លោកអភិបាលអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ បានធ្វើពិធីចាត់តាំងលោកបូជាចារ្យ ហ្គូស្តាវ៉ូ បេនីតេស អាដ្រីយ៉ាន ជាអ្នកទទួលខុសត្រូវលើមណ្ឌលសកម្មភាពព្រះសីហនុ-កោះកុងជាផ្លូវការ កាលពីថ្ងៃទី១៧ ខែធ្នូ កន្លងទៅ នៅព្រះវិហារសន្តមីកាអែល ក្នុងខេត្តព្រះសីហនុ ដែលមានគ្រីស្តបរិស័ទចូលរួមយ៉ាងច្រើនកុះករ។
ក្នុងថ្ងៃផ្តល់មុខងារនេះ លោកអភិបាលអូលីវីយ៉េ មានប្រសាសន៍ថា លោកបូជាចារ្យហ្គូស្តាវ៉ូ នឹងចែករំលែក តួនាទីពីលោកអភិបាល ដើម្បីថែទាំនិងធ្វើដំណើរជាមួយមនុស្សដែលជាប់ជាមួយភាពងងឹត និងគ្មានក្ដីសង្ឃឹម គឺត្រូវប្រកាសដំណឹងល្អ ដើម្បីអោយមនុស្សក្នុងតំបន់មានជីវិតបរិបូរណ៍ដែលមកពីព្រះជាម្ចាស់។
លោកអភិបាលបានរំលឹកទៀតថា អ្នកគង្វាលដឹងថា ព្រះជាម្ចាស់គង់នៅ និងបានបំពាក់សេចក្ដីសុចរិត របស់ព្រះអង្គដើម្បីឲ្យយើងបំពេញបេសកកម្មនេះ ដែលនាំឲ្យប្រជារាស្រ្ដរបស់ព្រះជាម្ចាស់រស់នៅក្នុងអំណេសប្បាយ។
លោកអភិបាលបន្ថែមថា តួនាទីរបស់លោកគង្វាលគឺដឹកនាំបងប្អូនឲ្យចេះអធិដ្ឋានលើកតម្កើងសិរីរុងរឿងព្រះជាម្ចាស់ ដើម្បីភ្ជាប់ជាមួយព្រះជាម្ចាស់ដែលប្រទានជីវិតនិងប្រទានការសង្គ្រោះនិងដើម្បីប្រោះបងប្អូនឲ្យបានវិសុទ្ធ និងមានជីវិតអស់កល្បជានិច្ច ជាពិសេសតាមរយៈអគ្គសញ្ញានានា។
កិច្ចការទាំងនេះមិនងាយស្រួលទេ តែអ្វីដែលជាកំលាំងរបស់លោកនោះ គឺព្រះជាម្ចាស់ដែលបានត្រាស់ហៅលោកដោយមានព្រះហទ័យស្មោះត្រង់ ហើយព្រះអង្គនឹងសម្រេចកិច្ចការទាំងនេះតាមរយៈលោកបូជាចារ្យផ្ទាល់។ លោអភិបាលបញ្ជាក់។
«ដូច្នេះលោកឪពុកមិននៅឯកោទេ ព្រោះមានព្រះជាម្ចាស់គង់នៅ» លោកអភិបាលបន្ថែម។
យើងជាបូជាចារ្យមែន ប៉ុន្តេយើងមិនមែនព្រះយេស៊ូ ប៉ុន្តែយើងទទួលតួនាទីមួយពិសេស គឺផ្តល់សក្ខីភាពអំពីពន្លឺ ដែលជាព្រះយេស៊ូកំពុងយាងមក ហើយឲ្យគ្រីស្តបរិស័ទក្លាយជាពន្លឺបំភ្លឺពិភពលោក។
ក្នុងនោះដែរ លោកអភិបាលព្រះសហគមន៍ស្នើសុំឲ្យលោកបូជាចារ្យហ្គូស្តាវ៉ូ រៀបចំគណៈកម្មាការ ដែលជាសហការី របស់លោកក្នុងព្រះសហគមន៍ ធ្វើដំណើរជាមួយគ្រីស្តបរិស័ទឯទៀតៗ ដើម្បីផ្ដល់សក្ខីភាពនៃជំនឿនិងពន្លឺ ដោយចេះដាក់ខ្លួននិងទុកឲ្យព្រះយេស៊ូដឹកនាំ។
លោកអភិបាលបញ្ជាក់ថា «យើងជាគណៈកម្មការ ជាបងប្រុស បងស្រី យើងជាលោកឪពុក យើងមានគោលដៅតែមួយ គឺបម្រើតាមរបៀបលោកយ៉ូហានបាទីស្ដ បម្រើព្រះយេស៊ូដើម្បីឲ្យមនុស្សលោកមើលឃើញពន្លឺ»។
