កាលពីថ្ងៃម្សិលមិញនេះ ព្រះសហគមន៍កាតូលិកកម្ពុជាបានប្រារព្ធកម្មវិធីរំលឹកវិញ្ញាណក្ខន្ធជនរងគ្រោះ និងការឈឺចាប់ពីឧក្រិដ្ឋកម្មក្នុងរបបប្រល័យពូជសាសន៍ប៉ុលពត នៅព្រះសហគមន៍តាំងគោក ក្នុងខេត្តកំពង់ធំ ដោយមានលោកអភិបាលអូលីវីយេ ជ្មីតអីស្ល៊ែរ, លោកអភិបាលអន់តូនីសាមី ស៊ូសៃរាជ្យ, លោកអភិបាលអេនរីគេ ហ្វីការេដូ រួមនឹងបូជាចារ្យ អ្នកបួស និងគ្រីស្តបរិស័ទជាង២០០០នាក់ចូលរួម។
នៅក្នុងធម្មទេសនា លោកអភិបាលអូលីវីយេ មានប្រសាសន៍ថា យើងត្រូវរួមជាមួយគ្នា ដើម្បីទទួលខុសត្រូវនៅលើព្រះសហគមន៍កម្ពុជា ដែលយើងទទួលជាមរតក ដើម្បីរៀបចំអនាគតនៃព្រះសហគមន៍។ លោកអភិបាលបញ្ជាក់ទៀតថា ការទទួលខុសត្រូវនោះត្រូវបម្រើដូចព្រះយេស៊ូនៅក្នុងព្រះសហគមន៍ដែលជាផ្ទះផ្ទាល់របស់យើងនៅក្នុងមហាគ្រួសារ ដោយឲ្យអ្នកដទៃរកឃើញសេចក្តីសុខទទួលស្វាគមន៍ ដោយញញឹម និងស្រលាញ់ ជាពិសេសគឺផ្តល់ក្តីសង្ឃឹម។
លោកអភិបាលបានប្រសាសន៍ទៅកាន់ក្រុមអ្នកបួសថា «ដូច្នេះសម្រាប់យើងនៅថ្ងៃនេះ យើងត្រូវនឹកឃើញការទទួលខុសត្រូវរបស់យើង។ ជាពេលដែលយើងនឹកឃើញ ឲ្យងាប់នូវទម្លាប់អាក្រក់ បណ្តេញអ្វីៗដែលនាំយើងឲ្យទៅឆ្ងាយពីព្រះជាម្ចាស់។ ជាពិសេសជាពេលដែលធ្វើឲ្យងាប់នូវវប្បធម៌របស់យើងផ្ទាល់ អំពីទស្សនៈ អំពីពិភពលោកដែលយើងមាន ដើម្បីបញ្ចូលនៅក្នុងទឹកដីនិងដើម្បីកើតសារជាថ្មី ដោយមានភ្នែកថ្មី ដួងចិត្តថ្មី»។
លោកអភិបាលបញ្ជាក់ទៀតថា «ឲ្យយើងមើលឃើញវប្បធម៌របស់យើងជាវប្បធម៌ខ្មែរ ដោយកើតសារជាថ្មីជាមួយប្រជារាស្ត្រដែលអង្គុយនៅទីនេះ ដែលទៅជាប្រជារាស្ត្ររបស់យើងផ្ទាល់»។
លោកអភិបាលក៏បានជំរុញ និងលើកទឹកចិត្តដល់យុវជន និងគ្រីស្តបរិស័ទទាំងអស់ឲ្យបំពេញនូវគម្រោងការនិងក្ដីសុបិនរបស់ខ្លួន និងត្រូវចូលរួមប្រកាសដំណឹងល្អ។
លោកបន្ថែមថា ថ្ងៃនេះ យើងបន្តស្តាប់សំលេងរបស់អ្នកបម្រើរបស់ព្រះជាម្ចាស់ដែលបានបូជាជីវិតនៅក្នុងអំឡុងរបបប៉ុលពត ដែលជាគំរូនៃជំនឿ ស្តែងចេញដោយសារបម្រើ អធិដ្ឋាននៅក្នុងភាពស្ងៀមស្ងាត់និងលាក់កំបាំង។
នៅក្នុងរបបប្រល័យពូជសាសន៍ប៉ុល ពត អ្វីៗគ្រប់យ៉ាងត្រូវបានបំផ្លាញ រួមទាំងសាសនាផងដែរ ដែលមនុស្សជាច្រើនបានហៅថា «ឆ្នាំសូន្យ»។ ប្រជាជនគ្មានសេរីភាព គ្មានការអប់រំ គ្មានការប្រតិបត្តិសាសនា គ្មានគ្រួសារ គឺអ្វីៗត្រូវស្ថិតក្រោមការគ្រប់គ្រងដោយអង្គការ។ ប្រជាជនត្រូវធ្វើការងារយ៉ាងទម្ងន់នៅលើវាលស្រែដោយខ្វះខាតអាហារ។
