នៅក្នុងពិធីបុណ្យគោរពព្រះនាងម៉ារីបង្ហាញខ្លួននៅហ្វាទីម៉ា នាថ្ងៃទី១៣ ខែឧសភា ឆ្នាំ២០២០ លោក អូលីវីយេ ជ្មិតហស្លេរ ជាអភិបាលព្រះសហគមន៍កាតូលិកភូមិភាគភ្នំពេញ និងលោកបូជាសួន ហង្សលី ជាតំណាងពេញសិទ្ធិរបស់លោក បានរួមគ្នាថ្វាយអភិបូជានៅទឹកដីមរណសាក្សីនៅភូមិតាំងគោក ឃុំស្រយ៉ូង ស្រុកតាំងគោក ខេត្តកំពង់ធំ ដែលមានគ្រីស្តបរិស័ទចូលរួមចំនួន១០នាក់ និងផ្សាយតាមបណ្តាញ់សង្គម។
ជាទូទៅ ជារៀងរាល់ឆ្នាំ ព្រះសហគមន៍កាតូលិកតែងតែធ្វើពិធីបុណ្យធំ នៅក្នុងខែឧសភា ដើម្បីរំលឹកដល់មរណបុគ្គលដែលបានបូជាជីវិតដោយសារជំនឿនៅក្នុងរបបប្រល័យពូជសាសន៍ប៉ុលពត ដោយមានការចូលរួមពីព្រះសហគមន៍គ្រប់ទីកន្លែងក្នុងប្រទេសកម្ពុជា ក្រោមអធិបតីរបស់លោកអភិបាលនៃព្រះសហគមន៍ទាំងបីអង្គ។ ប៉ុន្តែដោយសារ កលយុគនៃកូវីដ១៩ ព្រះសហគមន៍ត្រូវផ្អាកការជួបជុំនេះ តាមការណែនាំរបស់ក្រសួងសុខាភិបាល ដើម្បីការពារនិងបង្ការការឆ្លងនៃមេរោគនេះ។
មុនពេលអភិបូជា លោកអភិបាលអូលីវីយេបានណែនាំឲ្យគ្រីស្តបរិស័ទចាប់អារម្មណ៍អំពីមរណសាក្សី ដូច្នេះថា យើងថ្វាយអភិបូជា នៅលើអាសនៈពិសេស គឺគ្រែ ដែលសាឡាស់ សាឡឹម និងសំរើន ដែលធ្លាប់ថ្វាយអភិបូជាចុងក្រោយលើគ្រែនេះនៅក្នុងសម័យខ្មែរក្រហម ក្នុងឆ្នាំ១៩៧៧។ លោកបន្ថែមថា នេះជាឱកាសមួយដើម្បីនឹករលឹកដល់មរណសាក្សីរបស់យើង ដោយទូលអង្វរព្រះជាម្ចាស់ ប្រទានពរដល់ព្រះសហគមន៍របស់យើងទាំងមូល តាមរយៈមរណសាក្សីរួមជាមួយព្រះនាងម៉ារី នៅទីក្រុងហ្វាទីម៉ា ដើម្បីនៅក្នុងរដូវកូវីដ១៩នេះ យើងទទួលអំណោយទានមួយយ៉ាងពិសេស «គឺជំនឿ សេចក្តីស្រឡាញ់ និងសេចក្តីសង្ឃឹម»។
ក្នុងធម្មទេសនា លោកបូជាចារ្យសួន ហង្សលី បានលើកឡើងពី៣ចំណុចសំខាន់ៗ ដែលមានតាំងពីការសង្គ្រោះរបស់ព្រះបិតា ការរស់នៅរបស់គ្រីស្តបរិស័ទជាប់នឹងព្រះយេស៊ូ និងភាពជាធ្លុងតែមួយក្នុងជំនឿជាគ្រីស្តបរិស័ទ។
១. ការសង្រ្គោះរបស់ព្រះបិតា ចំពោះមនុស្សលោកតាមរយៈព្រះយេស៊ូ៖
