ការិយាល័យយុវជន ជំទង់ និងកុមារកាតូលិក ភូមិភាគភ្នំពេញ បានរៀបចំកម្មវិធីបោះជំរំប្រធានមេក្រុមកាយឫទ្ធិភូមិភាគភ្នំពេញ ចំនួន៧០នាក់ ដែលមកពីព្រះសហគមន៍នានា ក្នុងមណ្ឌលសកម្មភាពទាំងប្រាំបួន ពីថ្ងៃទី២៩ ដល់ថ្ងៃទី៣១ ខែមីនា ឆ្នាំ២០១៩ នៅឧទ្យានជាតិព្រះសុរាម្រិតគិរីរម្យ ខេត្តកំពង់ស្ពឺ។
លោក ស៊ាន់ សារឿន នាយកការិយាល័យយុវជន ជំទង់ និងកុមារកាតូលិក ភូមិភាគភ្នំពេញ បានប្រាប់ពីគោលបំណងនៃកម្មវិធីបោះជំរំនេះថា យើងមានបីចំណុចសំខាន់ៗ គឺទីមួយពង្រឹងសមត្ថភាពដល់ប្រធានមេក្រុមកាយឫទ្ធិនីមួយៗ តាមរយៈការផ្តល់នូវគំនិតឆ្នៃប្រឌិតថ្មីៗ ការណែនាំក្រុម ល្បែងកំសាន្ត និងការចែកបទពិសោធន៍ឲ្យគ្នាទៅវិញទៅមក។ ទីពីរ ដើម្បីធ្វើពាក្យសច្ចាជាផ្លូវការចំពោះមុខលោកអភិបាល ដើម្បីបម្រើកូនៗកាយឫទ្ធិ ក្នុងព្រះសហគមន៍កាតូលិកភូមិភាគភ្នំពេញ។ ទីបី ឲ្យមានពេលវេលាដើម្បីរិះគិតរួមគ្នាសម្រាប់រៀបចំកម្មវិធីទិវាកុមារអន្តរជាតិ ០១ មិថុនា ២០១៩។
លោកសារឿន បន្តដោយរំពឹងថា កម្មវិធីនេះអាចធ្វើឲ្យប្រធាមេក្រុមកាយឬទ្ធិទាំងអស់មានសមត្ថភាពបន្ថែមទៀត ក្នុងការណែនាំមេកាយឫទ្ធិក៏ដូចជាកូនៗកាយឫទ្ធិនៅតាមព្រះសហគមន៍របស់ពួកគេ តាមរយៈបទពិសោធន៍និងរបៀបថ្មីៗ ប្រកបដោយប្រសិទ្ធិភាព ការយកចិត្តទុកដាក់ ការទួលខុសត្រូវ និងបម្រើដោយចិត្តស្មោះត្រង់និងសេចក្តីស្រឡាញ់ ដោយមានសហការជាមួយលោកបូជាចារ្យ បងប្រុសបងស្រី និងគ្រីស្តបរិស័ទនៅក្នុងព្រះសហគមន៍។
លោកប្រធានការិយាល័យយុវជនរូបនេះ បានលើកសំណូមពរ ដល់លោកបូជាចារ្យ បងប្រុសបងស្រីតាមព្រះសហគមន៍នីមួយៗ សូមជួយយកចិត្តទុកដាក់គាំទ្រលើកទឹកចិត្ត តាមដាន ណែនាំដល់ក្រុមកាយឬទ្ធិ ដើម្បីឲ្យគេមានភាពកក់ក្តៅនិងមានកម្លាំងកាយកម្លាំងចិត្តក្នុងការបន្តសកម្មភាពរបស់ពួកគេ។
ថ្លែងទៅកាន់ក្រុមប្រធានមេក្រុមកាយឫទ្ធិ នៅក្នុងធម្មទេសនា លោកអភិបាល អូលីវីយេ លើកទឹកចិត្តពួកគេថា ព្រះជាម្ចាស់ណែនាំឲ្យប្អូនៗទៅជាប្រធានមេក្រុមកាយឫទ្ធិ ដើម្បីដឹកនាំមេក្រុមកាយឫទ្ធិ ដឹកនាំកូនៗកាយឫទ្ធិ ឲ្យគេរស់នៅក្នុងរបៀបត្រឹមត្រូវទាំងនៅក្នុងជីវិតធម្មតា ជាមួយឪពុកម្តាយ ជាមួយមិត្តភ័ក្តិ និងឲ្យទៅជាពលរដ្ឋត្រឹមត្រូវនៅក្នុងសង្គម ឲ្យចេះគោរពគ្រប់វិន័យគ្រប់ច្បាប់របស់សង្គម។ ប្អូនដឹងថាច្បាប់នីមួយៗមិនណែនាំឲ្យរំខានយើង តែណែនាំឲ្យយើងរួមរស់ជាមួយគ្នាដោយសុខដមរមនា។
