ការិយាល័យយុវជន ជំទង់ និងកុមារ ភូមិភាគភ្នំពេញ បានរៀបចំសិក្ខាសាលាមេក្រុមកាយឫទ្ធិទូទាំងភូមិភាគ ក្រោមប្រធានបទ “ខ្ញុំអាចធ្វើបាន” កាលពីថ្ងៃទី១៨ ដល់ថ្ងៃទី២០ ខែតុលា ឆ្នាំ២០១៩ នៅព្រះសហគមន៍កាតូលិកសន្តីម៉ារីញញឹមចំការទៀង ស្រុកត្រាំកក់ ខេត្តតាកែវ ដែលមានសិក្ខាកាមប្រមាណជាង១៦០នាក់ចូលរួម។
លោក ស៊ាន់ សារឿន ប្រធានការិយាល័យយុវជន ជំទង់ និងកុមារភូមិភាគភ្នំពេញ បានប្រាប់ឲ្យដឹងថា នេះជាសិក្ខាសាលាលើកទី១០ សម្រាប់ប្រធានមេកាយឬទ្ធិទាំងអស់ក្នុងភូមិភាគភ្នំពេញ ចាប់តាំងពីការិយាល័យមាននៅឆ្នាំ២០១០។ សិក្ខាសាលានេះ មានរយៈពេលបីថ្ងៃក្រោមប្រធានបទ “ខ្ញុំអាចធ្វើបាន” ដើម្បីលើកទឹកចិត្តដល់មេកាយឫទ្ធិទាំងអស់បានដឹងថា គេមានសមត្ថភាព មានលទ្ធភាព មានចំណេះដឹង អាចជួយអប់រំ ណែនាំ និងជួយបម្រើព្រះសហគមន៍បានដោយការទទួលខុសត្រូវ និងសេចក្តីស្រលាញ់។ លោកសារឿនបន្តថា ក្នុងកម្មវិធីនេះ គឺមានការអប់រំ បណ្តុះបណ្តាលពីវិធីសាស្ត្រមួយចំនួន ការប្រើប្រាស់សម្ភារមួយចំនួន មាន សៀវភៅជាដើម។ ក្នុងនោះក៏មានរបៀបឲ្យគេមានទំនាក់ទំនងគ្នាកាន់តែជិតស្និតឡើង ព្រមទាំងចែករំលែកបទពិសោធន៍អំពីកិច្ចបម្រើរបស់ពួកគេដែរ។
លោកប្រធានបន្តថា វាពិតជាមានអំណរសប្បាយដែលបានឃើញមេក្រុមកាយឬទ្ធិជាច្រើនបានសុខចិត្តលះបង់ពេលវេលា ដើម្បីជួយបម្រើជួយព្រះសហគមន៍ ជាពិសេសជួយក្មេងៗ។ លោក សារឿនក៏សង្ឃឹមថាមេក្រុមកាយឫទ្ធិទាំងអស់នឹងពាំនាំបទពិសោធន៍ ចំណេះដឹង និងការទទួលខុសត្រូវរបស់យើង ដើម្បីបន្តអនុវត្ត បន្តយកចិត្តទុកដាក់ និងបន្តជួយបម្រើព្រះសហគមន៍យ៉ាងពិតប្រាកដមែន។
ចំពោះបូជាចារ្យតាមព្រះសហគមន៍ ក៏ដូចជាតាមមណ្ឌលសកម្មភាព លោកសារឿនសុំ ជួយបន្តជម្រុញ គ្រាំទ្រ និងលើកទឹកចិត្តពួកគេថែមទៀត ដើម្បីពួកគេមានកម្លាំងហើយជួយបម្រើព្រះសហគមន៍។
យុវតី អ៊ិច រីណា ជាមេក្រុមកាយឬទ្ធិមកពីព្រះសហគមន៍សន្តយ៉ូសែបជុំគិរី ខេត្តកំពត បានថ្លែងថា បន្ទាប់ពីបានចូលរួមសិក្ខាសាលាមេក្រុមកាយឬទ្ធិរយៈបីថ្ងៃនេះ ធ្វើឲ្យប្អូនបានពង្រឹងសេចក្តីក្លាហានរបស់ខ្លូន និងទទួលបាននូវចំណេះដឹងថ្មីៗ ដូចជាការសង្រ្គោះបឋម ចំពោះករណីពស់ចិក ករណីលង់ទឹក ករណីឆក់ចរន្តអគ្គិសនីជាដើម។ យុវតី រីណា ក៏បានតាំងចិត្តថានឹងយកចំណេះដឹងដែលប្អូនទទួលបានពីអង្គសិក្ខាសាលានេះ ទៅបង្ហាត់បង្រៀនដល់ប្អូនៗកាយឫទ្ធិដែលមាននៅព្រះសហគមន៍របស់ខ្លួន។
ថ្លែងនៅក្នុងធម្មទេសនា លោក អូលីវីយេ អភិបាលព្រះសហគមន៍កាតូលិកភូមិភាគភ្នំពេញ បានណែនាំដល់មេក្រុមកាយឫទ្ធថា សម្រាប់យើងជាមេក្រុមកាយឫទ្ធិ អាចប្រកាសដំណឹងល្អរបៀបណានៅក្នុងតួនាទីរបស់យើងមេកាយឫទ្ធិ។ មេកាយឬទ្ធត្រូវតែទទួលការអប់រំឲ្យពេលក្រោយយើងអាចអប់រំបន្ត ឲ្យយើងចេះទទួលខុសត្រូវ កែតម្រង់ ធ្វើជាមនុស្សសុចរិតដែលមានចិត្តស្មោះ។ លោកអភិបាលបន្តថា ពេលយើងឯកភាពធ្វើមេក្រុមកាយឫទ្ធិ មានន័យថាយើងឯកភាពធ្វើជាអ្នកបម្រើព្រះជាម្ចាស់ បម្រើកូនក្មេង បម្រើព្រះសហគមន៍ បម្រើសង្គម។
លោកអភិបាលក៏បានផ្តាំផ្ញើមេកាយឫទ្ធិទាំងអស់ពេលត្រឡប់ទៅវិញសូមទៅជួបលោកឪពុកតាមព្រះសហគមន៍ ដើម្បីនិយាយអំពីកម្មវិធីកាយឫទ្ធិ ឲ្យលោកឪពុកចូលរួមប្រជុំជាមួយមេក្រុមកាយឫទ្ធិមួយខែម្តង ដើម្បីរៀបចំមេរៀននិងកម្មវិធីកាយឫទ្ធិនៅខែបន្ទាប់។ ណែនាំដល់ក្មេងៗដោយមានចិត្តអត់ធ្មត់ឲ្យគេចូលនៅក្នុងជីវិតជាកាយឫទ្ធិ ចេះស្រឡាញ់ធម្មជាតិ ចេះគោរពចាស់ទុំ ចេះគោរពសង្គមជាតិ ចេះគោរពសាសនា មានចិត្តមេត្តាករុណា… ព្រោះថាកាយឫទ្ធិត្រូវការត្រៀមជានិច្ច។