លោកបូជាចារ្យមានប្រសាសន៍ថា យើងនឹកដល់ព្រះបិតាដែលជាម្ចាស់ចម្ការទំពាំងបាយជូរ ដែលក្នុងគម្ពីរជាតិយូដា គេបានប្រៀបធៀបចម្ការទំពាំងបាយជូរទៅនឹងប្រជារាស្ត្ររបស់ព្រះជាម្ចាស់ គឺប្រជារាស្ត្រអ៊ីស្រាអែលដែលព្រះអង្គបានជ្រើសរើស។
លោកបន្ថែមថា «មានព្យាការីផ្សេងៗណែនាំឱ្យគេស្គាល់ព្រះជាម្ចាស់ និងរៀបចំគម្រោងការណ៍ផ្សេងៗដើម្បីសង្គ្រោះមនុស្សលោក។ ក្រោយមកព្រះបិតាបានចាត់ព្រះបុត្រាឱ្យមកសង្គ្រោះ។ តាមរយៈព្រះយេស៊ូ ព្រះអង្គបានជ្រើសរើសយើងទាំងអស់គ្នាទៅជាប្រជារាស្ត្រថ្មីរបស់ព្រះជាម្ចាស់»។
លោកបូជាចារ្យបញ្ជាក់ថា ព្រះបិតាបានបង្កើតគម្រោងការណ៍នេះសម្រាប់មនុស្សលោក ជាពិសេសសម្រាប់គ្រីស្តបរិស័ទ ឱ្យស្ថិតនៅជាប់ជាមួយព្រះអង្គ ដើម្បីបង្កើតផលផ្លែ។
២. របៀបរបស់គ្រីស្តបរិស័ទនៅជាប់ជាមួយព្រះយេស៊ូ៖
លោកតំណាងពេញសិទ្ធិរបស់អភិបាលភូមិភាគភ្នំពេញបន្តថា ក្នុងនាមជាគ្រីស្តបរិស័ទ ដែលព្រះយេស៊ូ បានជ្រើសរើស ត្រូវរិះគិតពិចារណា ដើម្បីឱ្យជីវិតរបស់ខ្លួនជាប់ជាមួយព្រះអង្គដែលជាដើមទំពាំងបាយជូរ។ លោកបន្ថែមថា យើងដឹងថា ក្នុងពេលដែលយើងរស់នៅក្នុងសម័យកូវីដ១៩ យើងអត់មានឱកាសជួបជុំគ្នាបានទេ ប៉ុន្តែព្រះសហគមន៍បានទូន្មានយើងឱ្យចូលរួមអភិបូជាពីចម្ងាយបាន «ដោយចិត្តគំនិតរបស់យើង ដោយវិញ្ញាណរបស់យើងដែលចូលរួមក្នុងម៉ោងជាមួយគ្នា ដែលផ្សាយតាមរយៈបណ្តាញឌីជីថលទំនើប […] ធ្វើឱ្យយើងទាំងអស់គ្នាស្ថិតនៅជាប់ជាមួយព្រះជាម្ចាស់»។
លោកបូជាចារ្យហង្សលី បានឲ្យដឹងអំពីលទ្ធផលនៃជំនួបក្រុមលោកអភិបាលទាំងបីកាលពីម្សិលមិញថា «លោកអភិបាលអូលីវីយេបានរំលឹកថា ព្រះសហគមន៍គួររកមធ្យោបាយ ដើម្បីឱ្យគ្រីស្តបរិស័ទរបស់យើង អាចទទួលព្រះកាយដោយផ្ទាល់បាន មិនគ្រាន់តែទទួលតាមផ្លូវវិញ្ញាណប៉ុណ្ណោះ។ នេះមានន័យថា ប្រហែលយើងអាចចែកជាក្រុមតូចៗ ចូលរួមអភិបូជាតាមច្បាប់របស់រដ្ឋាភិបាល ប៉ុន្តែយើងមានមិនលើសពី១០នាក់ អាចចែកមួយថ្ងៃៗ»។
