បងស្រី ហ្សីលប៊ែរ ម៉ាស៊ុង GILBERTE MASSON ក្នុងក្រុមបងស្រីព្រះមាលា នៅប៉ុងឌឺបូវ័រសាំង Rosaire de Pont de Beauvoisin បានទទួលមរណភាពហើយ នៅថ្ងៃព្រហស្បតិ៍ ទី០៩ ខែឧសភា ឆ្នាំ ២០១៩ នៅ សំប៊ែរី ប្រទេសបារាំង។
បងស្រីហ្ស៊ីលប៊ែរប្រសូត នៅថ្ងៃទី ២២ ខែធ្នូ ឆ្នាំ ១៩៣៧។ បងស្រីទទួលមរណភាពក្នុងជន្មាយុ ៨២ឆ្នាំ ដោយរោគាពាធ ក្នុងអារាមរបស់បងស្រី នៅប្រទេសបារាំង។

បងស្រីបានចាប់ផ្តើមកិច្ចការការងាររបស់ខ្លួនជាមួយប្រជាជនកម្ពុជា នៅក្នុងជំរំជនភៀសខ្លួនតាមព្រំដែន កម្ពុជា-ថៃ ក្នុងនាមជាសាសនទូត។ នៅឆ្នាំ១៩៩២ បងស្រីបានបន្តបេសកកម្មនៅក្នុងប្រទេសកម្ពុជាជាមួយលោកឪពុកប៉ុងសូដ៍ ដើម្បីរៀបចំសៀវភៅអប់រំជំនឿ និងសិក្ខាសាលានានា សម្រាប់គ្រូអប់រំជំនឿនៅទូទាំងប្រទេសកម្ពុជា។

បងស្រីធ្វើការងារយ៉ាងច្រើនសម្រាបព្រះសហគមន៍កាតូលិកនៅកម្ពុជា តាមរយៈការិយាល័យអប់រំជំនឿកាតូលិក ។​ សៀវភៅអប់រំជំនឿដែលព្រះសហគមន៍ប្រើសព្វថ្ងៃសម្រាប់កិច្ចការអប់រំជំនឿ គឺជាសមិទ្ធិផលដែលចេញពីការខិតខំប្រឹងប្រែងដ៏អស្ចារ្យរបស់បងស្រី។

លោកគ្រូ ដួង សាវង់ ប្រធានការិយាល័យអប់រំជំនឿកាតូលិក ដែលជាអតីតសហការីម្នាក់របស់បងស្រីបានរៀបរាបថា បងស្រីមានគំរូជាច្រើនសម្រាប់រូបលោក គឺនៅក្នុងកាងារ បងស្រីជាមនុស្សច្បាស់លាស់​ហ្មត់ចត់ មានគោលដៅពិតប្រាកដ​ ការរៀបចំកិច្ចការអ្វីមួយសុទ្ធតែមានគំរោងការ។​  បងស្រីមានការព្យាយាម​អត់ធ្មត់ មានចិត្តធ្ងន់​និងចិត្តស្រលាញ់យ៉ាងពិតប្រាកដ​។ បងស្រីមានទស្សនៈវិស័យច្បាស់លាស់។ លោបន្តថា ៖ ខ្ញុំចាំមិនភ្លេចទេ គឺបងស្រីជាអ្នកជំរុញឲ្យមានការបណ្តុះបណ្តាល សម្រាប់អ្នកបន្តវេណ ដោយជំរុញឲ្យមានការបញ្ជូនបងប្អូនឲ្យទទួលការអប់រំនៅក្រៅប្រទេសលើកិច្ចការអប់រំជំនឿ។ ជាលិទ្ធផល គឺបេក្ខជនបីរូបពីកម្ពុជាទៅសិក្សានៅប្រទេសបារាំង។  បងស្រីក៏បានផ្តល់ឲ្យមានការចូលរួមក្នុងសិក្ខាសាលអន្តរជាតិអំពីអប់រំជំនឿ នៅប្រទេសបារាំង ដែលបានបញ្ជាក់ថា​ ការអប់រំជណឿនៅកម្ពុជា ដូចនៅប្រទេសបារាំង​ដេលគេកំពុងយកចិត្តទុកដាក់។​បងស្រីក៏បាននាំនូវអ្វីដែលថ្មីៗអំការអប់រំជំនឿនៅកម្ពុជាដែរ។​

