ព្រះសហគមន៍កាតូលិកភូមិចំការទៀង ព្រះវិហារសន្តី ម៉ារីញញឹម បានប្រារព្ធពិធីបុណ្យយ៉ាងឱឡារិក កាលពីថ្ងៃទី ២៣ ខែធ្នូ ឆ្នាំ ២០១៩ ដើម្បីអបអរសាទរខួប១០ឆ្នាំ ជូនលោកអភិបាលអូលីវិយេ ដែលសម្តេចប៉ាប បានជ្រើសតាំងលោកជាអភិបាលឧបត្ថម្ភកៈ នៃព្រះសហគមន៍កាតូលិកភូមិភាគភ្នំពេញ។
លោកអភិបាលអូលីវីយេ ត្រូវបានសម្តេចប៉ាប មេណេឌីកតូទី១៦ បានជ្រើសតាំងជាអភិបាល ឧបត្ថម្ភកៈនៃព្រះសហគមន៍កាតូលិកភូមិភាគភ្នំពេញ កាលពីថ្ងៃទី ២៤ខែធ្នូ ឆ្នាំ ២០០៩ វេលាម៉ោង ៦ល្ងាចនៅកម្ពុជា ក្នុងពេលដែលព្រះសហគមន៍ទាំងអស់នៅកម្ពុជាកំពុងប្រារព្ធបុណ្យព្រះយេស៊ូប្រសូត។ សេចក្តីជូនដំណឹងនេះកាលនោះ ដូចពួកកង្វាលទទួលដំណឹងអំពីកំណើតព្រះយេស៊ូយ៉ាងនោះដែរ គឺព្រះសហគមន៍កាតូលិកភូមិភាគភ្នំពេញ ពោរពេញដោយអំណរដែលនឹងទទួលគង្វាលថ្មីម្នាក់ ដើម្បីណែនាំហ្វូងចៀមរបស់ព្រះអង្គ ក្នុងពេលដែលលោកអភិបាល អេមីល ដេតម្ប កំពុងស្ថិតក្នុងវ័យជរា នឹងត្រូវចូលនិវត្តន៍នាពេលឆាប់ៗខាងនោះ។
លោកអូលីវិយេទទួលអគ្គសញ្ញាតែងតាំង ជាអភិបាល នៅថ្ងៃទី២០ ខែមីនា ឆ្នាំ២០១០ និងទទួលមុខងារជាអភិបាលព្រះសហគមន៍កាតូលិកភូមិភ្នំពេញ ពេញសិទ្ធិនៅថ្ងៃទ១ ខែតុលា ឆ្នាំ២០១០ បន្តពីលោកអភិបាលអេមីល ដេតម្ប។
និយាយដោយលែក សម្រាប់ព្រះសហគមន៍កាតូលិកសន្តីម៉ារីញញឹម បានទទួលស្វាគមន៍លោកឪពុកអូលីវីយេ ចុងឆ្នាំ ២០០១ ជាពេល លោកថ្វាយអភិបូជាបុណ្យណូអែលលើកដំបូងនៅចំការទៀងដែរ។
ចាប់ពីពេលនោះមក ព្រះសហគមន៍មួយដែលនៅដាច់ស្រយាល និងចំនៅកណ្តាលវាលស្រែបានប្រែមុខមាត់បន្តិចម្តងៗ ដែលចាប់ផ្តើមដោយគ្រីស្តបរិស័ទតែម្នាក់ ហើយឆ្នាំបន្ទាប់ពេលលោកអូលីវីយេបានទៅដល់មានបងប្អូនមួយចំនួនទទួលអគ្គសញ្ញាជ្រមុជទឹក។ ជាបន្តបន្ទាប់ ព្រះសហគមន៍រីកចម្រើន និង មានជីវិតរស់រវើកឡើងរហូតដល់សព្វថ្ងៃ។
ស្ថិតក្នុងឱកាសដ៏វិសេសវិសាលនេះ លោកកុល ជាង ជាតំណាងគ្រីស្តបរិស័ទបានថ្លែងថា៖ « រាត្រីនេះជារាត្រីដ៏សុខសាន្ត ព្រះជាម្ចាស់បានចងសម្ព័ន្ធមេត្រីភាពជាមួយប្រជារាស្រ្តរបស់ព្រះអង្គនៅលើផែបដីយើងនេះ។ រាត្រីនេះដែរ ជារាត្រីនៃពន្លឺដ៏ត្រចះត្រចង់ក្នុងពិភពលោក ជាពន្លឺនៃការសង្រ្គោះដែលភ្លឺពីព្រះកាយ ព្រះហប្ញទ័យមេត្តា ករុណា នៃព្រះឱរសយេស៊ូគ្រីស្ត ជាព្រះរាជបុត្រា នៃព្រះដែលមានព្រះជន្មគង់នៅ។ រាត្រីដ៏ពិសិដ្ឋនេះជារាត្រី ដែលពពេញដោយអំណរសប្បាយ ពោរពេញដោយស្នាមញញឹម ថ្វាយនូវភាពអំណរសាទរ ទៅព្រះជាម្ចាស់ដោយច្រៀងតម្កើងសិរីរុងរឿងនៅក្នុងពិធីអភិបូជានៃសក្ការបូជាដ៏ឱឡារិករបស់គ្រីស្តបរិស័រយើង។ ពន្លឺភ្លើងចម្រុះព៌ណលំអ បន្លិចក្នុងព្រះពន្លាព្រះយេស៊ូប្រសូត ព្រះឱរសយេស៊ូផ្ទំក្នុងស្នូកសត្វយ៉ាងស្កប់ស្កល់ នាងម៉ារី លោកយូសែប ហោរាចារ្យ ពួកគង្វាល ថ្វាយតង្វាយ និងថ្វាយបង្គំព្រះឱរស ដោយជ្រះថ្លា។ ក្នុងនាមយើងជាកូនចៀម សូមថ្វាយបង្គំព្រះអង្គរួមជាមួយលោកអភិបាល ជាគ្រូគង្វាលដ៏សប្បុរសរបស់យើងខ្ញុំ និងជាសាសនទូតរបស់ព្រះអង្គ!!!។
