នៅក្នុងអភិបូជាលើកដំបូង លោកបូជាចារ្យថ្មី យ៉ូហានបាទីស្ទ វី សំណាង និយាយទៅកាន់គ្រីស្តបរិស័ទថា «ការធ្វើសង្គហ: និងយុត្តិធម៌ត្រូវតែធ្វើដំណើរគ្នាជាមួយនឹងមេត្តាករុណាផងដែរ។»
លោកមានប្រសាសន៍នេះនៅព្រះវិហារព្រះកុមារយេស៊ូបឹងទំពុន នារាជធានីភ្នំពេញ ក្នុងពិធីអភិបូជាលើកដំបូងរបស់លោកនាថ្ងៃទី២៤ ខែកញ្ញាកន្លងទៅ។
លោកបន្ថែមទៀតថា សូមឱ្យយើងនៅទីនេះមានចិត្តមេត្តាករុណាដូចព្រះជាម្ចាស់ ដោយគ្រប់ពេលវេលាយើងថ្លឹងថ្លែងពិចារណា ដោយឱ្យព្រះវិញ្ញាណដ៏វិសុទ្ធបំភ្លឺនូវកិច្ចការដែលយើងធ្វើ។
នៅក្នុងឱកាសអភិបូជាលើកដំបូងនេះដែរ អ្នកស្រី ភោគ សុម៉ានី គ្រីស្តបរិស័ទនៅព្រះវិហារព្រះកុមារយេស៊ូរៀបរាប់ថា ក្នុងនាមជាគ្រីស្តបរិស័ទ យើងត្រូវទទួលពាក្យ «សមធម៌» ឱ្យបានច្រើនជាង«សមភាព»។
អ្នកស្រីជាអ្នកសម្របសម្រួលក្នុងសាលាអប់រំពិសេសសម្រាប់ការលូតលាស់ ដែលផ្តោតសំខាន់សម្រាប់កុមារអូទីសឹមបន្ថែមថា ពាក្យថាសមធម៌នេះសំខាន់មែនទែន ដើម្បីឱ្យកុមារដែលកំពុងមានបញ្ហាអូទីសឹម បានទទួលនូវអ្វីដែលសង្គមជាច្រើនបដិសេធពួកគាត់ និង«ជាពាក្យមួយលើកទឹកចិត្តខ្ញុំឱ្យបន្តធ្វើការជាមួយក្មេងពិសេសទាំងនោះ»។
ក្នុងនាមជាបូជាចារ្យថ្មីមួយរូប លោកវីសំណាងសូមគ្រីស្តបរិស័ទអធិដ្ឋានសម្រាប់គាត់ ដើម្បីឲ្យគាត់អាចរស់នៅក្នុងអគ្គសញ្ញាតែងតាំងអស់មួយជីវិត។
លោកបូជាចារ្យថ្មី វី សំណាង បានទទួលអគ្គសញ្ញាតែងតាំងជាបូជាចារ្យពីលោកអភិបាលអូលីវីយ៉េ ជ្មីតហស្លេរ អភិបាលព្រះសហគមន៍ភូមិភាគភ្នំពេញ រួមជាមួយលោកបូជាចារ្យថ្មីពីអង្គទៀតគឺលោកបូជាចារ្យ ថៃ រតនៈ(ប៊ុនលី) និងលោកបូជាចារ្យ វិន កាន់ នាថ្ងៃទី២៣ កញ្ញា ២០២៣នេះ នៅមជ្ឃមណ្ឌលភ្នំពេញថ្មី។ លោកបូជាចារ្យថ្មី ត្រូវបានលោកអភិបាលព្រះសហគមន៍ចាត់ឱ្យទៅបំពេញបេសកកម្មប្រកាសដំណឹងល្អជាផ្លូវការណ៍នៅមណ្ឌលសកម្មភាពភ្នំពេញខាងជើង ដែលមានព្រះសហគមន៍ អរិយក្សត្រ ពោធិ៍ធំ និងក្ដីកណ្ដាល និងជាជំនួយការរដ្ឋបាលនៃការិយាល័យលោកអភិបាល ដោយគិតចាប់ពីថ្ងៃទី១ មករា ២០២៤នេះតទៅ៕
ដោយដាលីស
