាងសប្បាយចិត្តដោយបានទទួលអគ្គសញ្ញាលាបថ្ងាសធ្វើជាគ្រីស្តបរិស័ទមួយដ៏ពេញលក្ខណៈ។
ស្រីគីម បន្តថា ក្រោយពេលទទួលអគ្គសញ្ញាលាបថ្ងាស នាងនឹងធ្វើជាសាក្សីអំពីព្រះជាម្ចាស់ ដោយរស់នៅក្នុងជំនឿ មកព្រះវិហារទៀងទាត់ និងបង្ហាញអត្តសញ្ញាណខ្លួនជាគ្រីស្តបរិស័ទ និងអធិដ្ឋានដល់មនុស្សរស់និងស្លាប់ ហើយនាងនឹងចូលរួមក្រុមនៅក្នុងព្រះសហគមន៍ ដើម្បីប្រកាសដំណឹងល្អបន្ថែម។
យុវតី ហាណ្ណា ដេវ ទេវី វ័យ១៦ឆ្នាំ ឲ្យដឹងថា កន្លងមកគាត់ប្រកាសដំណឹងល្អតាមរយៈការចែករំលែកនូវបទពិសោធជំនឿ និងសេចក្ដីស្រឡាញ់តាមរបៀបរស់នៅផ្ទាល់ខ្លួន ជាមួយអ្នកដែលមិនដែលស្គាល់ព្រះជាម្ចាស់ ជាពិសេសអធិដ្ឋានដល់មនុស្សទាំងអស់ទាំងអ្នកដែលគាត់ចូលចិត្តនិងស្អប់ផងដែរ។
អូហ្គូស្ទីន ឃឹម សំខាន់ វ័យ៣០ឆ្នាំជាបេក្ខជនម្នាក់ទៀត និយាយថា កម្មវិធីថ្ងៃនេះ ធ្វើឱ្យអារម្មណ៍ខ្ញុំរឹងមាំជាងមុន ដោយមានភាពក្លាហាន ព្រោះដឹងថា មានព្រះវិញ្ញាណគង់ជាមួយ។
ក្រោយពេលទទួលអគ្គសញ្ញាថ្ងៃនេះ «ខ្ញុំនឹងធ្វើជាសាក្សីនៃសេចក្ដីពិតដោយមានចិត្តអត់ធ្មត់ ផ្សព្វផ្សាយដំណឹងល្អអំពីសាសនារបស់ខ្លួនតាមរយៈការធ្វើទង្វើល្អនៅក្នុងជីវិតរស់នៅ និងតាមរយៈការងារប្រចាំថ្ងៃដែលជាអ្នករចនាសៀវភៅនៅមជ្ឃមណ្ឌលអប់រំជំនឿសន្ត អ៊ឺរ៉ាណេ។»
លោកអភិបាលអូលីវីយ៉េបានឲ្យដឹងទៀតថា នៅថ្ងៃអាទិត្យក្រោយៗមកទៀតនឹងមានជិត១០០នាក់ និងជាង១០០នាក់តៗទៀត ដែលកំពុងត្រៀមខ្លួនទទួលអគ្គសញ្ញាលាបថ្ងាសក្នុងភូមិភាគភ្នំពេញក្នុងឆ្នាំនេះ៕
ដោយដាលីស
