«នៅពេលដែលយើងទទួលព្រះកាយ សូមឱ្យយើងនឹកថាជាលើកទីមួយដែលយើងទទួលព្រះកាយព្រះគ្រីស្តនៅក្នុងជីវិត ដែលជាព្រះកាយតែមួយ និងជាថ្ងៃចុងក្រោយដែលយើងទទួលព្រះកាយព្រះគ្រីស្ត។» នេះជាប្រសាសន៍របស់លោកអភិបាលព្រះសហគមន៍ភូមិភាគភ្នំពេញក្នុងឱកាសបុណ្យគោរពព្រះកាយនិងព្រះលោហិតព្រះគ្រីស្ត នាថ្ងៃទី១១ មិថុនានៅព្រះវិហារព្រះកុមារយេស៊ូបឹងទំពុននាររាជធានីភ្នំពេញ។
លោកអភិបាលអូលីវីយ៉េ ជ្មីតហស្លេបន្ថែមថា ធ្វើយ៉ាងនេះ គឺដើម្បីឲ្យយើងខិតខំរស់នៅអស់ពីសេចក្ដីស្រឡាញ់ និងធ្វើជាសាវ័ករបស់ព្រះយេស៊ូគ្រីស្ត។
ក្នុងថ្ងៃនោះដែរ លោកអភិបាលព្រះសហគមន៍បានផ្ដល់អគ្គសញ្ញាលាបថ្ងាសដល់បេក្ខជន១៦នាក់ និង១៣នាក់ផ្សេងទៀតទទួលអគ្គសញ្ញាព្រះកាយព្រះគ្រីស្តលើកដំបូង។
លោកអភិបាលអូលីវីយ៉េមានប្រសាសន៍ថា ព្រះកាយព្រះគ្រីស្តនាំឲ្យយើង ក្លាយជាគ្រួសារតែមួយដែលមានព្រះយេស៊ូជាសិរសា យើងអាចនិយាយគ្នាទៅវិញទៅមក យល់ចិត្តគ្នា និងលើកលែងទោសឱ្យគ្នាទៅវិញទៅមក ទោះបីជាពិភពលោក សង្គម និងគ្រួសាររបស់យើងបាក់បែកគ្នាក៏ដោយ។
លោកបន្ថែមថា យើងរស់នៅក្នុងសង្គមសម្ភារនិយមខ្លាំងពិតមែន ប៉ុន្តែព្រះកាយនាំឱ្យយើងចិញ្ចឹមជីវិតពោរពេញដោយសុភមង្គលដ៏ពិតប្រាកដ ខុសពីម្ហូបអាហាររាល់ថ្ងៃដែលនាំឱ្យយើងមានជំងឺផ្សេងៗ និងបានជួយយើងឲ្យរកឃើញការសង្គ្រោះ។
សង្គមបច្ចុប្បន្នមានការស្អប់គ្នានិងមានសង្គ្រាម ប៉ុន្តែព្រះអំណោយទាននៃព្រះវិញ្ញាណដ៏វិសុទ្ធជួយយើងកសាងពិភពថ្មីដ៏ពិតប្រាកដចាកឆ្ងាយអំពីការស្អប់និងអំពើហិង្សា។
ព្រះកាយព្រះគ្រីស្តដែលយើងទទួលទាន គឺនឹងនាំយើងឲ្យមានសង្ឃឹម និងមានជីវិតអស់កល្បជានិច្ច។
ម៉ារី វិន ពិសី ទទួលអគ្គសញ្ញាលាបថ្ងាសនៅថ្ងៃនេះ ឲ្យដឹងថា «ព្រះវិញ្ញាណដល់វិសុទ្ធបានជួយលើកទឹកចិត្តខ្ញុំ ឱ្យមានទំនុកចិត្តក្នុងជំនឿកាន់តែរឹងមាំ និងជួយណែនាំខ្ញុំឱ្យប្រកាសដំណឹងល្អទៅកាន់អ្នកដទៃ… ហើយចេះប្រកាសថា ខ្ញុំជាគ្រីស្តបរិស័ទ ជាកូនរបស់ព្រះជាម្ចាស់ និងព្រះជាម្ចាស់ស្រឡាញ់ខ្ញុំហើយខ្ញុំក៏ស្រឡាញ់ព្រះអង្គ»។
ពិសីដែលពេលនេះ កំពុងបម្រើក្នុងក្រុមចម្រៀងបាននិយាយទៀតថា នាងនឹងប្រាប់មិត្តភក្ដិដែលជាពុទ្ធិបរិស័ទឱ្យពួកគេយល់ថា ព្រះជាម្ចាស់ស្រឡាញ់មនុស្សគ្រប់គ្នានិងអ្នកណាក៏អាចក្លាយជាកូនរបស់ព្រះអង្គបាន។
«ខ្ញុំអធិដ្ឋានរាល់យប់ និងមកព្រះវិហារឱ្យបានរាល់អាទិត្យដើម្បីបង្ហាញថា ខ្ញុំជាគ្រីស្តបរិស័ទ។» នេះជាការបញ្ជាក់របស់យ៉ូសែប វិន ឡេង អាយុ១៤ ឆ្នាំ។
វិនឡេង ក៏ដូចជាយុវតីខាងលើដែរ ដែលរស់នៅក្នុងសង្គមដែលមានទំនាក់ទំនងភាគច្រើនជាមួយពុទ្ធបរិស័ទដែលជាមិត្តរួមថ្នាក់របសខ្លួន។
ឡេងបន្តថា «ខ្ញុំគិតថាព្រះវិញ្ញាណដ៏វិសុទ្ធអស្ចារ្យ អាចធ្វើឱ្យខ្ញុំមានភាពក្លាហានទៅប្រកាសដំណឹងល្អដល់មិត្តភក្កិរបស់ខ្ញុំនៅសាលារៀនដែលជាពុទ្ធបរិស័ទ»។
វេងវឿន ស៊ីម៉ូនករុណា វ័យ ១២ ឆ្នាំ សព្វថ្ងៃជាសមាជិកក្រុមចម្រៀងនិងបម្រើអាសនៈ បានឲ្យដឹងថា គាត់នឹងធ្វើយ៉ាងណាដើម្បីឱ្យមានការប្រាស្រ័យទាក់ទងគ្នាជាមួយក្រុម ជាលក្ខណៈបងប្អូនតែមួយ។
ស៊ីម៉ូនករុណា បន្ថែមថា «យើងក៏អាចអធិដ្ឋានឱ្យគ្នាទៅវិញទៅមកដើម្បីផ្ដល់សេចក្ដីសុខឱ្យគ្នា និងចែករំលែកអំពីអ្វីដែលយើងមានទៅកាន់អ្នកដទៃទៀត ដើម្បីឱ្យពួកគេអាចយកបទពិសោធពីយើងទៅអនុវត្តនៅក្នុងជីវិតរបស់ពួកគេ។»
យុវ័នរូបនេះបន្ថែមថា ប្រសិនបើមានពេលគាត់នឹងចូលរួមអប់រំជំនឿដើម្បីឱ្យព្រះសហគមន៍មានជីវិតបន្តទៅមុខយ៉ាងរលូន។
ដោយសួន ស្រីហួច ដាលីស
