កាលពីថ្ងៃទី២៣ ដល់ថ្ងៃទី២៥ ខែវិច្ឆិកា ឆ្នាំ២០២៣ យុវជនប្រមាណជា១០០នាក់ដែលមកពី៩មណ្ឌលសកម្មភាពក្នុងភូមិភាគភ្នំពេញ បានចូលរួម កម្មវិធីបោះជំរុំសម្រាប់ការត្រាស់ហៅដែលរៀបចំឡើងដោយ គណៈកម្មការដើម្បីការត្រាស់ហៅ ក្រោមប្រធានបទ «ពេលវេលានៅជាមួយព្រះយេស៊ូ» នៅរមណីយដ្ឋាន ឋានសួគ៌ធម្មជាតិភ្នំវល្លិ៍ ស្ថិតនៅក្នុងខេត្តកែប។
កម្មវិធីនេះមានការអញ្ជើញចូលរួមដោយលោកអភិបាល អូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ លោកបូជាចារ្យជាច្រើនអង្គ ក្រុមបព្វជិត-ជិតា ជាច្រើនផងដែរ។
បើតាមប្រសាសន៍របស់លោកបូជាចារ្យ វី សំណាង ជាគណៈកម្មការកម្មវិធីការត្រាស់ហៅនេះបានឱ្យដឹងថា ទិសដៅសំខាន់នៃកិច្ចបោះជំរំនេះ គឺជួយតម្រង់ទិសដល់ យុវជន យុវនារីដែលមានបំណងចង់ដឹងនិងឈ្វេងយល់អំពីការត្រាស់ហៅក្នុងជីវិតរបស់ខ្លួន និងរបៀបថ្វាយខ្លួនទៅព្រះជាម្ចាស់។
លោកបូជាចារ្យសំណាង បន្ថែមថា នៅក្នុងកម្មវិធីនេះ យុវជនទាំងអស់មានឱកាសនៅជាមួយព្រះយេស៊ូ និងព្រះជាម្ចាស់ ដោយស្តាប់សំឡេងរបស់ព្រះអង្គក្នុងដួងចិត្ត ដែលជាសញ្ញាមួយនៃការត្រាស់ហៅរបស់ព្រះជាម្ចាស់ថា តើព្រះអង្គចង់ឱ្យពួកគាត់ធ្វើអ្វី។
នៅថ្ងៃបើកកម្មវិធី លោកអភិបាលអូលីវីយ៉េ បានអប់រំណែនាំដល់យុវជន យុវនារី ចេះរកឃើញវត្តមានព្រះយេស៊ូក្នុងជីវិតរស់នៅប្រចាំថ្ងៃ ដោយលោកបានលើកឡើងមាគ៌ា៩ចំណុច។
ក្នុងនោះរួមមាន ជឿហើយដឹងថាព្រះយេស៊ូគង់នៅក្នុងចិត្ត មើលជុំវិញខ្លួនដោយភ្នែកនៃជំនឿ ពិចារណានិងត្រួតពិនិត្យជីវិតផ្ទាល់ខ្លួនដោយមានចិត្តអរព្រះគុណព្រះជាម្ចាស់ជារៀងរាល់ថ្ងៃ ប្រើពាក្យអធិដ្ឋានខ្លីៗដើម្បីទំនាក់ទំនងជាមួយព្រះជាម្ចាស់ យកពេលវេលាដើម្បីនមស្ការព្រះកាយព្រះគ្រីស្តនិងស្មិងស្មាធិ៍ អធិដ្ឋានទាំងព្រឹកទាំងល្ងាច ត្រូវមានផ្គាំឬឈើឆ្កាងក្នុងកាបូបជានិច្ច យកពេលវេលាដើម្បីសម្លឹងមើលពិភពលោកនិងមនុស្សដែលព្រះជាម្ចាស់បានបង្កើត និងត្រូវមានចិត្តមេត្តាករុណាចំពោះបងប្អូនឯទៀតៗជាពិសេសអ្នកតូចតាច។
លោកអភិបាលបានមានប្រសាសន៍ថា ចំណុចទាំង៩នេះ ទោះបីជាមិនអាចរកឃើញព្រះយេស៊ូផ្ទាល់នឹងភ្នែក តែវាជាមាគ៌ាមួយឲ្យយើងដឹងថា ជីវិតរបស់យើងភ្ជាប់នឹងវត្តមានរបស់ព្រះជាម្ចាស់ ហើយក្នុងជំនឿរបស់យើង យើងដឹងថាព្រះយេស៊ូមានព្រះជន្មគង់នៅ និងធ្វើដំណើរជាមួយយើងជាប្រចាំថ្ងៃ។