ជាមួយគ្នានេះ លោកបានសង្កត់ធ្ងន់ថា «ព្រះកាយព្រះគ្រីស្តនៅក្នុងអគ្គសញ្ញាអរព្រះគុណនេះ ដែលជាអាហារម្យ៉ាងដែលធ្វើឱ្យយើងមានជីវិតជាប់ជាមួយព្រះយេស៊ូដែលជាដើមទំពាំងបាយជូរដើម្បីឲ្យយើងបង្កើតផលផ្លែបានច្រើន»។
៣. ការរួបរួមគ្នារបស់គ្រីស្តបរិស័ទ៖
លោកបូជាចារ្យបន្ថែមត្រង់ចំណុចនេះថា ពេលណាយើងនិយាយអំពីការ ជាប់ជាមួយដើម យើងនិយាយអំពីការរួបរួមគ្នារបស់ព្រះសហគមន៍ ការឯកភាពជាអង្គតែមួយរបស់យើងទាំងអស់គ្នា។ យើងជាគ្រីស្តបរិស័ទដែលមានសម្តេចប៉ាប មានលោកអភិបាល លោកបូជាចារ្យ ព្រមទាំងអស់អ្នកដែលបំពេញមុខងារសំខាន់ៗក្នុងព្រះសហគមន៍និងគ្រីស្តបរិស័ទទាំងអស់។ ដោយព្រះសហគមន៍មានរចនាសម្ពន្ធច្បាស់លាស់ នាំឱ្យយើងមានការរួបរួមគ្នាជាអង្គតែមួយជាមួយព្រះគ្រីស្ត។
លោកបូជាចារ្យបញ្ជាក់ទៀតថា លោកអភិបាលឆ្មារ សាឡាស់ លោកឆ្មារ សាឡឹម លោកទ្រឿងសំរើន ជាគំរូនៃបុព្វបុរសនៃជំនឿរបស់យើងនៅប្រទេសកម្ពុជា។ ពេលនឹកដល់ពួកគាត់ គឺយើងជាប់នឹងប្រវត្តិសាស្ត្រនៃប្រទេសកម្ពុជា និងព្រះសហគមន៍សកល។
លោកលើកអំពីគំរូអស់លោកដែលបានខិតខំអស់ពីសមត្ថភាពដើម្បី ពង្រឹងជំនឿរបស់ខ្លួន និងគ្រីស្តបរិស័ទឯទៀតៗ ទោះបីអស់លោកអាចរត់គេចពីការបៀតបៀនក៏ដោយ។ លោកមានប្រសាសន៍ថា «អស់លោកមានឱកាសចាកចេញពីប្រទេសកម្ពុជា ប៉ុន្តែអស់លោកបានសុខចិត្តរស់នៅក្នុងប្រទេសនេះ ដោយរួមស្លាប់ជាមួយហ្វូងចៀមរបស់ព្រះជាម្ចាស់ ហើយបានបូជាជីវិតមែន។ អស់លោកព្យាយាមស្តាប់ព្រះបន្ទូលរបស់ព្រះជាម្ចាស់ និងព្យាយាមថ្វាយអភិបូជា ដែលមានគ្រែនេះជាទីសម្គាល់ និងជាសាក្សីសម្រាប់យើង សម្រាប់បន្តជំនឿឲ្យយើង និងពង្រឹងជំនឿយើង»។
«ខ្ញុំគិតថា នេះជាគំរូមួយពិសេស ដើម្បីឲ្យយើងជាគ្រីស្តបរិស័ទនៅប្រទេសកម្ពុជាដែលយើងមានការលំបាក ឲ្យយើងព្យាយាមតទៅមុខទៀត ចូលរួមព្យាយាមអធិដ្ឋាន ស្តាប់ព្រះបន្ទូល ចូលរួមអភិបូជាពីចម្ងាយ ដើម្បីឲ្យជីវិតរបស់យើងបានជាប់ជាមួយព្រះជាម្ចាស់ ដើម្បីឲ្យយើងបង្កើតផលផ្លែ» លោកបូជាចារ្យបន្ថែម។
