លោកអភិបាលអូលីវីយេ ជ្មីតអីស្ល៊ែរ ចូលរួមជាអធិបតីក្នុងពិធីបើកបវេសនកាល វិទ្យាល័យសម្តេចក្រុមព្រះ និង ព្រះអង្គម្ចាស់ក្សត្រិយ នរោត្តម ម៉ារីរណឫទ្ធិ អង្គរនាប នាព្រឹកថ្ងៃទី០១ ខែវិច្ឆិកា ឆ្នាំ២០១៩ ដោយរួមជាមួយ លោក សាយ វណ្ណៈ អភិបាលរងស្រុកត្រាំកក់ លោក យន់ យ៉ុង អនុប្រធានការិយាល័យមធ្យមសិក្សានៃមន្ទីរអប់រំ យុវជន និងកីឡា ខេត្តតាកែវ និងមានការចូលរួមដោយលោកគ្រូអ្នកគ្រូ បុគ្គលិកសិក្សា និងសិស្សានុសិស្ស ជិត២០០០នាក់។
លោកអភិបាល អូលីវីយេ អភិបាលព្រះសហគមន៍កាតូលិកភូមិភាគភ្នំពេញ បានថ្លែងក្នុងអង្គពិធីថា លោកមកចូលរួមថ្ងៃនេះ ក្នុងនាមជាមិត្តសម្លាញ់នៃការសិក្សា។ លោកបានមានប្រសាសន៍ទៀតថា មនុស្សដែលពេញលក្ខណៈជាមនុស្សដែលចិញ្ចឹមខួរក្បាលផង ដែលថែរក្សារូបកាយផង ដែលយកចិត្តទុកដាក់លើផ្លូវវិញ្ញាណផង និងរស់នៅក្នុងពិភពដែលយើងបានទទួល។ ដូច្នេះ ចំណេះដឹងជាកត្តាសំខាន់ ហើយយើងត្រូវចេះថែរក្សាទេពកោសល្យ ថែរក្សាសាមគ្គីភាពជាមួយមនុស្សនៅក្នុងសង្គម និងចេះចិញ្ចឹមផ្លូវវិញ្ញាណ។
នៅក្នុងនោះដែរលោកអភិបាលបានផ្តល់នូវពាក្យបួនឃ្លាដែលក្នុងនោះមាន សមត្ថភាព ឧត្តមភាព មេត្តា និងករុណា ដល់សិស្សានុសិស្សទាំងអស់។ លោកបញ្ជាក់ថា ការសិក្សាអប់រំគឺ ឲ្យយើងខិតខំអស់ពីសមត្ថភាព ឲ្យយើងថែរក្សាឧត្តមភាពដើម្បីចូលរួមនៅក្នុងអនាគតនៃប្រទេសជាតិ និងការពារថែរក្សាចិត្តមេត្តានិងករុណា ដែលណែនាំឲ្យយើងអភិវឌ្ឍនៅក្នុងសុខសន្តិភាព។
វិទ្យាល័យសម្តេចក្រុមព្រះ និង ព្រះអង្គម្ចាស់ក្សត្រិយ នរោត្តម ម៉ារីរណឫទ្ធិ អង្គរនាប ស្ថិតនៅតាមបណ្តោយផ្លូវជាតិលេខ៣ ក្នុងភូមិអង្គរនាប ឃុំត្រាំកក់ ស្រុកត្រាំកក់ ខេត្តតាកែវ។
លោកគ្រូ អ៊ូ ហេង នាយកវិទ្យាល័យនេះ មានប្រសាសន៍ថា ទិសដៅរបស់សាលានេះ គឺពង្រឹង ការបង្រៀននិងរៀនឲ្យមានប្រសិទ្ធភាព រៀបចំកែលម្អបរិស្ថាននិងអនាម័យសាលារៀនឲ្យបានល្អ ជំរុញផ្នែកបំណិនជីវិតឲ្យមានដំណើរការល្អ និងទទួលបានជោគជ័យ ធ្វើឲ្យមានការទំនាក់ទំនងល្អជាមួយសហគមន៍ជាតិ អន្តរជាតិ ដើម្បីជួយអភិវឌ្ឍន៍សាលារៀន។
លោកនាយក ក៏បានថ្លែងអំណរអរគុណដល់ព្រះសហគមន៍កាតូលិកភូមិភាគភ្នំពេញ ដែលមានលោកអភិបាល អូលីវីយេ ជាប្រមុខ ដែលតែងតែជួយឧបត្ថម្ភនិងមានទំនាក់ទំនងល្អរវាងគ្នានិងគ្នាតាំងពីដើមរៀងមក។
ក្នុងកម្មវិធីនោះដែរលោកអភិបាល បានជូនកុំព្យូទ័រលើតុចំនួន២៥គ្រឿង និងសម្ភារការិយាល័យមួយចំនួនដល់សាលា សៀវភៅសរសេរចំនួន៣២០០ក្បាលដល់សិស្សានុសិស្ស និងផលិតផលសិប្បកម្មរបស់ព្រះសហគមន៍កាតូលិក ព្រមទាំងថវិកាមួយចំនួនជូនលោកគ្រូអ្នកគ្រូ និងបុគ្គលិកសិក្សា៕
ដោយង៉ែត សុធីរិទ្ធ