លោកបញ្ជាក់ថា “បងស្រី បំពេញកិច្ចពោរពេញដោយសេចក្តីស្រលាញ់ ការអត់ធ្មត់ជានិច្ច”។លោកគ្រូដូង សាវង់ ក៏បានលោកឡើងដែរថា ៖ ក្រៅពីកិច្ចការអប់រំជំនឿ បងស្រីក៏បានបំពេញកិច្ចមនុស្សធម៌ក្នុងសង្គមផងដែរ គឺ ជួយអ្នកក្រីក្រ ឲ្យការងារ ឲ្យមានការសិក្សា សម្រាប់យុវជនយុវនារី ជាពិសេសយុវនារី ជួយកេឲ្យទទួលបានការសិក្សានៅថ្នាក់មធ្យមសិក្សា និងថ្នាក់ឧត្តមសិក្សា។ ​

អំពីគំរូនៃជំនឿលោកគ្រូដួងសាវង់ក៏បានបញ្ជាក់ថា បងស្រីតែងរំលឹងជានិច្ច​អំពីជំនឿ ចែករំលែក ព្រះបន្ទូល ក្នុងពេលអធិដ្ឋាន ទៅអភិបូជាទៀងទាត់។​បងស្រីធ្លាប់លើកទឹកចិត្តថា ការចូលរួបអភិបូជា ការអធិដ្ឋានសំខាន់ណាស់ ពេលយើងធ្លាក់ជំនឿ ការជួបជុំបងប្អូននៅព្រះវិហារ គឺសំខាន់នាស់ ដើម្បីលើកទឹកចិត្តយើង ក្នុងការបន្តដំណើរទៅមុខ។​

លោកកាន់ ប៊ុយ ជាយុវជន ដែលទៅសិក្សានៅប្រទេសបារាំង ក្រោមការជំរុញ គាំទ្ររបស់បងស្រី ហ្ស៊ីលប៊ែរ និងជាអ្នកបានជួបបងស្រីប៉ុន្មានសប្តាហ៍មុនបងស្រីទទួលមរណភាព បាននិយាយលើហ្វេសប៊ុកផ្ទាល់ខ្លួន ដោយភ្ជាប់ជាមួយរូបភាពរបស់បងស្រីផងថា៖ ការស្ម័គ្រចិត្តបម្រើ ការលះបង់ និងការបូជារបស់បងស្រី ពិតជាផ្តល់នូវកិត្តិយសដល់យើងខ្ញុំ និងមានគុណបំណាច់យ៉ាងធំធេងដែលមិនអាចបំភ្លេចបានឡើយ។ បងស្រីឃ្លាតតែរូបកាយ តែវិញ្ញាណឋិតនៅជាមួយយើងខ្ញុំ។​ នៅថ្ងៃនេះ យើងខ្ញុំរួមគ្នាប្រារព្ធចំពោះបងស្រី ដើម្បីថ្លែងអំណរគុណយ៉ាងជ្រាលជ្រៅដល់ការលះបង់ដ៏មានតម្លៃរបស់បងស្រី។ យើងខ្ញុំនឹកគិតដល់បងស្រី ដើម្បីបន្តកិច្ចការទាំងឡាយដោយយកចិត្តទុកដាក់ និងដោយស្មារតីទទួលខុសត្រូវ ដើម្បីទទួលផលនៃសេចក្តីសុខសាន្ត និងអំណរសប្បាយនាពេលអនាគត។ យើងខ្ញុំនឹករំឭក និងនឹកចាំពីកម្លាំងកាយ កម្លាំងចិត្តដែលបងស្រីបានលះបង់ ដើម្បីឲ្យការនឿយហត់របស់បងស្រីមានតម្លៃ និងមានអត្ថន័យជានិច្ចចំពោះព្រះសហគមន៍នៅប្រទេសកម្ពុជា។

បងស្រីបានត្រឡប់ទៅរស់នៅក្នុងក្រុមព្រះមាលា ប៉ុងឌឺបូវ័រសាំង ប្រទេសបារាំងវិញ កាលពីពីរឆ្នាំមុន ដោយសារបញ្ហាសុខភាព។ បងស្រីបានលះបង់ចិត្តកាយ ប្រាជ្ញាសម្រាប់ព្រះសហគមន៍កាតូលិកនៅកម្ពុជា រពេល២៤ឆ្នាំ និងជាង២៤ឆ្នាំសម្រាប់ប្រជាជនខ្មែរទូទៅ។

យើងសូមអរព្រះគុណព្រះជាម្ចាស់ សម្រាប់ការខ្នះខ្នែងនិងការបម្រើដោយអស់ពីចិត្តរបស់បងស្រី ចំពោះព្រះសហគមន៍របស់យើងនៅប្រទេសកម្ពុជា ជាពិសេសបានជួយយ៉ាងច្រើនដល់អ្នកស្វែងយល់ឲ្យស្គាល់អំពីការរស់នៅរបស់ព្រះយេស៊ូ។