យុវជនដែលមានអាយុចន្លោះ១៣ដល់១៨ឆ្នាំ នៅតាមបណ្ដាព្រះសហគមន៍ ទាំង៩នៃមណ្ឌលសកម្មភាពភ្នំពេញខាងជើងចំនួន៥០នាក់ ចួបជុំគ្នានាល្ងាច ថ្ងៃទី២៩ ដល់ថ្ងៃទី៣១ មករា ២០២១ ដើម្បីរិះគិតរួមគ្នាក្រោមប្រធានបទ “ចេញទៅប្រកាសដំណឹងល្អ” នៅព្រះវិហារសន្តយ៉ូសែប ផ្សារតូច និងដឹកនាំដោយលោកបូជាចារ្យ ផ្រមផុង ស៊ីហារ៉ាត់ (ប៊ឺត)។
យុវជន ហួត ម៉េងធូ ជាប្រធានយុវជន បានឱ្យដឹងថា សិក្ខាសាលានេះរៀបចំឡើងដើម្បី ជួយដល់យុវជននៅក្នុងមណ្ឌលសកម្មភាពភ្នំពេញខាងជើង ទាំងអស់ឱ្យមានសកម្មភាពរួមគ្នា និងបានស្គាល់គ្នាទៅវិញទៅមក ហើយក៏ជាមធ្យោបាយមួយដើម្បីបង្រៀនពួកគាត់ឱ្យចេះសាមគ្គីគ្នាដែរ។ ប្រធានយុវជនបន្តថា យុវជនគឺជាស្នូលនៃព្រះសហគមន៍ ដូច្នេះពួកគេត្រូវដឹងពីតួនាទី និងមានសកម្មភាពអ្វីខ្លះ ដើម្បីចេញទៅប្រកាសដំណឹងល្អ នៅក្នុងជីវិតប្រចាំថ្ងៃ នៅក្នុងព្រះសហគមន៍ និងនៅក្នុងសង្គម ដោយបង្កើតសកម្មភាពនានានៅក្នុងព្រះសហគមន៍ផ្ទាល់ខ្លួនរបស់ពួកគេ ក៏ដូចជា ការប្រកាសដំណឹងល្ អតាមរយៈបណ្ដាញសង្គមផងដែរ។
លោកបូជាចារ្យ ប៊ឺត បានមានប្រាសាសន៍ ទៅកាន់យុវជនទាំងអស់ថា ប្រសិនបើយើងមានចិត្តចង្អៀត ចិត្តច្រណែន តើយើងទៅប្រកាសអ្វី? លោកបន្តថា ការប្រកាសដំណឹងល្អគឺចេញពីខ្លួនយើងផ្ទាល់ ដោយចាប់ផ្ដើមធ្វើជាគំរូដល់គេ និងបង្ហាញសេចក្ដីស្រឡាញ់របស់ព្រះជាម្ចាស់ឱ្យគេឃើញ។
លោករំឭកអំពីអត្ថបទព្រះគម្ពីរថា ហេតុអ្វីបានជាខ្មោចស្គាល់ព្រះយេស៊ូ? រីឯយើងទាំងអស់គ្នានៅទីនេះវិញ តើយើងស្គាល់ព្រះយេស៊ូឬអត់? លោកថា ប្រសិនបើយើងស្គាល់ព្រះយេស៊ូ នោះយើងនឹងប្រព្រឹត្តតាមព្រះបន្ទូលរបស់ព្រះយេស៊ូ ដោយមានចិត្តស្រឡាញ់ និងចិត្តមេត្តាករុណាអាណិតអាសូរ។ ក្រៅពីការណែនាំ អំពីរបៀបនៃការប្រកាសដំណឹងល្អ លោកបូជាចារ្យ ក៏បានដាស់តឿនយុវជនឱ្យយល់ពីតម្លៃរបស់ខ្លួន ក៏ដូចជាការរស់នៅប្រចាំថ្ងៃ ជាពិសេសលោកក៏បានបង្ហាញផងដែរនូវអ្វីដេលមនុស្សយើងមិនអាចយកលុយទៅទិញបាន ដើម្បីជួយដល់យុវជនក្នុងការប្រើប្រាស់ជីវិតឱ្យបានពេញលេញ ដូចជា ខ្យល់ដង្ហើម ឱកាស និងពេលវេលា។
យុវនារី សុខ ចន្ថា មកពីព្រះសហគមន៍ ពោធិ៍ធំ បានឱ្យដឹងថា រយៈពេលសិក្ខាប៉ុន្មានថ្ងៃនេះ ខ្ញុំបានទទួលចំណេះដឹងជាច្រើន អំពីរបៀបនៃការប្រកាសដំណឹងល្អ តាមវិធីសាស្ត្រផ្សេងៗ ដូចជាការប្រកាសដំណឹងល្អទៅគ្រួសារ មិត្តភក្តិ ឬអ្នកជុំវិញយើងតាមវិធីងាយៗ ដោយមិនចាំបាច់ដូចព្រះយេស៊ូពេក គឺគ្រាន់តែសកម្មភាពអធិដ្ឋានមុនញ៉ាំបាយក៏អាចប្រកាសដំណឹងល្អបានដែរ។ ការប្រកាសដំណឹងល្អនេះ ជាតួនាទីរបស់ខ្ញុំជាគ្រីស្តបរិស័ទ និងជួយឱ្យខ្ញុំកាន់តែមានជំនឿរឹងមាំបន្ថែមទៀត។ នេះជាជំនួបដំបូងរបស់ក្រុមយុវជនរបស់ មណ្ឌលសកម្មភាពភ្នំពេញខាងជើង មកពី៩ព្រះសហគមន៍ដូចជា ផ្សារតូច អរិយក្សត្រ ពោធិ៍ធំ ក្ដីកណ្ដាល មាត់ក្រសាស់ ព្រែកតាទែន សែនសុខ ស្វាយប៉ាក និងកំពង់ហ្លួង។
កាលពីឆ្នាំ២០២០ ក្រុមយុវជនគ្រោងនឹងមានជំនួបផ្ទាល់បែបនេះ ប៉ុន្តែត្រូវបានខកខានដោយបញ្ហាកូវីដ១៩ ហេតុនេះក្រុមយុវជនក៏បាន បង្កើតកម្មវិធីដើម្បីចួបជុំ និងមានទំនាក់ទំនងរវាងគ្នានិងតាមរយៈបណ្ដាញសង្គម ដោយការបង្កើតផេកក្រុមយុវជនមណ្ឌលសកម្មភាពភ្នំពេញខាងជើង និងមាន ការផ្សាយផ្ទាល់ នូវកម្មវិធីកម្សាន្ត សំណួរនិងចម្លើយជាមួយយុវជនផងដែរ៕
ដោយដាលីស
