លោកអភិបាលអូលីវីយេមានប្រថា៖”សូមឲ្យព្រះសហគមន៍នីមួយទៅជាឪពុកម្តាយ បង្កតើបូជាចារ្យថ្មីៗ។ ដោយសារព្រះសហគមន៍យើងខ្វះបូជាចារ្យសម្រាប់សាបព្រោះ (ប្រកាសដំណឹងល្អ) ដើម្បីអប់រំ ដើម្បីដឹកនាំ និងខ្វះបូជាចារ្យ ក្នុងការថ្វាយសក្ការបូជា ដើម្បីឲ្យវត្តរបស់ព្រះយេស៊ូគ្រីស្តចូលយ៉ាងជ្រៅក្នុងដួងចិត្តរបស់យើង”។
លោកអភិបាលមានប្រសាសន៍បែបនេះ ក្នុងធម្មទេសនា នៃពិធីបុណ្យអភិបូជាអធិដ្ឋានពេញមួយយប់សម្រាប់ការត្រាស់ហៅ លើកទី៨៧ នៅព្រះសហគមន៍ភ្នំពេញថ្មី ព្រះវិហារសន្តសិលា និងសន្តប៉ូល កាលពីល្ងាចថ្ងៃទី៧ ខែវិច្ឆិកា ឆ្នាំ២០១៩នេះ។
លោកអភិបាលបានបន្តលើកទឹកចិត្តគ្រីស្តបរិស័ទ ឲ្យយកចិត្តទុកដាក់ថែរក្សាលោកបូជាចារ្យដែលយើងមានក្នុងព្រះសហគមន៍។កុំឲ្យលោកទៅជាអ្នកបើកបរឡានសម្រាប់គ្រីស្តបរិស័ទ ឲ្យលោករត់ចុះឡើងសម្រាប់កិច្ចការដែលមិនត្រូវនឹងមុខងារតួនាទីរបស់លោកជាបូជាចរ្យ។លោកថាដើម្បីឲ្យលោកបូជាចារ្យអាចបំពេញមុខងាររបស់លោកជាបូជាចារ្យ សម្រាប់ឲ្យកូនចៅគ្រីស្តបរិស័ទបានឃើញគំរូរបស់បូជាចារ្យ ហើងចង់ក្លាយជាបូជាចារ្យបម្រើព្រះសហគមន៍ដែរ។
លោកបន្តថា សូមឪពុកម្តាយជាគ្រីស្តបរិស័ទត្រូវគិតគូកុំមានកូនសម្រាប់តែបម្រើការងារសង្គមប៉ុណ្ណោះ គឺមានកូនដើម្បីបម្រើព្រះសហគមន៍ផងដែរ។ លោកអភិបាលបញ្ជាក់បន្ថែមថា យើងបន្តអធិដ្ឋានដើម្បីឲ្យមានអ្នកសាបព្រោះពិសេស គឺ “បូជាចារ្យ” ក្នុងព្រះសហគមន៍យើង។
ព្រះសហគមន៍កាតូលិកនៅប្រទេសកម្ពុជា បានរស់ឡើងវិញក្រោយរបបសម្លាប់រង្គាលដួលរលំ និងសង្គ្រាមដ៏រ៉ាំរ៉ៃ បានបញ្ចប់ នាដើមទស្សវត្ស ១៩៩០។ រហូតមកដល់ដែលពេលនេះ មានបូជាចារ្យ និងសាសនទូតជាច្រើនមកពីប្រទេសផ្សេងៗ ដើម្បីណែនាំ និងបម្រើព្រះសហគមន៍នៅក្នុងប្រទេសកម្ពុជា។សម្រាប់ភូមិភាគភ្នំពេញ មានបូជាចារ្យជាតិកម្ពុជាតិចតួចបំផុតមានចំនួនតែ ៣នាក់ប៉ុណ្ណោះ។
ព្រះសហគមន៍កាតូលិកភូមិភាគភ្នំពេញ ក្រោមការណែនាំរបស់លោកអភិបាលអូលីវីយេ បានបង្កើតឲ្យមានកម្មវិធីផ្សេងៗដើម្បីអប់រំ និងជួយយុវជនរិះគិតអំពីការត្រាស់ហៅរបស់ព្រះជាម្ចាស់ ដើម្បីបម្រើព្រះសហគមន៍។ ការអធិដ្ឋានពេញមួយយប់ក៏ជាកម្មវិធីមួយដើម្បីបើកចិត្តគំគិតរបស់យុវជន ក្រោមឫទ្ធានុភាពរបស់ព្រះវិញ្ញាណដ៏វិសុទ្ធ ឲ្យគេចេះឆ្លើយតបនឹងការត្រាស់របស់ព្រះជាម្ចាស់ក្នុងជិវិតជាបូជាចារ្យ។
