នាព្រឹកថ្ងៃទី១៥ ខែតុលា ឆ្នាំ២០២០នេះ លោកអភិបាល អូលីវីយ៉េ បានដឹកនាំការប្រជុំនៅព្រះសហគមន៍សន្តហ្វ្រង់ស្វ័រ សាវីយ៉េ (ចំប៉ា) ដែលមានការចូលរួមពីលោកបូជាចារ្យ បងប្រុសបងស្រី និងគណ:កម្មការតាមព្រះសហគមន៍កាតូលិកក្នុងមណ្ឌលសកម្មភាពទន្លេមេគង្គនិងទន្លេបាសាក់ ប្រហែលជិត៤០នាក់។ ក្នុងកិច្ចប្រជុំនេះ លោកអភិបាលបានរំលឹកដល់លោកបូជាចារ្យ បងប្រុសបងស្រី និងគណៈកម្មការទាំងអស់ ឲ្យរិះគិតអំពីសារលិខិតរបស់សម្តេចប៉ាប ហ្វ្រង់ស៊ីស្កូ និងរកមធ្យោបាយក្នុងជួយបងប្អូនដែលរងគ្រោះដោយសារវិបត្តិនៃជំងឺកូវីដ១៩ វិបត្តិនៃទឹកជំនន់ និងវិបត្តិនៃជំងឺគ្រុនឈិក នៅក្នុងតំបន់ ដើម្បីឲ្យព្រះសហគមន៍ចូលរួមយ៉ាងសកម្មក្នុងជីវិតរបស់ប្រជាជនកម្ពុជា៕
ក្រុមសិល្បៈវិទ្យាល័យសន្តហ្វ្រង់ស្វ័រ ទទួលបានលិខិតថ្លែងអំណរគុណ ក្នុងទិវាវប្បធម៌ជាតិ
ក្នុងស្មារតីលើកកម្ពស់ដួងព្រលឹងវប្បធម៌ខ្មែរ ក្រុមសិល្បៈនៃវិទ្យាល័យសន្តហ្វ្រង់ស្វ័រ បាននាំយកនូវទស្សនីយភាពរបាំបុរាណយ៉ាងជក់ចិត្តមកសម្តែងក្នុងឱកាសអបអរសាទរ «ទិវាវប្បធម៌ជាតិ ៣មីនា» លើកទី២៨ ឆ្នាំ២០២៦ ក្រោមប្រធានបទ «យុវជនដើម្បីវប្បធម៌ជាតិ»។ ពិធីនេះត្រូវបានរៀបចំឡើងយ៉ាងអធិកអធម កាលពីព្រឹកថ្ងៃអង្គារ ទី២៤ ខែមីនា ឆ្នាំ២០២៦ នៅសាលប្រជុំធំរដ្ឋបាលខេត្តតាកែវ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម វ៉ី សំណាង អភិបាលនៃគណៈអភិបាលខេត្ត។ នៅក្នុងព្រឹត្តិការណ៍ដ៏មានអត្ថន័យនេះ លោកស្រី ឡៃ មករា នាយិការងវិទ្យាល័យសន្តហ្វ្រង់ស្វ័រ រួមជាមួយក្រុមសិល្បៈសិស្សានុសិស្ស បានទទួលលិខិតថ្លែងអំណរគុណផ្ទាល់ពីថ្នាក់ដឹកនាំខេត្ត ចំពោះកិច្ចខិតខំប្រឹងប្រែងក្នុងការចូលរួមថែរក្សាវប្បធម៌។