លោកបន្តថា ក្នុងនាមជាយុវជនកាតូលិក ត្រូវបើកត្រចៀក បើកភ្នែក បើកបេះដូង ដើម្បីស្ដាប់លឺ មើលឃើញនឹងទទួលស្គាល់ការត្រាស់ហៅរបស់ព្រះជាម្ចាស់ដើម្បីទៅជាលោកបូជាចារ្យ ទៅជាដូនជី ឬទៅជាគ្រីស្តបរិស័ទដែលបម្រើព្រះសហគមន៍អស់ពីកម្លាំងកាយ និងកម្លាំងចិត្ត។
យុវ័ន ម៉ុន ណែត អាយុ១៧ឆ្នាំ មកពីព្រះសហគមន៍សន្តយ៉ូសែបផ្សារតូច នារាជធានីភ្នំពេញបាននិយាយថា កម្មវិធីនេះ បានឲ្យគាត់ចូលរួមយ៉ាងជិតស្និទ្ធជាមួយព្រះជាម្ចាស់កាន់តែខ្លាំងជាងមុន និងបានឲ្យគាត់រកឃើញការត្រាស់ហៅរបស់ព្រះជាម្ចាស់ចំពោះគាត់។
ការចូលរួមលើកទី២នេះ ម៉ុន ណែត ឲ្យដឹងថា គាត់ចង់ធ្វើជាគ្រីស្តបរិស័ទម្នាក់ដែល ជួយកិច្ចការព្រះសហគមន៍ ជួយអ្នកដទៃ និងបម្រើព្រះសហគមន៍អស់មួយជីវិត តែមិនមែនជាបូជាចារ្យនោះទេ។
យុវតី ស្រស់ ចន្ថា អាយុ២០ឆ្នាំ មកពីព្រះសហគមន៍ព្រះកុមារយេស៊ូបឹងទំពុននារាជធានីភ្នំពេញ បាននិយាយថា ក្នុងរយៈពេល៣ថ្ងៃដែលនាងបានមកចូលរួមការត្រាស់ហៅនៅទីនេះ ធ្វើឱ្យនាងមានអំណរសប្បាយរីករាយ ហើយមានអារម្មណ៍កាន់តែច្បាស់សម្រាប់ជីវិតរបស់ខ្លួនថា ព្រះជាម្ចាស់ពិតជាត្រាស់ហៅនាងឱ្យក្លាយជាអ្នកបួស។ ចន្ថានឹងបន្តរិះគិតបន្ថែមទៀតអំពីរឿងនេះ។
ក្នុងកម្មវិធីរយៈពេលបីថ្ងៃនេះ យុវជនបានទទួលចំណេះដឹងអប់រំខាងផ្លូវវិញ្ញាណ របៀបអធិដ្ឋានជាក្រុមនិងផ្ទាល់ខ្លួន ស្តាប់ការចែករំលែកបទពិសោធរបស់ក្រុមបព្វជិត-ជិតាអំពីការត្រាស់ហៅរបស់ព្រះជាម្ចាស់។
ដូនជី ផេង ស្រីមុំ មកពីក្រុមគ្រួសារព្រះនាងម៉ារីជាទីពំនឹងពំនាក់និងជាសមាជិកគណៈកម្មការរៀបចំកម្មវិធីនេះរំពឹងថា កម្មវិធីនេះ នឹងជួយឱ្យយុវជនមានកម្លាំងឆ្លើយតបនូវការត្រាស់ហៅរបស់ព្រះជាម្ចាស់ ទោះបីជាជំហានដំបូងឬជួបឧបសគ្គអ្វីក៏ដោយ ពីព្រោះនេះជាចំណុចដែលព្រះជាម្ចាស់ដាក់នៅក្នុងយុវជន ដែលមានបំណងបម្រើព្រះសហគមន៍របស់ព្រះអង្គ។
យោងតាមប្រសាសន៍របស់លោកបូជាចារ្យ វី សំណាង បានឱ្យដឹងដែរថា បន្ទាប់ពីកម្មវិធីបោះជំរុំសម្រាប់ការត្រាស់ហៅបានបញ្ចប់ទៅដោយយ៉ាងរលូន គឺមានយុវ័នចំនួន១៧នាក់បានចុះឈ្មោះចូលក្រុមអេម៉ាណូអែល និងយុវតីចំនួន៩នាក់បានចុះឈ្មោះចូលក្រុមសាមូអែល។ ក្រុមទាំងពីនេះ ជាក្រុមរិះគិតជាទៀងទាត់នូវជីវិតនៃការត្រាស់ហៅរបស់ព្រះជាម្ចាស់ជាអ្នកបួស៕
ដោយចាន់ ម៉ានុត