លោកបញ្ជាក់ទៀតថា យើងក៏មានគំរូមួយទៀតគឺការបន្តប្រគល់ខ្សែកឈើឆ្កាងរបស់លោកអភិបាលពីមួយជំនាន់ទៅមួយជំនាន់ រហូតមកដល់ពេលនេះ ជាប្រវត្តិសាស្ត្រ និងជាការបង្ហាញឯកភាពរបស់ព្រះសហគមន៍របស់យើង។ «សូមឲ្យយើងក្នុងកាលៈទេសៈពិបាក ឲ្យជាប់ជាមួយព្រះសហគមន៍ ជាប់ជាមួយអ្នកដឹកនាំព្រះសហគមន៍ យើងសង្ឃឹមថា យើងអាចបង្កើតផលផ្លែ។ ហើយផលផ្លែរបស់យើងគឺការអធិដ្ឋាន ការសម្តេងព្រះហឫទ័យមេត្តាករុណារបស់ព្រះជាម្ចាស់ដែលយើងជួបសព្វថ្ងៃ ជាពិសេសក្នុងពេលកូវីដ១៩ […]ដើម្បីឲ្យមនុស្សលោកលើកតម្កើងសិរីរុងរឿងរបស់ព្រះជាម្ចាស់»។
មុនបញ្ចប់ពិធីថ្វាយអភិបូជា លោកអភិបាលអូលីវីយេ បានរំលឹកអំពីសក្ខីភាពមួយចំនួនរបស់ព្រះនាងម៉ារីនៅទីក្រុងហ្វាទីម៉ា ទាក់ទងនឹងសម្តេចប៉ាបយ៉ូហានប៉ូលទី២ ដែលត្រូវបានគេធ្វើឃាតនៅថ្ងៃបុណ្យរំលឹកនេះ តែមិនប៉ះពាល់ដល់ជីវិត និងសក្ខីកម្មមួយទៀតពីលោកបូជាសួន ហង្សលីផ្ទាល់ដែលមានគ្រោះថ្នាក់ចរាចរណ៍តែ មិនមានអ្វីកើតឡើង ដោយសារលោកបានដឹករូបសំណាកព្រះនាងម៉ារីនៅហ្វាទីម៉ារួមដំណើរជាមួយ ហើយរូបសំណាកនោះត្រូវបានដាក់បណ្តោះអាសន្ននៅតាមព្រះសហគមន៍ជាច្រើនរហូតមកដល់ពេលនេះ គឺនៅព្រះសហគមន៍តាំងគោក តម្កល់លើឡគ្រែ ដែលជាអសនៈ របសលោកអភិបាលឆ្មារ សាឡាញ់ រួមនឹងសហការីថ្វាយអភិបូជាចុងក្រោយ។
លោកមានប្រសាសន៍ទៀតថា «ខ្ញុំសូមអញ្ជើញបងប្អូនរួមជាមួយព្រះនាងម៉ារីនៃទីក្រុងហ្វាទីម៉ា គឺ ត្រូវយកព្រះកាយជាអាទិភាពក្នុងជីវិតរបស់យើង ត្រូវតាំងព្រះកាយព្រះគ្រីស្តដើម្បីបូជាជីវិតរបស់យើងរួមជាមួយព្រះជាម្ចាស់។ យកពេលផ្ញើជីវិតទាំងស្រុងទៅលើព្រះបេះដូងព្រះនាងព្រហ្មចារីម៉ារី និងឲ្យយើងទៅជាសាក្សីនៃធម៌មេត្តាករុណាព្រះជាម្ចាស់»។
ក្នុងពេលនេះលោកអភិបាលអូលីថ្វាយថ្វាយពាក្យអង្វរទៅព្រះនាងម៉ារី សម្រាប់ពិភពលោក សម្រាប់ប្រទេសកម្ពុជា សម្រាប់ប្រជាជន អ្នកជំងឹ និងគ្រូពេទ្យទាំងអស់ក្នុងបរិបទ នៃកូវីដ១៩នេះ។