លោកអភិបាលខ្មែរ យ៉ូសែប ឆ្មារសាឡាស់ និងសហការីរបស់គាត់, លោកអភិបាលទេពអ៊ីម សុត្ថា រួមនិងបូជាចារ្យ និងបងប្រុស បងស្រី ត្រូវបានស្លាប់និងសម្លាប់នៅក្នុងរបបវាលពិឃាតមួយនេះ។ តាមការឲ្យដឹងរបស់រដ្ឋាភិបាល ក្នុងរបបនេះ មានអ្នកស្លាប់ចំនួនប្រមាណជិត២លាននាក់។
ជាមួយគ្នានេះដែរ លោកអភិបាលអូលីវីយេ បានសុំឲ្យគ្រីស្តបរិស័ទចេះស្វែងរកអ្នកក្រីក្រដែលស្រេកឃ្លាន ដែលមិនត្រឹមតែរូបកាយប៉ុណ្ណោះទេ តែជាវិញ្ញាណ ដែលរួមជាមួយព្រះជាម្ចាស់។
មុនពេលបិទបញ្ចប់ធម្មទេសនា លោកអភិបាលបានចោទសំណួរបី ដើម្បីឲ្យគ្រីស្តបរិស័ទឆ្លើយតប។ លោកអភិបាលអូលីវីយេ «គ្រីស្តបរិស័ទត្រូវសុខចិត្តទទួលខុសត្រូវព្រះសហគមន៍របស់ខ្លួន អស់ពីជំនឿ និងសេចក្ដីក្លាហាន, សុខចិត្តប្រកាសដំណឹងល្អ ដោយលះបង់ចោលមាសាតាំង និងអ្វីដែលរារាំងផ្លូវក្នុងការប្រកាសដំណឹងល្អ, សុខចិត្តបើកដួងចិត្តយ៉ាងពិតប្រាកដ ដើម្បីមានចិត្តស្រឡាញ់ អាណិតមេត្តាដល់មនុស្សតូចតាចនៅក្នុងសង្គម»។
បងស្រី ស្រី សុជាតិ ជាដូនជីក្នុងក្រុមគ្រួសារស្រលាញ់ឈើឆ្កាងព្រះយេស៊ូមានប្រសាសន៍ថា វាជារឿងសំខាន់ណាស់ដែលយើងប្រារព្ធពិធីរំលឹកអំពីអ្នកស្លាប់ដោយជំនឿនៅថ្ងៃនេះ។ បងស្រី សុជាតិ «ពួកគាត់គឺជាគំរូ និងជាគ្រឹះនៃជំនឿរបស់យើង ដែលនាំឲ្យយើងទាំងអស់គ្នាមានគ្រឹះរឹងមាំបន្តជំនឿនេះនៅក្នុងព្រះសហគមន៍រហូតមកដល់សព្វថ្ងៃ»។
លោកអឹង ទ្រី អាយុ៧៦ឆ្នាំ ជាគ្រីស្តបរិស័ទ បានឲ្យដឹងថា គាត់មិនដែលបំភ្លេចបទពិសោធក្នុងរបបប៉ុលពតនោះទេ។ លោកបន្តថា លោកត្រូវបានបង្ខំឲ្យធ្វើការងារលើកទំនប់ដោយគ្មានអាហារគ្រប់គ្រាន់។ លោកថា «៣កំប៉ុង មនុស្សមួយកងចល័ត ៤០នាក់»។
ក្នុងរបបនេះ លោកទ្រីបានបាត់បង់ញាតិសន្តានប្រមាណជា១៥នាក់។ គាត់និយាយថា ដោយសារជំនឿចំពោះព្រះជាម្ចាស់ គាត់បានអត់ទោសឲ្យពួកគេដែលបានធ្វើបាបរូបលោកនិងសាច់ញាតិ។ លោកអឹងទ្រី «ដោយសារយើងជឿលើព្រះបន្ទូល យើងមានមេត្តាករុណា។ យើងអត់មានចងកំហឹងលើគាត់ទៀតទេ។ (អធិដ្ឋាន)ទៅព្រះជាម្ចាស់ទទួលគាត់ផងដែរ»៕