លោក កុល ជាង បន្តថា នៅពេលយើងខ្ញុំទទួលនូវអំណរដ៏វិសេសវិសាលនៃពិធីបុណ្យព្រះយេស៊ូប្រសូត នាឱកាសដ៏ពិសិដ្ឋនេះ យើងខ្ញុំសូមចូលរួមអបអរសាទរគម្រប់ខួប១០ឆ្នាំ ការជ្រើសតាំងលោកអភិបាល ជាអភិបាលឧបត្ថម្ភកៈនៃព្រះសហគមន៍កាតូលិកប្រចាំភូមិភាគភ្នំពេញ ដែលក្រោយមកជាអភិបាលពេញសិទ្ធិ។
លោក កុលជាង ក៏បានរៀងរាប់ អំពីកិច្ចការជាច្រើនដែលលោកអភិបាលបានបំពេញក្នុងកំឡុង១០ឆ្នាំកន្លងមកនេះ គឺលោកបានបំពេញបេសកកម្មរបស់ព្រះជាម្ចាស់ដោយចិត្តមេត្តាករុណា ដោយមនសិការ និងឧត្តមភាព។ គ្រប់ពេលវេលាទាំងអស់លោកអភិបាល គឺជាសក្ខីភាព បង្ហាញនូវសេចក្តីស្រឡាញ់ ជំនឿ និង ព្រះហប្ញទ័យប្រណីសន្តោស ដែលមកពីព្រះជាម្ចាស់ផ្ទាល់ ដោយបាននាំអ្នកទន់ខ្សោយ ទុគ៌តជន ឲ្យចូលទៅក្នុងសង្គមមានតម្លៃថ្លៃថ្នូរ ហើយប្រែក្លាយបេះដូងបងប្អូនទាំងនោះ ទៅជាបេះដូងនៃសេចក្តីស្រឡាញ់ បេះដូងនៃសេចក្តីសង្ឃឹម និងជីវិតថ្មី។ស្របជាមួយគ្នានេះ ស្នាដៃសិល្បៈ ផលផ្លែនៃគំនិតច្នៃប្រឌិតដ៏រស់រវើក ផ្កានៃជីវិតខាងផ្លូវវិញ្ញាណបានរីកសាយ ក្នុងដួងចិត្តយើងម្នាក់ៗ ការយកចិត្តទុកដាក់ក្នុងសេចក្តីស្រឡាញ់ បានបង្កើតឲ្យមាន ការសហការគ្នា ការសន្ទនាគ្នា សាមគ្គីភាព ភារតរភាព ជាធ្លុងតែមួយក្នុងមហាគ្រួសារតែមួយ ក្រោមដំបូលនៃតំបូន្មាន និងការដឹកនាំដ៏ប៉ិនប្រសប់ របស់លោកអភិបាលផ្ទាល់ ។ ពន្លឺនៃសេចក្តីស្រឡាញ់ ពន្លឺនៃសន្តិភាព ពន្លឺនៃសេចក្តីសង្ឃឹម បាននឹងកំពុងរះក្នុងដួងចិត្តយើងខ្ញុំម្នាក់ៗ។
តំណាងព្រះសហគមន៍រូបនេះបន្តថា ក្នុងរាត្រីដ៏មហាអស្ចារ្យនេះ យើងខ្ញុំជាគ្រីស្តបរិស័ទសូមបួងសួងដល់ព្រះជាម្ចាស់ និងសូមទូលអង្វរដល់ព្រះឱរសយេស៊ូគ្រីស្ត សូមព្រះអង្គប្រទានពរដល់លោកអភិបាល សូមឲ្យលោកមានសុខភាពល្អបរិបូណ៌ កំលាំងមាំមួនប្រាជ្ញាកាន់តែមានភាពវៃឆ្លាត ដើម្បីជាម្លប់ដ៏ត្រជាក់សម្រាប់គ្រីស្តបរិស័ទ និងជានាវាដ៏រឹងមាំ ដើម្បីដឹកនាំព្រះសហគមន៍ កាតូលិកនៅប្រទេសកម្ពុជានេះកាន់តែមានភាពរីកចម្រើន ជាពន្លឺដ៏ត្រចះត្រចង់ និងជាសក្ខីភាពនៃជំនឿ សម្រាប់កូនទាំងអស់គ្នាជាកាយឬទ្ធិ ជាយុវជន ជាគ្រីស្តបរិស័ទ ជាគណៈកម្មការព្រះសហគមន៍កាតូលិក ជាបព្វជិតបព្វជិតា ទៅជាបុត្រធីតាជាទីគាប់ព្រះទ័យរបស់ព្រះជាម្ចាស់ជានិរន្តរ ។
ជាការពិតសមិទ្ធិផលជាច្រើនដែលលោកអភិបាលបានបំពេញ គឺសម្រាប់ព្រះរាជ្យរបស់ព្រះជាម្ចាស់បានទៅដល់ទីដាច់ស្រយាលនៃផែនដី មនុស្សជាច្រើនបានស្គាល់ព្រះនាមរបស់ព្រះអង្គ និងទទួលបាននូវការសង្គ្រោះ។
