ក្នុងពិធីប្រសិទ្ធិពរលើតុសក្ការៈថ្មី និងអរព្រះគុណព្រះជាម្ចាស់ខួប ៦០ ឆ្នាំរបស់ព្រះសហគមន៍សន្តមីកាអែល នៅក្រុងព្រះសីហនុ លោកអភិបាលអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមិភាគភ្នំពេញ ជំរុញឲ្យគ្រីស្តបរិស័ទយកគំរូតាមអ្នកមានសុភមង្គលកាឡូសអាគូទីស ដែលអធិធាតុរបស់គាត់ត្រូវបានបញ្ចុះក្នុងតុអាសនៈថ្មីនាថ្ងៃទី៧ ខែមិថុនា ឆ្នាំ២០២៥នេះ។
លោកអភិបាលអូលីវីយ៉េ បញ្ជាក់ថា គ្រប់ពេលវេលាដែលយើងចូលក្នុងអភិបូជា យើងត្រូវនឹកឃើញអំពីជីវិតរបស់យើងដែលទទួលកម្លាំងនិងព្រះពរពីព្រះកាយព្រះគ្រីស្ត ដែលជាកំពូលនិងជាប្រភពនៃជីវិតរបស់យើង។
លោកអភិបាលបាននិយាយពី កាឡូសអាគូសទីស ជាយុវជនម្នាក់ដែលកើតក្នុងឆ្នាំ១៩៩១ ហើយបានស្លាប់នៅក្នុងឆ្នាំ២០០៦ មានគុណធម៌ចំនួន៥ដែលយើងជាគ្រីស្តបរិស័ទត្រូវអនុវត្តតាម។
ទី១ លោកថា រៀងរាល់ថ្ងៃ កាឡូសទទួលព្រះកាយព្រះគ្រីស្តនិងនៅក្បែព្រះអង្គដោយនមស្កាព្រះកាយព្រះគ្រីស្តក្នុងពេលអភិបូជា។ «គាត់តែងនិយាយថា ព្រះកាយព្រះគ្រីស្តប្រៀបដូចជាផ្លូវល្បឿនលឿនដើម្បីចូលស្ថានបរមសុខ» លោកអភិបាលបញ្ជាក់។
មានប្រសាសន៍ទៅកាន់គ្រីស្តបរិស័ទជាច្រើនកុះករ លោកអភិបាលបន្តថា ទោះបីជាកាឡូស កើតជំងឺមហារីកឈាម គាត់នៅតែមានអំណរសប្បាយ ដោយនិយាយថា «ជារៀងរាល់ថ្ងៃខ្ញុំជាប់ជាមួយព្រះយេស៊ូ» ដែលនេះជាចំណុចមួយទៀតដែលគ្រីស្តបរិស័ទរៀនពីយុវជនរូបនេះ។
លោកគង្វាលព្រះសហគមន៍បន្ថែមថា ក្នុងសម័យអ៊ីនធឺណេត ឲ្យគ្រីស្តបរិស័ទត្រូវប្រើវាដើម្បីប្រកាសដំណឹងល្អ ដូចកាឡូសដែរ។ លោកអភិបាលបញ្ជាក់ «គាត់មិនប្រើវាដើម្បីសប្បាយៗ លេងហ្គេម ទៅណាទីណីទេ។ គាត់បានយកអ៊ីនធឺណេត ដើម្បីផ្សព្វផ្សាយដំណឹងល្អអំពីការអស្ចារ្យនៃព្រះកាយព្រះគ្រីស្ត» ហើយការស្រាវជ្រាវនេះ បាននាំឲ្យយុវជនជាច្រើនទទួលព្រះយេស៊ូគ្រីស្តជាអម្ចាស់។
ទី២ យុវជននេះណែនាំឲ្យយើងយល់ថា ជីវិតជាសន្តបុគ្គលគឺសម្រាប់មនុស្សទាំងអស់។ លោកអភិបាលបញ្ជាក់ «ទោះបីយើងជាកូនក្មេង ជាយុវជនក៏ដោយ ពេលយើងជាប់ជាមួយព្រះជាម្ចាស់ យើងអាចធ្វើដំណើរទៅក្នុងជីវិតដ៏វិសុទ្ធ»។
