បេក្ខជនចំនួន១៩នាក់បានសុំចូលព្រះសហគមន៍ (ជំហានទី១) នៅព្រះវិហារសន្តីម៉ារីញញឹមចំការទៀងក្នុងមណ្ឌលសកម្មភាពតាកែវ កាលពីថ្ងៃទី៣ ខែកញ្ញាកន្លងទៅក្រោមអធីបតីភាពរបស់លោកអភិបាល អូលីវីយ៉េ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញ រួមជាមួយគ្រីស្តបរិស័ទចូលរួមប្រមាណជា៥០នាក់។
តាមកម្មវិធីអប់រំជំនឿរបស់ព្រះសហគមន៍កាតូលិកកម្ពុជា ពិធីជំហានទី១គឺជាជំហានដំបូង ដើម្បីឲ្យអ្នកឈ្វេងយល់ជំនឿប្រកាសអំពីគោលបំណងរបស់ខ្លួន និងសុំចូលរួមជាមួយព្រះសហគមន៍កាតូលិក ដោយប្រកាសដោយផ្ទាល់ខ្លួនថា «ខ្ញុំសូមយកព្រះគ្រីស្តជាទីពឹង ខ្ញុំយកព្រះបន្ទូលជាទីពឹង ខ្ញុំយកព្រះសហគមន៍ជាទីពឹង»។
លោកអភិបាល អូលីវីយ៉េ មានប្រសាសន៍ក្នុងធម្មទេសនាថា កាយវិការបស់បេក្ខជនម្នាក់ៗ ដែលបានលុតជង្គង់នៅមុខឈើឆ្កាងនិងប្រកាសពាក្យសន្យារបស់ខ្លួន ណែនាំឱ្យយើងនឹកឃើញអំពីជីវិតរបស់យើងជាគ្រីស្តបរិស័ទ ដែលត្រូវផ្ដល់សក្ខីភាពគ្រប់ពេលវេលា នៅក្នុងការងារ នៅក្នុងជីវិតគ្រួសារ ជីវិតនយោបាយ ជីវិតដែលយើងរស់នៅសព្វថ្ងៃ។
លោកបានណែនាំឲ្យគ្រីស្តបរិស័ទដែលមានជំនឿយូរហើយ ជួយណែនាំបន្តជំនឿ ឲ្យបេក្ខជនទាំងអស់នៅថ្ងៃនេះយកចិត្តទុកដាក់អធិដ្ឋាននៅស្ងៀមស្ងាត់ជាមួយព្រះជាម្ចាស់ យកពេលវេលានៅក្បែរព្រះកាយព្រះគ្រីស្ត និងយកពេលវេលានៅក្បែរព្រះនាងម៉ារី។
លោកអភិបាលបន្តទៀតថា ពីមួយឆ្នាំទៅមួយឆ្នាំមានអ្នកសុំចូលព្រះសហគមន៍កាតូលិក ចំនួន៥០-៦០នាក់។ ហើយក្នុងសប្តាហ៍នេះ មានបេក្ខជនចំនួន៩០នាក់ដែលសុំចូលព្រះសហគមន៍ក្នុងមណ្ឌលសកម្មភាពតាកែវ។
លោកអភិបាលសង្កត់ធ្ងន់ថា គឺត្រូវឲ្យប្អូនៗយល់ថា «ពិតមែនខ្ញុំមានទីពឹងថ្មី នៅក្នុងជីវិតធម្មតា ដោយដឹងថាឥឡូវនេះ យើងជាមិត្តសម្លាញ់របស់ព្រះជាម្ចាស់ យើងទាំងអស់ជាមិត្តសម្លាញ់របស់ព្រះជាម្ចាស់ យើងទាំងអស់ជាក្រុមគ្រួសាររបស់ព្រះជាម្ចាស់ដែលជាព្រះបិតា»។