លោកអភិបាលបន្តថា ប្រធានមេក្រុមកាយឫទ្ធិត្រូវតែគោរពតាមពាក្យសច្ចារបស់ក្រុម ធ្វើតាមវិន័យរបស់ព្រះជាម្ចាស់ដែលចែងថា សូមស្រឡាញ់គ្នាទៅវិញទៅមកដូចព្រះយេស៊ូបានស្រឡាញ់យើង។ យើងណែនាំឲ្យកូនក្មេង ដែលចូលមកក្នុងកម្មវិធីកាយឫទ្ធិយើង ក្លាយទៅជាមនុស្សដែលចេះគោរពគ្នាទៅវិញទៅមក និងអាចបង្កើតសង្គមដែលពោរពេញដោយសុខដមរមនា ដោយគោរពច្បាប់របស់សង្គម។ លោកថា “ពិតមែនព្រះជាម្ចាស់ស្រឡាញ់យើង ព្រះជាម្ចាស់លើកលែងទោសឲ្យយើងលុះត្រាតែយើងយកចិត្តទុកដាក់ស្រឡាញ់ យកចិត្តទុកដាក់ធ្វើតាមធម្មវិន័យ និងយកចិត្តទុកដាក់រស់នៅជាមនុស្សដែលខិតខំកែប្រែចិត្តគំនិត ដើម្បីធ្វើជាមនុស្សសុចរិតជានិច្ច។“
យុវជន សឿង ឧសភា ជាប្រធានមេក្រុមកាយឬទ្ធិព្រះសហគមន៍កាតូលិកសន្ត មីកាអែល ក្រុងព្រះសីហនុ បានថ្លែងថា ការបោះជំរំនេះធ្វើឲ្យរូបគេទទួលបាន អំណរសប្បាយ និងភាពរីករាយយ៉ាងខ្លាំង ម្យ៉ាងទៀតទទួលបានមេរៀនថ្មីៗ ដូចជារបៀបចងខ្សែ របៀបសង្រ្គោះបឋម របៀបធ្វើការងារជាក្រុម…។ ឧសភា ជាសមាជិកក្រុមកាយឫទ្ធិកម្ពុជានៅខេត្តព្រះសីហនុផងដែរ ដែលមានតួនាទីជាមេល្បាត ពេលចូលក្នុងការបោះជំរំនេះ គេមានឱកាសចែករំលែកបទពិសោធន៍ដែលគេមានដូចជា របៀបតំរង់ជួរ របៀបគោរពមេក្រុម កាយវិការកាយឫទ្ធិផ្សេងៗទៀត។
ឧសភា បានបន្តថា “ការបោះជំរំនេះបានណែនាំឲ្យអ្នកដែលចូលរួមទាំងអស់ ក្លាយជាមនុស្សដែលមានទំនួលខុសត្រូវលើការងារដែលខ្លួនទទួល ចេះសហការគ្នានិងរៀនរស់ជាក្រុម។ ដូច្នេះខ្ញុំសូមណូមពរដល់មេកាយកាយឬទ្ធិទាំងអស់ សូមបម្រើកូនកាយឫទ្ធិដោយអស់ពីចិត្ត និងភាពរីករាយ។”
ចំណែកយុវជន ចាន់ ម៉ានុត ជាប្រធានមេក្រុមកាយឫទ្ធិព្រះសហគមន៍កាតូលិកសន្តប៉ូលកោះស្លារ បានបង្ហាញអំពីចំណាប់អារម្មណ៍សម្រាប់ការចូលរួមបោះជំរំប្រធានមេក្រុមកាយឬទ្ធិជាលើកដំបូងរបស់ខ្លួនថា វាបានធ្វើឲ្យគេបានទទួលបទពិសោធន៍ថ្មីៗជាច្រើន ដូចជាស្គាល់ការងារជាក្រុម ត្រូវមានទំនួលខុសត្រូវ របៀបនៃការដឹកនាំ ការអធិដ្ឋានតេហ្សេ ជាដើម។ ហើយម៉ានុត ប្តេជ្ញានឹងយកអ្វីដែលគេទទួលបានពីការបោះជំរំនេះ យកមកអនុវត្តជាក់ស្តែងជាមួយក្រុមកាយឬទ្ធិរបស់គេ ជាពិសេសគឺគោរពតាមបទបញ្ជាទាំង១០របស់ក្រុមកាយឫទ្ធិ។ ម៉ានុត បានថ្លែងបន្តថា “នៅពេលដែលប្រកាសពាក្យសច្ចាក្រុមកាយឫទ្ធិ នៅមុខលោកអភិបាលពិតជាធ្វើឲ្យខ្ញុំព្រឺសម្បុរ ហើយខ្ញុំបានប្រកាសដោយអស់ពីកម្លាំងកាយកម្លាំងចិត្តរបស់ខ្ញុំ។” យុវជនរូបនេះបន្តថា កម្មវិធីនេះធ្វើឲ្យប្រធានមេក្រុមកាយឬទ្ធិទាំងអស់បានស្គាល់គ្នា និងចែករំឡែកបទពិសោធន៍ឲ្យគ្នាទៅវិញទៅមក។”
គួបញ្ជាក់ផងដែរថា កម្មវិធីកាយឫទ្ធិព្រះសហគមន៍គមន៍កាតូលិក ភូមិភាគភ្នំពេញបង្កើតឡើងក្នុងឆ្នាំ២០០៣ នៅព្រះសហគមន៍សន្តីម៉ារីញញឹមចំការទៀង ខេត្តតាកែវ ដោយលោកអភិបាលអូលីវីយេ។
