កាលពីថ្ងៃទី០៨ ខែធ្នូ កន្លងទៅ ជាថ្ងៃបុណ្យគោរពព្រះនាងម៉ារីឥតជំពាក់បាប លោកអភិបាលព្រះសហគមន៍ភូមិភាគភ្នំពេញ សុំឱ្យយើងអរព្រះគុណព្រះជាម្ចាស់នឹងចូលនៅក្នុងគម្រោងការណ៍របស់ព្រះជាម្ចាស់ដែលបានគ្រោងទុកសម្រាប់យើងរៀងៗខ្លួន។
ថ្លែងក្នុងធម្មទេសនានៅព្រះវិហារសន្តយ៉ូសែបផ្សារតូច នារាជធានីភ្នំពេញ ដែលមានគ្រីស្តបរិស័ទចូលរួមប្រមាណជាង១០០នាក់ លោកអភិបាលអូលីវីយ៉េ ជ្មីតហស្លេ មានប្រសាសន៍ថា ព្រះជាម្ចាស់បានជ្រើសរើសយើងមុនបង្កើតពិភពលោក ព្រះជាម្ចាស់បានជ្រើសរើសយើងឱ្យទៅមនុស្សដ៏វិសុទ្ធ ព្រះជាម្ចាស់បានជ្រើសរើសយើងឱ្យទៅជាបុត្រធីតារបស់ព្រះអង្គ និងព្រះជាម្ចាស់បានញែកយើងដោយឡែក ដើម្បីឱ្យយើងកោតសរសើរសិរីរុងរឿងរបស់ព្រះជាម្ចាស់។
«មិនមែនតែព្រះនាងម៉ារី មិនមែនតែមនុស្សខ្លះៗដែលព្រះជាម្ចាស់បានជ្រើសរើស ដើម្បីទៅជាសន្តសន្តី ប៉ុន្តែព្រះជាម្ចាស់បានជ្រើសរើសដើម្បីភ្ជាប់ព្រះហឫទ័យរបស់ព្រះអង្គ ដើម្បីឱ្យយើងពោរពេញដោយសុភមង្គល» លោកអភិបាលបញ្ជាក់។
លោកបន្ថែមថា ក្នុងរដូវរង់ចាំនេះ យើងត្រូវសម្រេចចិត្ត អំពីផ្លូវដែលយើងចង់ដើរក្នុងព្រះសហគមន៍ យកគំរូតាមព្រះនាងម៉ារី ដើម្បីត្រៀមខ្លួនទទួលស្វាគមន៍ព្រះយេស៊ូ ដោយសម្អាតអំពើបាបពីខាងក្នុងដួងចិត្ត។
លោកអភិបាលក៏បានរំឭកឲ្យគ្រីស្តបរិស័ទចេះសម្រុះសម្រួលគ្នា និងអធិដ្ឋានទំនាក់ទំនងជាមួយព្រះជាម្ចាស់ផ្ទាល់ ឲ្យផ្ទះនៃដួងចិត្តបានស្អាតបំផុតដើម្បីទទួលព្រះយេស៊ូ ណែនាំឱ្យព្រះយេស៊ូមានផ្ទះកក់ក្ដៅ ពោរពេញដោយស្នាមញញឹមនិងកម្លាំងកាយ កម្លាំងចិត្ត។
ក្នុងកម្មវិធីនោះដែរ លោកអភិបាលអូលីវីយ៉េ បានធ្វើជាអធិបតី ប្រគល់មុខងារជូនគណៈកម្មការប្រចាំនៅព្រះសហគមន៍សន្តយ៉ូសែបផ្សារតូច ចំនួន១៨នាក់ ដែលមានអណត្តិ៣ឆ្នាំ។
ក្នុងនោះដែរលោកអភិបាលមានប្រសាសន៍ថា ទៅកាន់គណៈកម្មការនៅព្រះសហគមន៍ថា គណៈកម្មការមិនមែនក្រុមមួយដែលមានអំណាច មានឋានៈដើម្បីឱ្យគេគោរព ឱ្យគេធ្វើតាម ឬជាដៃស្ដាំដៃឆ្វេងរបស់លោកបូជាចារ្យនោះទេ។
លោកបន្ថែមថា សម្រាប់យើងជាគណៈកម្មការបម្រើព្រះសហគមន៍ យើងត្រូវមើលរបៀបព្រះនាងម៉ារី ដោយដឹងថាយើងជាអ្នកបម្រើតែប៉ុណ្ណឹង «ពិតមែនខ្ញុំជាអ្នកបម្រើរបស់ព្រះជាម្ចាស់» ហើយតាមរយៈគំរូរបស់ព្រះនាងម៉ារី គឺចូលរួមក្នុងអំណរសប្បាយនិងទុក្ខលំបាករហូតដល់នៅក្បែរឈើឆ្កាងពេលព្រះយេស៊ូសោយទិវង្គត។
លោកបន្តថា អ្នកបម្រើព្រះជាម្ចាស់នឹងទទួលរង្វាន់មួយពិសេសពីព្រះជាម្ចាស់ផ្ទាល់នៅថ្ងៃណាមួយ ព្រោះព្រះអង្គបានរៀបចំសម្រាប់យើងតាំងពីដើមរៀងមក៕
ដោយចាន់ម៉ានុត
