នៅក្នុងអភិបូជាលើកដំបូងនៅព្រះវិហារសន្តីម៉ារី តួតាំង នៃមណ្ឌលសកម្មភាព មេគង្គដែលជាទីកន្លែងកំណើត លោកបូជាចារ្យ យ៉ូហាន បាទីស្ត វី សំណាង ឲ្យដឹងថា«ខ្លួនខ្ញុំលែងជាកម្មសិទ្ធខ្លួនខ្ញុំទៀតហើយ រាល់ពាក្យសម្ដី កាយវិការ ដៃជើងអ្វីៗទាំងអស់ជារបស់ព្រះគ្រីស្ត។»
ក្នុងធម្មទេសនានារសៀលថ្ងៃទី២៤ ខែកញ្ញា លោកបូជាចារ្យថ្មី មានប្រសាសន៍ទៀតថា ដូច្នេះលោកជាឧបករណ៍របស់ព្រះជាម្ចាស់ ជាឧបករណ៍នៃធម៌មេត្តាករុណារបស់ព្រះជាម្ចាស់។ លោកបានអធិដ្ឋានសូមឲ្យអ្វីដែលលោកធ្វើ គឺដើម្បីលើកតម្កើងព្រះគ្រីស្ត និងឱ្យគ្រីស្តបរិសមើលឃើញវត្តមានព្រះអង្គក្នុងរូបកាយរបស់គាត់ជាបូជាចារ្យដែរ។
លោកបូជាចារ្យថ្មី បានថ្វាយអភិបូជាលើកដំបូងនេះអមដោយលោកអភិបាលអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ និងមានគ្រីស្តបរិស័ទចូលរួមច្រើនកុះករផងដែរ។
លោកបូជាចារ្យថ្មីស្នើសុំឲ្យគ្រីស្តបរិស័ទបន្តអធិដ្ឋានសម្រាប់គាត់ ដើម្បីឱ្យគាត់ក្លាយជាអំបិលសម្រាប់ពិភពលោកអស់កល្បជានិច្ច។
ជាមួយគ្នានេះលោកសំណាង បានរំលឹកដល់គ្រីស្តបរិស័ទឲ្យអធិដ្ឋានជានិច្ចទោះក្នុងកិច្ចការតូចធំក្តី គឺសូមព្រះវិញ្ញាណដ៏វិសុទ្ធបំភ្លឺ ដើម្បីឱ្យយើងអាចជ្រើសរើសអ្វីមួយស្របតាមព្រះហឫទ័យរបស់ព្រះជាម្ចាស់។
ក្នុងឱកាសនោះលោកអភិបាល អូលីវីយ៉េ សូមអរគុណដល់ឪពុកម្តាយរបស់លោកបូជាចារ្យវីសំណាង ដែលបានថែរក្សាកូន និងអនុញ្ញាតឱ្យចូលទេវវិទ្យាល័យ ដើម្បីក្លាយជាបូជាចារ្យនៅថ្ងៃនេះ។
លោកបូជាចារ្យ យ៉ូហានបាទីស្ត វី សំណាង ទទួលអគ្គសញ្ញាតែងតាំងជាបូជាចារ្យ នៅថ្ងៃទី២៣ ខែកញ្ញា ឆ្នាំ២០២៣ និងត្រូវចាត់ដោយលោកអភិបាលទៅបំពេញបេសកកម្មនៅមណ្ឌលសកម្មភាពភ្នំពេញខាងជើងក្នុងខែ មករា ឆ្នាំ២០២៤។ បច្ចុប្បន្នលោកនៅបម្រើការងារនៅព្រះវិហារ ព្រះកុមារយេស៊ូបឹងទំពុន៕
ដោយ ចាន់ម៉ានុត
