នៅព្រឹកថ្ងៃទី១២ កុម្ភៈ ២០២០ នៅព្រះវិហារសន្តសិលា និងសន្តប៉ូល ភ្នំពេញថ្មី ក្នុងអង្គប្រជុំជាមួយបូជាចារ្យ ភូមិភាគភ្នំពេញ លោកអភិបាល អូលីវីយេ ជ្មីតអ៊ីស្ល៊ែរ បានជំរុញលើកទឹកចិត្តដល់ អស់លោកបូជាចារ្យទាំងអស់ ឲ្យយកចិត្តទុកដាក់កសាងសន្តិភាព តាមសារលិខិតរបស់សម្ដេចប៉ាប ហ្វ្រង់ស៊ីស្កូ សម្រាប់ទិវាសន្តិភាពឆ្នាំ ២០២០ កន្លងទៅ។
លោកអភិបាលអូលីវីយេ បានលើកយកវីដេអូអំពី លោកបណ្ឌិត ណាហ្គាយ ដែលជាជនគំរូ នៅក្នុងប្រទេសជប៉ុន ដោយភ្ជាប់ជាមួយសារលិខិតរបស់សម្ដេចប៉ាបដែលជូនដល់ព្រះសហគមន៍កាតូលិកទូទាំងពិភពលោក សម្រាប់ទិវា សន្តិភាពពិភពលោក កាលពីថ្ងៃទី ១ ខែមករា ឆ្នាំ២០២០ ។ ក្នុងសារនោះក៏មានភ្ជាប់ ខ្លឹមសារនៃព្រឹត្តិការណ៍នៅប្រទេសជប៉ុនផងដែរ ក្រោយពីបានយាងទៅសួរសុខទុក្ខប្រជាជនជប៉ុនកន្លងមក។
លោកអភិបាលអូលីវីយេ បានណែនាំអស់លោកបូជាចារ្យអំពីការកសាងសុខសន្តិភាពសង្កត់ធ្ងន់ទៅលើ៤ចំណុចធំៗ ដូចជា «សេចក្ដីសុខជាការធ្វើដំណើរនៅក្នុងសេចក្ដីសង្ឃឹម» ដោយបញ្ជាក់ថាសម្ដេចប៉ាបបានណែនាំយើងកុំឲ្យភ័យខ្លាច តែរស់នៅក្នុងសេចក្ដីសង្ឃឹម និងភាតរភាព ដោយមានព្រះបិតាតែមួយ ដោយចេះសន្ទនា យកចិត្តទុកដាក់ចំពោះគ្នា។ លោកបន្តថា សម្ដេចប៉ាប បានណែនាំឲ្យយើងនឹកដល់ «សេចក្ដីសុខដែលបានមកពីការចងចាំ» គឺត្រូវស្ដាប់មនុស្សដែលបានឆ្លងនូវទុក្ខលំបាក និងយកចិត្តទុកដាក់ចំពោះប្រយោជន៍រួម។ មួយទៀត «សេចក្ដីសុខ គឺជាផ្លូវឆ្ពោះទៅកាន់ការសម្រុះសម្រួលជាអង្គតែមួយ» ដោយចេះលើកលែងទោសឲ្យគ្នាទៅវិញទៅមក។ និងចុងក្រោយ ធ្វើដូចម្ដេចដើម្បីឲ្យមានការកែប្រែចិត្តគំនិត ដើម្បីយកបរិស្ថានធម្មជាតិដែលជាព្រះអំណោយទានរបស់ព្រះជាម្ចាស់ចូលក្នុងជីវិតយើង។
លោកអភិបាលក៏បានរំឭកបន្ថែមអំពីទ្រព្យសម្បត្តិទាំង៣ដែលជាមធ្យោបាយដល់យើង ក្នុងការកសាងសុខសន្តិភាពនេះផងដែរគឺ៖ ការអប់រំ ការថែទាំងសុខភាព និងបរិស្ថាន។
ក្រៅពីប្រធានបទខាងលើ អង្គប្រជុំក៏បានលើកយកនូវគម្រោងការណ៍របស់ព្រះសហគមន៍ភូមិភាគភ្នំពេញដែលត្រូវគ្រោងធ្វើក្នុងរយៈពេល៣ឆ្នាំនេះមកផងដែរ ដូចជា៖ ការប្រកាសដំណឹងល្អតាមរយៈការបម្រើអ្នកក្រីក្រ សន្ទនាអន្តរសាសនា និងចូលក្នុងវប្បធម៌កម្ពុជា ព្រមទាំងគម្រោងសាងសង់មន្ទីរពេទ្យកាតូលិក ក៏ដូចជាវិសាលវិហារជាដើម។
