លោកបូចារ្យប៉ូល វិនកាន់ និងលោកបូជាចារ្យអន់តូនី ថៃរតនៈ (ប៊ុនលី) បានថ្វាយអភិបូជាលើកដំបូងរួមជាមួយលោកអភិបាលអូលីវីយ៉េ ជ្មីតហស្លេ នៃភូមិភាគភ្នំពេញ នៅព្រះវិហារសន្តហ្វ្រង់ស្វ័រ សាវីយ៉េ ចំប៉ា នៃមណ្ឌលសកម្មភាពមេគង្គ កាលពីថ្ងៃទី២៤ខែកញ្ញា មានគ្រីស្តបរិស័ទចូលរួមយ៉ាងច្រើនកុះករ។
ប៉ូល វិនកាន់ មានប្រសាសន៍ថា «នៅថ្ងៃនេះខ្ញុំមានអំណរសប្បាយដែលបានមកភូមិស្រុកកំណើតដើម្បីថ្វាយអភិបូជាជាលើកដំបូង ដើម្បីអរព្រះគុណព្រះជាម្ចាស់សម្រាប់ការត្រាស់ហៅ និងទី២អរគុណព្រះសហគមន៍ ពុកម៉ែបងប្អូនដែលតែងតែគាំទ្រតាមរយៈការអធិដ្ឋាន និងតាមមធ្យោបាយផ្សេងៗ។ នេះជាកម្លាំងនឹងជាអំណរសប្បាយសម្រាប់ខ្ញុំយ៉ាងពិតប្រាកដ»។
ក្នុងធម្មទេសនា លោកបូជាចារ្យ ប៉ូល វិន កាន់ មានប្រសាសន៍ថា យើងជាគ្រីស្តបរិស័ទ យើងបានទទួលការងារមួយពីព្រះជាម្ចាស់ដូចៗគ្នា ទោះបីយើងមានមុខងារនៅក្នុងសង្គមឬក៏មានការងារមួយក្នុងព្រះសហគមន៍ យើងទាំងអស់គ្នាធ្វើការសម្រាប់ព្រះជាម្ចាស់និងឱ្យយើងមានចិត្តសប្បុរសដូចម្ចាស់ចំការនៅក្នុងព្រះគម្ពីរថ្ងៃនេះ។
«ដូច្នេះការងារដែលយើងធ្វើ តួនាទីដែលយើងធ្វើគឺតម្រង់ឆ្ពោះទៅរកព្រះជាម្ចាស់ណែនាំឱ្យយើងមានចិត្តល្អ ឱ្យយើងមានចិត្តមេត្តាករុណាដែរ»។ លោកបូជាចារ្យបញ្ជាក់។
លោកបន្ថែមថា«សម្រាប់ខ្ញុំ ខ្ញុំទទួលមុខងារជាបូជាចារ្យបម្រើព្រះជាម្ចាស់ ដូច្នេះខ្ញុំមិនអាចនិយាយថា ខ្ញុំពូកែ ខ្ញុំល្អជាងគេ ឬក៍ខ្ញុំចេះជាងគេ ឆ្លាតជាងគេ គឺអត់ទេដោយសារមានរឿងរ៉ាវផ្សេងៗទៀតជាច្រើនដែលខ្ញុំអត់យល់ ដែលខ្ញុំអត់ដឹងនឹងខ្ញុំក៏មិនអាចធ្វើបានដែរ ដូច្នេះខ្ញុំត្រូវការបងប្អូនទាំងអស់ចូលរួមជួយជាមួយខ្ញុំដែរ»។
លោកអន់តូនី ថៃ រតនៈមានប្រសាសន៍ដែរថា ការថ្វាយអភិបូជាលើកដំបូងនេះ ជាព្រះអំណោយទានដែលព្រះជាម្ចាស់ប្រទានឲ្យលោក បានកាន់ព្រះកាយ និងព្រះលោហិតព្រះគ្រីស្ត ហើយនេះជាបទពិសោធន៍ថ្មីមួយ។
លោកបន្តថា«ខ្ញុំមានអំណរសប្បាយ មានចិត្តសប្បាយរីករាយយ៉ាងខ្លាំង និងសូមព្រះជាម្ចាស់ប្រទានពរដល់ប្រជារាស្ត្ររបស់ព្រះអង្គនិងសម្រាប់ខ្ញុំដែរ ដើម្បីឱ្យខ្ញុំបានបន្តបេសកកម្មរបស់ព្រះអង្គ តាមរយៈការប្រារព្ធអភិបូជាប្រចាំថ្ងៃ ជាប្រយោជន៍សម្រាប់បងប្អូនគ្រីស្តបរិស័ទទាំងអស់តាមរយៈខាងផ្លូវវិញ្ញាណ។»
ជាមួយគ្នានេះ លោកអភិបាល អូលីវីយ៉េ ជ្មីតហស្លេ អភិបាលនៃព្រះសហគមន៍កាតូលិកភូមិភាគភ្នំពេញ ស្នើសុំគ្រីស្តបរិស័ទក្នុងមណ្ឌលសកម្មភាពមេគង្គបន្តអធិដ្ឋានសម្រាប់លោកបូជាចារ្យថ្មី ដើម្បីបន្តនឹងបម្រើព្រះជាម្ចាស់ បម្រើព្រះសហគមន៍អស់មួយជីវិតដែលពោរពេញដោយកម្លាំង និងអធិដ្ឋានសម្រាប់យុវជនជំនាន់ក្រោយទៀតដើម្បីចូលរួមក្នុងក្រុមអ្នកបួស។
លោកប៉ូល វិន កាន់ និងលោក អន់តូនី ថៃ រតនៈ(ប៊ុនលី) ត្រូវបានតែងតាំងជាបូជាចារ្យកាលពីថ្ងៃទី២៣ ខែកញ្ញាកន្លងទៅ។ លោកអភិបាលអូលិវីយ៉េ បានចាត់លោកទាំងពីរឲ្យទៅបំពេញបេសកកម្ម គឺលោកអន់តូនី ថៃ រតនៈ ត្រូវទៅបំពេញបេសកម្មនៅមណ្ឌលសកម្មភាពកំពត និង លោក ប៉ូល វិនកាន់ ត្រូវទៅបំពេញបេសកម្មនៅមណ្ឌលសកម្មភាពតាកែវ៕
ដោយចាន់ ម៉ានុត