មុនបញ្ចប់កម្មវិធីលោកអភិបាលអូលីវីយ៉េ បានហៅលោកបូជាចារ្យហ្គូស្តាវ៉ូ មកបញ្ជាក់ពីពាក្យសន្យា ក្នុងតួនាទីរបស់លោកជាអ្នកទទួលខុសត្រូវមណ្ឌលសកម្មភាពព្រះសីហនុ-កោះកុង។
ការចាត់តាំងនេះមានរយៈពេល៦ឆ្នាំ រួមជាមួយលោកបូជាចារ្យជំនួយ គឺលោកបូជាចារ្យគង់ វៀល ដោយគ្រប់គ្រងទៅលើព្រះសហគមន៍នៅភាគខាងលិចនៃប្រទេសកម្ពុជា មានដូចជា ព្រះវិហារសន្តមីកាអែល ព្រះវិហារសន្តម៉ាថាយកោះកុង ព្រះវិហារសន្តីតេរេសាស្រែអំបិល ព្រះសហគមន៍កោះស្តេច ព្រះវិហារសន្តីម៉ារីកោះខ្យង ព្រះវិហារសន្តដូមិនីកូបឹងតាព្រហ្ម និងតំបន់តូចៗមួយចំនួនទៀត។
លោកបូជាចារ្យហ្គូស្តាវ៉ូ បានទទួលលិខិតតែងតាំងជាផ្លូវការពីលោកអភិបាលព្រះសហគមន៍ ទទួលព្រះគម្ពីរដែលជាព្រះបន្ទូលរបស់ព្រះជាម្ចាស់ដើម្បីប្រកាសជំនឿដល់បងប្អូន ទទួលប្រេងសម្រាប់ធ្វើអគ្គសញ្ញានានា ទទួលឧបករណ៍ តាំងព្រះកាយព្រះគ្រីស្ត ទទួលកូនសោរទូរព្រះកាយ និងទទួលកន្សែងបូជាចារ្យជាសញ្ញានៃសិទ្ធិផ្តល់ឲ្យលោកធ្វើពិធី លើកលែងទោសឲ្យគ្រីស្តបរិស័ទក្នុងនាមលោកអភិបាលផ្ទាល់។
«ខ្ញុំសូមអរគុណលោកអភិបាលដែលបានទុកចិត្តខ្ញុំ ដើម្បីណែនាំព្រះសហគមន៍។ ខ្ញុំមានអំណរសប្បាយយ៉ាងច្រើន ដោយសារព្រះសហគមន៍ (ខ្ញុំ)បានទទួលមុខងារជាគ្រូគង្វាល ដែលជាគំរូរបស់ព្រះយេស៊ូតែម្តង» លោកហ្គូស្តាវ៉ូ បេនីតេស អាឌ្រីយ៉ាន បូជាចារ្យទទួលខុសត្រូវថ្មីផ្តល់បទសំភាសន៍ក្រោយបញ្ចប់ពិធីចាត់តាំង។
លោកបូជាចារ្យឲ្យដឹងថា មណ្ឌលសកម្មភាពនេះ មានសកម្មភាពជាច្រើន មិនត្រឹមតែពិធីបុណ្យក្នុងព្រះសហគមន៍នោះទេ តែមានសាលាមត្តេយ្យ និងថ្នាក់អក្ខរកម្មផង ដូច្នេះមានកូនក្មេងនិងបងប្អូនជាច្រើន។ លោកបន្ថែមថា យើងមានអំណរសប្បាយដោយសារយើងមានបងប្អូនសហការ។
«ខ្ញុំគ្មានអារម្មណ៍ថាឯកោទេ ឬធ្វើការងារតែម្នាក់ឯងទេ ព្រោះខ្ញុំមានបងប្អូនសហការជាមួយគ្នាយ៉ាងច្រើនដែរ» លោកបូជាចារ្យបញ្ជាក់។
លោកបានប្រាប់ទៀតថា ការងារគង្វាលនេះមានច្រើនតំណរមកហើយ ដោយមានលោកបូជាចារ្យទទួលខុសត្រូវជាច្រើននាក់ ដើម្បីណែនាំគ្រីស្តបរិស័ទ ដែលនេះបញ្ជាក់ថា ព្រះជាម្ចាស់មិនបានបោះបង់ព្រះសហគមន៍នេះទេ ដែលនាំឲ្យបងប្អូនមានអំណរសប្បាយរួមជាមួយគ្នា៕
ដោយ កែវ កញ្ញា
