ព្រះសហគមន៍សហគមន៍កាតូលិកភូមិភាគភ្នំពេញបានបើកសកម្មភាព អប់រំជំនឿកាតូលិករបស់ខ្លួនឡើងវិញ សម្រាប់ឆ្នាំ២០២០-២០២១ ក្រោមអធិតីភាពរបស់លោកអភិបាល អូលីវីយេ ជ្មិតហស្លេរ នាថ្ងៃទី៣-៤ ខែតុលា កន្លងទៅ។ ពិធីនេះបានប្រារព្ធធ្វើនៅព្រះវិហារ សន្តសិលា និង សន្តប៉ូល ភ្នំពេញថ្មី។
ព្រះសហគមន៍កាតូលិកនៅប្រទេសកម្ពុជា បានផ្អាកការជួបជុំបែបសាសនា ក្នុងនោះសកម្មភាពអប់រំជំនឿ សម្រាប់អ្នកឈ្វេងយល់អំពីព្រះយេស៊ូ ដូចជាក្រុមមនុស្សពេញវ័យ យុវជន ជំទង់ និងកុមារ ក៏បានផ្អាក តាមសេចក្តីណែនាំរបស់ក្រសួងសុខាភិបាល ដើម្បីប្រយុទ្ធនឹងមេរោគឆ្លង កូវីដ១៩ តាំងពី ពាក់កណ្តាលខែមីនា ឆ្នាំ២០២០។ នៅចុងខែកញ្ញាឆ្នាំ២០២០ ក្រសួងសុខាភិបាលបានអនុញ្ញាតការជួបជុំបែបសាសនាឡើងវិញ ដោយប្រើវិធានសុវត្ថិភាព និងកាត់បន្ថយការជួបជុំមានសមាជិកច្រើន។
ដូនជីកាតូលិក បងស្រី ធារី អ្នកសម្របសម្រួល ការិយាល័យអប់រំជំនឿ និងគម្ពីរភូមិភាគភ្នំពេញបានឲ្យដឹងថា ការប្រារព្ធកម្មវិធីបើកវគ្គអប់រំជំនឿសម្រាប់ឆ្នាំថ្មី មិនអាចជួបជុំរួមគ្នាទាំង៩មណ្ឌលសកម្មភាពនោះឡើយ គឺធ្វើតាមដំណាក់កាល។ សម្រាប់ថ្ងៃទី៣-៤ ខែតុលា ប្រារព្ធសម្រាប់គ្រូអប់រំជំនឿ នៃមណ្ឌលសកម្មភាពភ្នំពេញខាងត្បូង ភ្នំពេញខាងជើង តាខ្មៅ និងមណ្ឌលសកម្មភាពភ្នំពេញថ្មី ដែលមានអ្នកចូលរួមប្រមាណ៤០នាក់។
បងស្រីធារី បន្តថា ការជួបជុំពីរថ្ងៃនេះ គ្រូទាំងអស់ បានចែករំលែក និងស្តាប់បទពិសោធអប់រំបន្តជំនឿទៅវិញទៅមក ស្តាប់ការណែនាំ និងលើកទឹកចិត្តពីលោកអភិបាល និងទទួលផែនការពីការិយាល័យ អប់រំជំនឿ និងគម្ពីរភូមិភាគភ្នំពេញ។
បងស្រីបន្តថា ក្នុងកម្មវិធីនោះ លោកអភិបាល អូលីវីយេ បានប្រទានពរ និងចាត់ឲ្យគេឲ្យទៅក្នុងបេសកកម្មជាគ្រូអប់រំជំនឿ។ ពិធីនេះ ជួយឲ្យគ្រូអប់រំជំនឿ យកចិត្តទុកដាក់អំពីបេសកកម្មរបស់គេ។
