ក្នុងអាទិត្យទី២នៃរដូវរង់ចាំនេះ លោកអភិបាលភូមិភាគភ្នំពេញ សុំឱ្យគ្រីស្តបរិស័ទរៀបចំខ្លួន ដូចការដ្ឋានផ្លូវថ្នល់ ដែលត្រូវកាយដីមិនល្អចេញ ហើយត្រូវបំពេញដោយថ្មគ្រឹះ។ ក្នុងនោះគឺគ្រីស្តបរិស័ទត្រូវកាយចេញនូវអំពើបាប និងទម្លាប់អាក្រក់ក្នុងខ្លួន ហើយត្រូវចាក់បញ្ចូលនូវព្រះបន្ទូលព្រះជាម្ចាស់ និងអគ្គសញ្ញាផ្សេងៗចូលក្នុងដួងចិត្តជំនួសវិញ។
ថ្លែងក្នុងធម្មទេសនានាថ្ងៃទី១០ ខែធ្នូ នៅព្រះវិហារ សន្តអូគូស្តាំង នៃខេត្តកំពត ដែលមានគ្រីស្តបរិស័ទប្រមាណ១០០នាក់មកពីព្រះសហគមន៍ចំនួន៥ ដែលស្ថិតក្នុងមណ្ឌលសកម្មភាពកំពត-កែប និងពីសាលាដុនបូស្កូចូលរួម លោកអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញមានប្រសាសន៍ថា ព្រះជាម្ចាស់ឱ្យយើងរៀបចំផ្លូវនៃជីវិតដើម្បីទទួលព្រះជាម្ចាស់។
មណ្ឌលសកម្មភាពកំពត-កែប មានព្រះសហគមន៍ដូចជា ព្រះវិហារសន្តអូគូស្តាំង ព្រះវិហារសន្តយ៉ូសែប(ជុំគិរី) ព្រះវិហារសន្តសិលា(ព្រែកប្រស់) ព្រះសហគមន៍ត្រពាំងរ៉ុន និងព្រះសហគមន៍សន្តប៉ូល (កោះស្លា)។
ក្នុងរដូវរង់ចាំនេះ យើងត្រូវឱ្យព្រះវិញ្ញាណនាំយើង ឱ្យស្គាល់អំណោយទាន៧របស់ព្រះជាម្ចាស់ដែលប្រៀបដូចជាទឹកដែលស្រោចលើផ្លូវកុំឱ្យហុយនិងមើលឃើញផ្លូវច្បាស់លាស់។ លោកអភិបាលបន្ថែម។
លោកអភិបាល សូមឱ្យគ្រីស្តបរិស័ទកែប្រែចិត្តគំនិត ស្ដាប់ព្រះបន្ទូលរបស់ព្រះជាម្ចាស់ មានទំនាក់ទំនងជាមួយព្រះយេស៊ូ និង ត្រូវចេះតស៊ូ ដាក់ខ្លួន និងស្រឡាញ់បងប្អូនឯទៀតៗ។
លោកអភិបាលបន្តថា «យើងត្រូវទំនាក់ទំនង ជាមួយព្រះយេស៊ូ ដើម្បីឱ្យយើងមានគ្រឹះរឹងមាំក្នុងជីវិតរបស់យើង»។
ក្នុងនោះដែរ លោកអភិបាលឱ្យគ្រីស្តបរិស័ទត្រូវ ចេះតស៊ូក្នុងជីវិតរបស់ខ្លួន ដាក់ខ្លួនដូចលោកយ៉ូហានបាទីស្ត ចេះទទួលខុសត្រូវតាមតួនាទីរបស់ខ្លួន ក្នុងនាមជា ឪពុកម្ដាយ កូន លោកបូជាចារ្យ និងបងស្រី ហើយក៏ត្រូវចេះស្រឡាញ់ និង ចែកសេចក្ដីស្រឡាញ់ និងបង្ហាញធម៌មេត្តាករុណារបស់ព្រះជាម្ចាស់ដើម្បីឱ្យផ្លូវជីវិតរបស់យើងក្លាយជាផ្លូវស្អាតបំផុត ដើម្បីទទួលព្រះយេស៊ូដែលនឹងយាងមក។
ក្នុងកម្មវិធីថ្ងៃនោះដែរ លោកអភិបាលអូលីវីយ៉េ បានធ្វើអគ្គសញ្ញាលាបថ្ងាសជូនដល់បេក្ខជនចំនួន៨រូបផងដែរ។
លោកមុំ សុភត្រា អាយុ២១ឆ្នាំ ជាបុគ្កលិកផ្នែកមូលនិធិកុមារដុនបូស្កូឲ្យដឹងថា ក្នុងនាមជាគ្រីស្តបរិស័ទលោកនឹងខិតខំប្រកាសដំណឹងល្អតាមរយៈកិច្ចការងាររបស់លោក ដោយជួយដល់អ្នកដទៃនិងកុមារខ្វះខាតនិងទទួលរងការបៀតបៀន។
អគ្គសញ្ញាលាបថ្ងាសធ្វើឲ្យព្រះអំណោយទានរបស់ព្រះជាម្ចាស់បានពេញលក្ខណៈ ដោយផ្តល់នូវព្រះវិញ្ញាណដ៏វិសុទ្ធដើម្បីឲ្យគ្រីស្តបរិស័ទចាក់ឫសយ៉ាងជ្រៅក្នុងពូជពង្សជាបុត្រធីតារបស់ព្រះជាម្ចាស់ ហើយរួមជាមួយព្រះគ្រីស្តយ៉ាងស្និទ្ធស្នាល និងចូលរួមក្នុងបេសកកម្មរបស់ព្រះសហគមន៍ច្រើនជាងមុន ផ្តល់សក្ខីភាពអំពីជំនឿតាមរយៈពាក្យសម្ដីនិងកិច្ចការនានា (គោល១៣១៦)។ អគ្គសញ្ញានេះអាចទទួលតែម្តងប៉ុណ្ណោះក្នុងមួយជីវិត៕
ដោយកែវ កញ្ញា
