ក្នុងឱកាសបុណ្យរំលឹកសន្តហ្វ្រង់ស៊ីស្កូអាស៊ីស៊ីកាលពីថ្ងៃទី៤ ខែតុលានេះលោកអភិបាលបានដាស់តឿនឱ្យពិចារណាអំពី គម្រោងការរបស់ព្រះយេស៊ូដែលមានសម្រាប់ជីវិតគ្រីស្តបរិស័ទ តាមរយៈបទពិសោធជីវិតនៃជំនឿរបស់សន្តហ្វ្រង់ស៊ីស្កូ។
សន្តហ្រ្វង់ស៊ីស្កូ មានវត្តមាននៅក្នុងពិភពលោកនេះក្នុងឆ្នាំ១២០០ ត្រូវនឹង ៨០០ឆ្នាំមុនគឺ លោកមានទស្សនៈបង្កើតពិភពថ្មីតាមព្រះហឫទ័យរបស់ព្រះជាម្ចាស់ ដោយណែនាំឱ្យមនុស្សមានរបៀបរស់នៅថ្មីក្នុងសង្គម ដើម្បីទទួលព្រះរាជ្យរបស់ព្រះជាម្ចាស់ដែលជិតមកដល់។
ថ្លែងក្នុងធម្មទេសនា នៅព្រះវិហារសន្តយ៉ូសែប ទួលក្រសាំង លោកអភិបាលអូលីវីយ៉េ ជ្មីតហស្លេ ណែនាំឲ្យគ្រីស្តបរិស័ទ យកគំរូសន្តហ្វ្រង់ស៊ីស្កូចំនួន៦ចំណុចសំខាន់ៗគឺ ទី១ ត្រូវចេះស្តាប់ព្រះយេស៊ូដោយអធិដ្ឋាននៅមុខឈើឆ្កាងព្រះយេស៊ូដែលអាចរកឃើញវត្តមានរបស់ព្រះជាម្ចាស់នៅក្នុងដួងចិត្តរបស់ខ្លួន។ ទី២ ត្រូវដាក់ចិត្តជាអ្នកក្រខ្សត់ទើបមានសុភមង្គល ដូចសន្តហ្វ្រង់ស៊ីស្កូ ដែលយកភាពក្រីក្រធ្វើជាប្រពន្ធ រស់នៅជាមួយមនុស្សដែលគាត់ជួបនៅតាមផ្លូវ។ ទី៣ បង្កើតក្រុមដើម្បីសហការ និងជួយគ្នា ធ្វើដំណើរជាមួយគ្នា ក្នុងព្រះហឫទ័យស្រឡាញ់របស់ព្រះជាម្ចាស់។ ទី៤ ត្រូវមានចិត្តប្រណីសន្តោស មេត្តាករុណាដោយបម្រើអ្នកជំងឺ អ្នកតូចតាចក្រីក្រក្នុងសង្គម ជាពិសេសអ្នកដែលគេបោះបង់ចោលនិងសង្គមមិនរាប់រកជាដើម។ ទី៥ ត្រូវចេះស្រឡាញ់ស្នាព្រះហស្តរបស់ព្រះជាម្ចាស់នៅលើផែនដី ដោយគោរពនិងថែរក្សា។ និងទី៦ ចេះទំនាក់ទំនងជាមួយអ្នកមានសាសនាផ្សេងៗដោយចិត្តស្រឡាញ់ បម្រើ និងកសាងសុខសន្តិភាព ដោយចេះយល់ចិត្តគ្នាទៅវិញទៅមកនឹងធ្វើឱ្យសង្គមមានសេចក្ដីសុខ។
នៅព្រះវិហារសន្តយ៉ូសែប ក្នុងភូមិទួលក្រសាំង សង្កាត់រកាខ្ពស់ ក្រុងតាខ្មៅ បច្ចុប្បន្ន មានក្រុមគ្រួសារសន្តហ្វ្រង់ស៊ីស្កូអាស៊ីស៊ី កំពុងបម្រើការងារនៅតំបន់នោះ ដោយមានកម្មវិធីអប់រំជំនឿ និងវិស័យអប់រំចំណេះទូទៅ។ ក្រុមគ្រួសារនេះ បានចូលមកបម្រើព្រះសហគមន៍ប្រទេសកម្ពុជាចាប់ពីឆ្នាំ២០១០ ដោយមានសមាជិក៧នាក់ ក្នុងនោះមានលោកបូជាចារ្យ១នាក់ ឧបដ្ឋាក១នាក់ និងបងប្រុស៥នាក់។
តេរេសា ងួន ចរិយា ជាគ្រីស្តបរិស័ទក្នុងតំបន់បានឱ្យដឹងថា វត្តមានរបស់ក្រុមសន្តហ្វ្រង់ស៊ីស្កូនៅកម្ពុជានេះ ជាពិសេសក្នុងភូមិរបស់គាត់ បានបង្កើតឲ្យមានសាលាមត្តេយ្យ សាលាបឋមសម្រាប់កុមារក្នុងភូមិ កសាងអាគារព្រះវិហារ។
ចរិយាបន្ថែមថា ក្រុមសន្តហ្វ្រង់ស៊ីស្កូជួយបង្រៀនយុវជនឲ្យចេះ ភ្លេង ចម្រៀងនិងណែនាំយុវជនឲ្យចេះស្រឡាញ់ដទៃ និងបង្កើតសកម្មភាពសប្បុរសធម៌នានា។
«ពួកគាត់បានផ្ដល់ឱកាសឱ្យពួកខ្ញុំបានចូលរួមជួយអ្នកក្រីក្រនៅក្នុងភូមិ ក៏ដូចជាក្មេងៗនិងចាស់ជរាផងដែរ»៕
ដោយដាលីស
