កុមារាកុមារីមកពីភូមិនានា នៅជុំវិញព្រះសហគមន៍កាតូលិក ព្រះវិហារសន្តីម៉ារីញញឹម ប្រមាណ៣០០០ នាក់ ជួបជុំគ្នាក្នុងពិធីបុណ្យព្រះយេស៊ូប្រសូត ប្រកបដោយអំណរសប្បាយ និងរីករាយយ៉ាងក្រៃលែង។
កុមារាកុមារីបានទទួលដំណឹងទាំងអស់អំពីបុណ្យកំណើតព្រះយេស៊ូតាមរយៈក្រុមកាយឫទ្ធិដែល បានប្រាប់មិត្តភក្តិរបស់គេតៗគ្នា នៅតាមសាលា តាមភូមិដែលគេនៅ។
តាមប្រសាសន៍របស់លោកអភិបាល អូលីវីយេ ដែលបានមកដល់ភូមិដ៏តូចមួយ ក្នុងឃុំគូសស្រុកត្រាំកក់នេះ កាលលោកនៅជាបូជាចារ្យវ័យក្មេងម្នាក់បានឲ្យដឹងថា “តាមពិតកម្មវិធីនេះបានចាប់ផ្ដើមតាំងពីឆ្នាំ ២០០៤ ជាមួយនឹងក្រុមកាយឫទ្ធិមួយចំនួន បន្តិចម្ដងៗគេនិយាយតៗគ្នាថាបុណ្យណូអែលបានមកដល់ហើយ ។ យើងចែករំលែកអំណរសប្បាយជាមួយគ្នា។ ក្រោយមកគេថា យើងចង់ចូលព្រះវិហារម្ដង ដូច្នេះគេបបួលគ្នាមកហើយពីមួយឆ្នាំទៅមួយឆ្នាំមានចំនួនការកើនឡើងជាលំដាប់ ពី២០០ ៥០០០ 1000 ១៥០០ ២០០០ ២៥០០ និងពេលនេះដល់ជិត 3000 ឬ 3000 ហើយ “។
លោកអភិបាលបន្តថា យើងដឹងថា នេះគឺកូនក្មេងដែលអញ្ជើញគ្នាទៅវិញទៅមក ដើម្បីមកអបអរសាទរព្រះយេស៊ូប្រសូត។ ខ្លះជាមេកកាយឫទ្ធិ និងជាយុវជនដែលមានទំនាក់ទំនងនៅក្នុងភូមិ ដើម្បីចែកអំណរសប្បាយនៅបុណ្យអែលព្រះយេស៊ូប្រសូត”។
លោកអភិបាលបញ្ជាក់ថា ព្រះយេស៊ូប្រសូតមិនមែនសម្រាប់តែគ្រីស្តបរិស័ទ មិនមែនសម្រាប់តែគ្នាយើង ប៉ុន្តែព្រះយេស៊ូប្រសូតសម្រាប់ជាពន្លឺដើម្បីបំភ្លឺមនុស្សទាំងអស់។ លោកអភិបាលបន្តថា “នៅទីនេះ កុមារបានឃើញការសម្ដែងអំពីព្រះយេស៊ូប្រសូត គេច្រៀងបទចម្រៀងសរសើរផង នាំឲ្យនឹកឃើញដល់អំពីជីវិតរបស់គេ។ ខ្លះទៀតបាននឹកឃើញថា គេមិនឯកោ ហើយគេមានគ្រួសារមួយដែលមានចំនួនរាប់ពាន់នាក់ មានបងៗ មានមនុស្សពេញវ័យជាមនុស្សចាស់ ដែលឃើញកូនយើងជាអ្នកជំនាន់ក្រោយជាកម្លាំង ដើម្បីកសាងប្រទេសកម្ពុជាមែន ដើម្បីឲ្យស្រុករបស់យើងរីកចម្រើនតទៅទៀត”។
កុមារាកុមារីទាំងនោះខ្លះបានមកតាំងពីព្រលឹម ដោយចិត្តអន្ទះសារ ក្នុងការចូលរួម និងចង់មើលការសម្តែងអំពីកំណើតព្រះយេស៊ូផង។
កុមារភារី ដែលមកដល់ព្រះវិហារតាំងពីមុនម៉ោង៦ព្រឹកបាននិយាយថា “ខ្ញុំក្រោកតាំងពីព្រលឹម រួមជាមួយប្អួន និងមិត្តភក្តិ៣នាក់ទៀតជិះកង់ចេញពីផ្ទះ ដើម្បីមកព្រះវិហារនេះ ដើម្បីចូលរួមបុណ្យណូអែល។ ម៉ែ និងឪមិនថាអីទេ។ ខ្ញុំបានសុំគាត់ហើយ។” ភារីបន្តថា គេធ្លាប់ចូលរួមពីរដងហើយ ពិតជាសប្បាយណាស់។
ក្នុងពេលជួបជុំនេះ ក៏មានសម្តែងអំពីកំណើតព្រះយេស៊ូដោយកុមារាកុមារី សិស្សសាលាមត្តេយ្យសន្តហ្វ្រង់ស្វ័រ ឲ្យកុមារទាំងអស់បានទស្សនា ព្រមទាំងចែកវត្ថុអនុស្សាវរីយ៍អប់អសាទរបុណ្យព្រះយេស៊ូប្រសូតដល់កុមាទាំងនោះម្នាក់មួយកញ្ចប់ផងដែរ។
លោកអភិបាលអូលីវីយេមានប្រសាសន៍ដែរថា អ្វីៗដែលរៀបចំចែករំលែកអំណរសប្បាយជាមួយកុមារប្រមាណ៣០០០ ដោយរលូន និងអំណរសប្បាយ ដោយសារការចេះសហការណ៍គ្នាទៅវិញទៅមក ជាលក្ខណៈគ្រួសារ។ ពិតជាពិសេសណាស់។ លោកបានលើកនូវទស្សនៈដែលលោកតែងអប់រំត្រូវប្រកាន់យកគឺ មេត្តា ករុណា ឧត្តមភាព និង គុណភាព៕
អត្ថបទដោយ លោក លីសុវណ្ណា