ទី៣ គឺនៅក្បែព្រះកាយព្រះគ្រីស្តដើម្បីឆ្លងភាពដ៏វិសុទ្ធរបស់ព្រះជាម្ចាស់ «ព្រះកាយព្រះគ្រីស្តណែនាំឲ្យជីវិតរបស់យើងកែប្រែ ដើម្បីភ្ជាប់ជាមួយព្រះយេស៊ូគ្រីស្តផ្ទាល់ដែលជាមរតកនិងជាជីវិតរបស់យើង»។
ទី៤ លោកអភិបាលបានសង្កត់ធ្ងន់ថា កាឡូសបានបង្ហាញថា «ព្រះកាយព្រះគ្រីស្តជាអគ្គសញ្ញានៃធម៌មេត្តាករុណា»។ លោកពន្យល់ថា ជីវិតរបស់យើងបានប៉ះផ្ទាល់ជាមួយសេចក្តីស្រឡាញ់របស់ព្រះជាម្ចាស់តាមរយៈការបូជាព្រះជន្មរបស់ព្រះយេស៊ូ។
កាឡូសទោះបីនៅក្មេងមានអាយុទើបតែ៦ឬ៧ឆ្នាំ គាត់បានខិតខំប្រមូលប្រាក់ដើម្បីសួរសុខទុក្ខអ្នកក្រីក្រ អ្នកជំងឺ។ លោកអភិបាលអូលីវិយ៉េ បញ្ជាក់ថា «ពិតមែន នៅពេលយើងទទួលព្រះយេស៊ូគ្រីស្តជាប្រចាំថ្ងៃ សមត្ថភាពរបស់យើងដើម្បីស្រឡាញ់បងប្អូនឯទៀតៗរីកចម្រើនខ្លាំងទៅៗ»។
ទី៥ គឺគាត់បានណែនាំឲ្យយើងជាប់ជាមួយសេចក្តីស្រលាញ់ដែលយើងទទួលពីព្រះនាងម៉ារី ដែលជាមាតារបស់យើងនិងរបស់ព្រះសហគមន៍ តាមរយៈអធិដ្ឋានផ្គាំ ឲ្យយើងធ្វើដំណើរដោយកម្លាំងជាមួយព្រះយេស៊ូ។
ក្នុងឆ្នាំមហាករុណាទិគុណនេះ សូមឲ្យយើងអរព្រះគុណព្រះជាម្ចាស់ តាមរយៈកាឡូសអាគូទីស។ សូមឲ្យយើងជាគ្រីស្តបរិស័ទយកចិត្តទុកដាក់រស់នៅប្រចាំថ្ងៃក្នុងសេចក្តីស្រឡាញ់របស់ព្រះយេស៊ូ ដោយទទួលព្រះកាយ ស្រឡាញ់ព្រះកាយ និងស្រឡាញ់ព្រះយេស៊ូដែលបូជាជីវិតសម្រាប់យើង។
មុននឹងបញ្ចប់ធម្មទេសនា លោកអភិបាលបន្ថែមថា «ថ្ងៃនេះតាមរយៈសន្តមីកាអែលដែលជាន់មាសាតាំង តាមរយៈព្រះនាងម៉ារីជាមាតារបស់យើង យើងធ្វើដំណើរឆ្ពោះទៅព្រះយេស៊ូគ្រីស្តដែលបូជាជីវិតដើម្បីឲ្យយើងមានជីវិត»។
ព្រះវិហារសន្តមីកាអែល ដែលបានកសាងឡើងក្នុងឆ្នាំ១៩៦៥ ដោយលោកអាឡូប៊េរី ដោយមានស្ថាបត្យករល្បីល្បាញរបស់កម្ពុជាគឺវណ្ណ មូលីវណ្ណ។ សព្វថ្ងៃព្រះវិហារនេះ ទទួលខុសត្រូវដោយលោកបូជាចារ្យ ហ្គូស្តាវ៉ូ អាដ្រីយ៉ាន បេនីតេស។
ក្រោយសង្គ្រាមស៊ីវិលក្នុងរបបប្រល័យពូជសាសន៍ក្នុងឆ្នាំ១៩៧៩ ព្រះវិហារកាតូលិកក្នុងភូមិភាគភ្នំពេញដែលនៅសេសសល់គឺមានតិចតួចណាស់ គឺមានព្រះវិហារតូចសន្តយ៉ូសែប(ផ្សារតូច) ព្រះវិហារនៅលើភ្នំបូកគោ និងព្រះវិហារសន្តមីកាអែល(ក្រុងព្រះសីហនុ)៕
ដោយកែវ កញ្ញា