ក្នុងធម្មទេសនា លោកអភិបាលអូលីវីយេ មានប្រសាសន៍និងលើកទឹកចិត្តដល់គ្រូអប់រំជំនឿថា «បេសកកម្មរបស់គ្រូអប់រំជំនឿ គឺជាបេសកកម្មដែលព្រះសហគមន៍ប្រគល់ឱ្យគ្រូអប់រំជំនឿ ដោយមានព្រះវិញ្ញាណគង់នៅ»។
ក្នុងនោះលោកអភិបាលក៏បានរំឭកឲ្យគ្រូម្នាក់ៗយកចិត្តទុកដាក់ដូចជា រៀបចំមេរៀននិងទីកន្លែងបង្រៀនឲ្យហ្មត់ចត់ ត្រូវតែរៀនបន្ថែមនិងពង្រឹងជំនឿខ្លួនឯងដោយចូលរួមការសិក្ខាសាលា រឺការណែនាំរបស់ព្រះសហគមន៍ ផ្ដល់សក្ខីភាពនិងត្រូវធ្វើដំណើររួមជាមួយអ្នកឈ្វេងយល់ និងត្រូវណែនាំឱ្យពួកគាត់មានបទពិសោធន៍ផ្ទាល់និងរស់នៅយ៉ាងជិតស្និទ្ធជាមួយព្រះជាម្ចាស់ដោយយកព្រះសហគមន៍ជាទីពឹង។
ពិតមែន ការអប់រំនឿ គឺត្រូវអប់រំ អំពីជំនឿ ហេតុនេះមិនគ្រាន់តែប្រើចំណេះដឹងប៉ុណ្ណោះទេ គឺត្រូវពីលើជំនឿ ដោយភ្ជាប់នឹងជីវិតផ្ទាល់ខ្លួន។ នេះជាការបញ្ជាក់ពីលោកដួង សាវង់ ប្រធានការិយាល័យអប់រំជំនឿព្រះសហគមន៍កាតូលិកកម្ពុជា។ លោកមានប្រសាសន៍ថា គ្រូអប់រំត្រូវយកចិត្តទុកដាក់ជាមួយបងប្អូនដែលមកទទួលការអប់រំជំនឿ។ ជាពិសេស ឲ្យបងប្អូនយកចិត្តទុកដាក់អំពីការអធិដ្ឋាន អំពីព្រះបន្ទូល ដោយក្នុងជីវិតរស់នៅប្រចាំថ្ងៃ។ លោកថា ជំនឿមិនមែនចំណេះដឹងផ្សេងពីការរស់នៅ ដូច្នេះការអប់រំជំនឿគឺជាត្រូវប្រែក្លាយជីវិតរស់នៅរបស់បងប្អូនផ្ទាល់។
ការអប់រំជំនឿ គ្រូទាំងអស់ក៏ត្រូវយកចិត្តទុកដាក់ជាមួយ ព្រះគម្ពីរ អានព្រះបន្ទូលជាប្រចាំ។ នេះជាការលើកឡើងរបស់លោក កាន់ ប៊ុយ ជាសមាជិកគណៈកម្មការព្រះគម្ពីរកាតូលិកកម្ពុជា។ លោកថា ព្រះគម្ពីរមានសារៈសំខាន់ សម្រាប់កម្មវិធីអប់រំជំនឿដោយមានគរុកោសល្យ ឈ្វេងយល់អំពីព្រះបន្ទូល ដែលព្រះជាម្ចាស់មានព្រះបន្ទូលមកកាន់យើង។ ឲ្យយើងមានវិធីសាស្ត្រនាំព្រះបន្ទូល ហើយព្រះបន្ទូលទាំងអស់នោះ ហើយដែលជួយឲ្យយើងយល់ពីការអាថ៌កំបាំងនៃដំណឹងល្អ អំពីការសង្គ្រោះ សម្រាប់យើងផ្ទាល់ជាអ្នកណែនាំ និងសម្រាប់បងប្អូនដែលមកទទួលការជំនឿ៕
