គ្រីស្តបរិស័ទនៅព្រះវិហារសន្តយ៉ូសែប ជួបជាគ្នាប្រារព្ធពិធីបុណ្យរោយផេះដែលជាសញ្ញា ចូលក្នុង រដូវអប់ រំពិសេស(រដូវ៤០ថ្ងៃ ឬរដូវត្រណម)ដែលជាប្រពៃណីរបស់ព្រះសហគមន៍កាតូលិក ដែលមាន លោកអូលីវីយេ ជ្មីតអីស្លែរ អភិបាលព្រះសហគមន៍កាតូលិកភូមិភាគភ្នំពេញ ជាអធិបតី នាល្ងាចថ្ងៃទី២៦ ខែកុម្ភៈ ឆ្នាំ២០២០។
នៅក្នុងធម្មទេសនា លោកអភិបាលអូលីវីយេ បានមានប្រសាសន៍អប់រំគ្រីស្តបរិស័ទឲ្យយកចិត្តទុកដាក់ដូចក្នុងអត្ថបទព្រះគម្ពីរដែលព្រះយេស៊ូបានណែនាំ គឺ ធ្វើទាន តមអាហារ និងអធិដ្ឋាននៅក្នុងកន្លែងស្ងាត់កំបាំង។ លោកអភិបាលបញ្ជាក់ទៀតថា សម័យឆ្នាំ២០២០នេះ យើងចូលចិត្តបង្ហាញនៅក្នុងបណ្ដាញសង្គមនូវសកម្មភាពនានាដែលជាស្នាដៃរបស់យើង ប៉ុន្តែថ្ងៃនេះព្រះយេស៊ូបង្រៀនយើងផ្ទុយពីអ្វីដែលយើងធ្វើសព្វថ្ងៃ ទាំងរបៀបតមអាហារ លើកទឹកចិត្តអ្នកឯទៀតៗ ។
លោកអូលីវីយេ បានជំរុញឲ្យ គ្រីស្តបរិស័ទក្នុងរដូវអប់រំពិសេសឆ្នាំ២០២០នេះ ត្រូវយកចិត្តទុកដាក់ នៅក្នុងរយៈពេល៤០ថ្ងៃខាងមុខ ត្រូវចូលយ៉ាងជ្រៅក្នុងជិវិតយើងជាគ្រីស្តបរិស័ទជាសាវ័កព្រះគ្រីស្ត ដោយទូលអអ្វរដើម្បីរួមគ្នាសម្រុះសម្រួលជាមួយព្រះជាម្ចាស់ និងធ្វើជាមនុស្សថ្មី។ លោកបន្តថា «យើងត្រូវអរព្រះគុណព្រះជាម្ចាស់ អរគុណដល់ព្រះសហគមន៍ដែលបានប្រគល់៤០ថ្ងៃឲ្យយើងស្ដាប់ដំណឹងល្អសារជាថ្មី អំពីសេចក្ដីពិត ដែលព្រះយេស៊ូរងទុក្ខលំបាក សោយព្រះទិវង្គត និងមានព្រះជន្មរស់ឡើងវិញ ពិតមែន ដែលជាអាថ៌កំបាំងនៃជំនឿរបស់ពិតមែន»។
លោកអភិបាលបញ្ជាក់ថា៖« ដំណឹងល្អដ៏អស្ចារ្យគឺព្រះយេស៊ូយាងមកដើម្បីសង្រ្គោះយើង ព្រះអង្គបានរងទុក្ខលំបាកដើម្បីប្រមូលទុក្ខលំបាករបស់យើង ព្រះយេស៊ូបានសោយទិវង្គតដោយសារអំពើបាបរបស់យើង និងព្រះយេស៊ូមានព្រះជន្មរស់ឡើងវិញដើម្បីឲ្យយើងទាំងអស់ទទួលជីវិតថ្មីអស់កល្បជានិច្ច»។
លោកអភិបាលអូលីវីយេក៏បានរំលឹកដែរថា សម្តេចប៉ាបបានអញ្ជើញយើងឲ្យយើងជាគ្រីស្តបរិស័ទចូលនៅក្នុងអាថ៌កំបាំងនៃព្រះយេស៊ូមានព្រះជន្មរស់ឡើងវិញ នៃពិធីបុណ្យចម្លងដើម្បីរួមគ្នាយើងមើលឃើញព្រះយេស៊ូនៅលើឈើឆ្កាង ដើម្បីណែនាំឲ្យព្រះយេស៊ូសង្រ្គោះយើង។ មើលឃើញព្រះយេស៊ូនៅលើឈើឆ្កាង ដើម្បីមើលឃើញរបៀបដែលព្រះយេស៊ូរំដោះយើង ទទួលអគ្គសញ្ញាលើកលែងទោសដោយយល់ថាពិតមែន តាមរយៈអគ្គសញ្ញាលើកលែងទោសគឺព្រះបិតាដែលស្រឡាញ់យើងយ៉ាងខ្លាំង ដែលមានព្រះហឫទ័យប្រណីសន្តោសណែនាំឲ្យយើងចូលនៅក្នុងព្រះហឫទ័យប្រណីសន្តោសរបស់ព្រះអង្គ ដើម្បីរស់នៅជាមនុស្សថ្មី។
ជាមួយគ្នានេះក៏ជំរុញបន្ទាន់ ឲ្យគ្រីស្តបរិស័ទកែប្រែចិត្តគំនិតបន្ទាន់ នៅក្នុងជីវិតរបស់យើង ដោយចាប់ផ្តើមពីពេលនេះតទៅចូលនៅក្នុងការសន្ទនាជាមួយព្រះជាម្ចាស់ ជាពិសេសតាមរយៈការអធិដ្ឋាន។ លោកសង្កាត់ធ្ងន់ថា «៤០ថ្ងៃជាពេលវេលាអធិដ្ឋាន ដើម្បីសម្លឹងមើលព្រះជាម្ចាស់ ព្រះអង្គទតមកយើងវិញ និងស្ដាប់គ្នាទៅវិញទៅមកដោយដឹងថា ថ្ងៃនេះព្រះបិតាមានព្រះបន្ទូលសង្គ្រោះជីវិតខ្ញុំ»។
មុនបញ្ចប់ធម្មទេសនា លោកអូលីវិយេរំលឹកគ្រីស្តបរិស័ទថា សូមឲ្យយើងយល់សព្វថ្ងៃពិភពលោករបស់យើងទទួលព័ត៌មានច្រើន ចួនកាលពិត ចួនកាលមិនពិត ដូច្នេះយើងគួរពិនិត្យមើលព័ត៌មានទាំងនោះដោយរកឲ្យឃើញវត្តមាន និងព្រះហឫទ័យរបស់ព្រះជាម្ចាស់ ព្រោះថាសេចក្ដីសុខ អំណរសប្បាយដែលយើងទទួលបានលុះត្រាតែទុកឲ្យព្រះជាម្ចាស់ធ្វើការជាមួយយើងសព្វថ្ងៃ។ដោយសារយើងដឹងថាព្រះយេស៊ូសោយទិវង្គត និងព្រះយេស៊ូមានព្រះជន្មរស់ឡើងវិញ ដើម្បីណែនាំឲ្យខ្ញុំចូលនៅក្នុងជីវិតរបស់ព្រះអង្គអស់កល្បជានិច្ច។
