កុមារគ្រីស្តបរិស័ទជិត១០០នាក់ ដែលមានអាយុចន្លោះពី១១ដល់១៧ឆ្នាំមកពីព្រះសហគមន៍ចំនួន៨ ក្នុងមណ្ឌលសកម្មភាពភ្នំពេញខាងជើង ចូលរួមបោះជំរំក្រោមប្រធានបទ «ជាអ្នក ជាខ្ញុំ ជាយើង» ដើម្បីស្គាល់ខ្លួនឯង ពង្រឹងទំនាក់ទំនងជាមួយព្រះជាម្ចាស់ក៏ដូចជាមនុស្សជុំវិញ និងមានអំណរសប្បាយរួមគ្នាក្នុងឱកាសវិស្សមកាល។
កម្មវិធីនេះប្រព្រឹត្តទៅនៅព្រះវិហារសន្តយ៉ូសែបផ្សារតូចនារាជធានីភ្នំពេញ ណែនាំដោយក្រុមយុវជនកាតូលិកមណ្ឌលសកម្មភាពភ្នំពេញខាងជើង នាថ្ងៃទៅ៣១ ខែសីហា ដល់ថ្ងៃទី៣ ខែកញ្ញា។
ដូចគ្នាផងដែរ លោកប៉ូល រ៉ាវី សុភារ៉ុង ជាសមាជិកគណៈកម្មការសម្របសម្រួលនិងជាប្រធានក្រុមពិធីករក្នុងកម្មវិធីបោះជំរំកុមារនេះ និយាយថា កម្មវិធីនេះ គឺឲ្យកុមារស្គាល់ពីអត្ថន័យនិងទំនាក់ទំនងរវាង«អ្នក» គឺរវាងព្រះជាម្ចាស់និងកុមារផ្ទាល់ និង «ខ្ញុំ និងយើង» ដើម្បីឱ្យកុមារយល់ពីខ្លួនឯងជានរណា និងមានតួនាទីអ្វីនិងគួរប្រព្រឹត្តខ្លួនបែបណាខ្លះ។
លោកឧបដ្ឋាក ថៃ រតនៈ (ប៊ុនលី) អ្នករៀបចំកម្មវិធីនិងជាវាគ្មិនបានឲ្យដឹងថា ការស្គាល់ខ្លួនឯងសំខាន់ មិនថានៅក្នុងផ្ទះ ក្នុងព្រះសហគមន៍ និងនៅក្នុងសង្គម គឺឲ្យកុមារយល់ពីតួនាទីរបស់ខ្លួនតាមកន្លែងនីមួយៗ។
លោកបញ្ជាក់ថា «ប្រសិនបើយើងមិនស្គាល់ខ្លួនឯងនាំឱ្យវង្វេង មិនមានជីវិតប្រសើរទេ ព្រោះពិភពលោកផ្លាស់ប្ដូររហូត មានអ្នកលេងហ្គេមច្រើន គាត់អាចនឹងតាមគេ»។
កុមារទាំងអស់នោះមកពីព្រះសហគមន៍ ផ្សារតូច អរិយក្សត្រ ពោធិ៍ធំ ក្ដីកណ្ដាល ព្រែកតាទែន កំពង់ហ្លួង សែនសុខ និងស្វាយប៉ាក។
យុវ័ន អន់តូនី ប៊ុត សុខ ចំរើន ក្នុងវ័យ១៦ឆ្នាំមកពីព្រះសហគមន៍ផ្សារតូច បានចូលរួមកម្មវិធីបោះជំរំកុមារនេះ ចំនួន៩លើកមកហើយ។ ចំរើនយល់ឃើញថា កម្មវិធីបោះជំរំនេះ បានជួយឲ្យគាត់និងមិត្តភក្តិបានរៀននិងស្គាល់ពីព្រះសហគមន៍និងស្គាល់គ្នាទៅវិញទៅមកនិងចេះស្រឡាញ់គ្នា ទោះទៅដល់ព្រះសហគមន៍ណា ក៏ពួកគាត់មានទំនាក់ទំនងស្រួលជាមួយគ្នា។
ក្នុងកម្មវិធីប៉ុន្មានថ្ងៃនេះ ចំរើន ចាប់អារម្មណ៍លើ ប្រធានបទជាខ្ញុំ ដោយនិយាយថា «នៅផ្ទះខ្ញុំជាក្មេងដែលស្ដាប់បង្គាប់ឪពុកម្ដាយ ហើយជាក្មេងដែលជួយបម្រើព្រះសហគមន៍ដើម្បីបាននៅជិតព្រះជាម្ចាស់។ ចំពោះសង្គមខ្ញុំត្រូវចេះជួយអ្នកដទៃតាមដែលអាចជួយបាន ដូចជាបើឃើញមិត្តភក្ដិវាយគ្នា ខ្ញុំជួយណែនាំជាដើម»។
កុមារីអាកាតា លីម សៀវយ៉ាន ក្នុងវ័យ១៤ឆ្នាំ បានឲ្យដឹងដែរថា ការប្រើប្រាស់ពាក្យរាជ្យសព្ទ ធ្វើឲ្យគាត់ហាក់ដូចជានៅឆ្ងាយពីព្រះជាម្ចាស់។ សៀវយ៉ាន បញ្ជាក់ថា «ពេលខ្ញុំហៅព្រះអង្គថា«អ្នក» ខ្ញុំមានអារម្មណ៍ថាជិតស្និទ្ធនឹងព្រះជាម្ចាស់ដូចជាមិត្តភក្កិ ដូចជាគ្រួសារ ដូចជាឪពុក ហើយងាយស្រួលក្នុងការនិយាយជាមួយព្រះជាម្ចាស់ ខុសពីមុន ហាក់ដូចជាខ្ពស់ពេកសម្រាប់ខ្ញុំ»។
នេះជាលើកទីបីហើយដែលកុមារីរូបនេះចូលរួម ហើយនាងប្រាប់ទៀតថា កម្មវិធីនេះមានទាំងរៀនផងនិងលេងល្បែងកំសាន្តផង ហើយរបៀបរៀបចំគឺខុសគ្នាពីមួយឆ្នាំទៅមួយឆ្នាំ។
សៀវយ៉ានបន្ថែមថា កម្មវិធីនេះធ្វើឲ្យនាងក្លាហានជាងមុន មានបទពិសោធថ្មីៗអំពីល្បែងកំសាន្ត «ប្រសិនបើមានឱកាសដើម្បីដឹកនាំក្រុម ខ្ញុំនឹងយកបទពិសោធនេះ ដើម្បីឱ្យកូនក្រុមអាចស្ដាប់ខ្ញុំបាន ចេះមើលថែក្រុមផងដែរ»។
ជារៀងរាល់មួយឆ្នាំម្តង ព្រះសហគមន៍មណ្ឌលសកម្មភាពភ្នំពេញខាងជើង តែងតែរៀបចំកម្មវិធីបោះជំរំកុមារដែលមានអាយុចាប់ពី១១ឆ្នាំដល់១៧ឆ្នាំ ដើម្បីជាឱកាសអប់រំជំនឿ និងឲ្យពួកគាត់បានជុំគ្នាលែងកំសាន្តនិងស្គាល់គ្នាទៅវិញទៅមកក្នុងពេលវិស្សមកាល៕
ដោយសួន ស្រីហួច ដាលីស