អូលីវីយ៉េ ឆេង វិសាល ក្នុងវ័យ២៣ ឲ្យដឹងថា «ខ្ញុំបានឈ្វេងយល់ជំនឿរយៈពេល២ឆ្នាំមកហើយ ដោយសារមានចិត្តស្រឡាញ់លើព្រះគ្រីស្ត និងចង់ចូលរួមក្នុងព្រះសហគមន៍»។
វិសាល ជាបុគ្គលិកនៃការិយាល័យសិល្បៈរបស់ព្រះសហគមន៍បានបន្តថា ដោយមើលឃើញអំពីសកម្មភាពរបស់ព្រះសហគមន៍ ដូចជាការជួយសង្គ្រោះ ការជួយអ្នកក្រីក្រ អ្នកជំងឺ និងសកម្មភាពផ្សេងៗមានទាំងការងារសិល្បៈ ជាមួយយុវជន ជំទង់និងកុមារ ធ្វើឲ្យគាត់ចាប់អារម្មណ៍ចង់ស្គាល់ព្រះយេស៊ូ។
ជាមួយគ្នានេះ វេរ៉ូនីកា ណារី សព្វថ្ងៃរៀនថ្នាក់ទី៦ នៅសាលបឋមសិក្សាសន្តហ្រ្វង់ស័រក្នុងភូមិចំការទៀងនិយាយថា បានជានាងសុំចូលព្រះសហគមន៍(ជំហានទី)ដោយសារចង់ស្គាល់ព្រះគ្រីស្ត ចង់ដើរតាមព្រះយេស៊ូ និងចង់ក្លាយជាគ្រីស្តបរិស័ទ។
នាងបន្តថា ឪពុកម្តាយមិនបានរារាំងឬស្ដីបន្ទោសឱ្យនាងឡើយ តែបែរជាជំរុញនិងលើកទឹកចិត្តឱ្យនាងខិតខំថែរក្សាសេចក្ដីស្រលាញ់ចំពោះព្រះសហគមន៍ និងចូលរួមសកម្មភាពជាមួយព្រះសហគមន៍ឱ្យកាន់តែសកម្មជាងនេះទៀត។
កុមារីរូបនេះ បានបញ្ជាក់ថា នាងនឹងខិតខំថែរក្សាសេចក្ដីស្រលាញ់ ដោយយកព្រះគ្រីស្តជាទីពឹង យកព្រះបន្ទូលជាទីពឹង យកព្រះសហគមន៍ជាទីពឹង នឹងព្យាយាមសិក្សាឈ្វេងយល់បន្ថែមទៀតអំពីជំនឿ។
លោក កុល ជាង ជាគ្រូអប់រំជំនឿនិងជាប្រធានព្រះសហគមន៍សន្តីម៉ារីញញឹមចំការទៀង មានប្រសាសន៍ថា ដោយមើលឃើញសកម្មភាពយ៉ាងសកម្មរបស់បេក្ខជនទាំង១៩នាក់ ជាមួយនឹងការចូលរួមថ្វាយអភិបូជា សកម្មភាពសង្គហៈ សកម្មភាពយុវជន ការអប់រំជំនឿប្រចាំសប្ដាហ៍ ព្រះសហគមន៍ បានសម្រេចឱ្យបេក្ខជនទាំងអស់ធ្វើពិធីសុំចូលព្រះសហគមន៍(ជំហានទី១)។
តាមការបញ្ជាក់របស់លោក កុល ជាង បានឱ្យដឹងថា បេក្ខជនទាំង១៩នាក់ មកពីព្រះសហគមន៍ចំនួន២ គឺ ព្រះសហគមន៍សន្តីម៉ារីញញឹមចំការទៀង និងព្រះសហគមន៍ត្រពាំងក្រញូង។ មណ្ឌលកម្មភាពនេះ មានព្រះសហគមន៍ចំនួន៨ គឺចំការទៀង គីរីវង់ ព្រៃកប្បាស សន្តប៉ូល បាទី កំពង់អំពិល ត្រពាំងគ្រញូង និងក្រុងតាកែវ៕
ដោយចាន់ ម៉ានុត
