មណ្ឌលនិស្សិតព្រះសហគមន៍កាតូលិកកម្ពុជា បានបើកឆ្នាំសិក្សាថ្មីក្នុងឆ្នាំ ២០២០-២០២១ នាល្ងាចថ្ងៃទី១០ ខែកុម្ភៈ ឆ្នាំ២០២១នេះ នៅមណ្ឌលនិស្សិតព្រះសហគមន៍កាតូលិកកម្ពុជា ក្នុងសង្កាត់បឹងត្របែក ខណ្ឌចំការមក រាជធានីភ្នំពេញ។
កម្មវិធីនេះធ្វើឡើងក្រោមអធិបតីភាពលោកអូលីវីយ៉េ ជ្មីតអ៊ីស្ល៊ែរ អភិបាលព្រះសហគមន៍កាតូលិកភូមិភាគភ្នំពេញ ព្រមទាំងមានមាតាបិតា និងអាណាព្យាបាលនិស្សិតឆ្នាំទីមួយចូលរួមជាច្រើនកុះករ។
លោកអភិបាល អូលីវីយ៉េ បានមានប្រសាសន៍រំឭកឱ្យយកចិត្តទុកដាក់ ក្នុងការអនុវត្តតាមការវិធានការប្រតិបត្តិការស្តង់ដារអនាម័យរបស់ក្រសួងសុខាភិបាល។ លោកក៏បានលើកទឹកចិត្តដល់ឪពុកម្ដាយរបស់និស្សិតថា កុំឱ្យមានការព្រួយបារម្ភចំពោះកូនដែលបានចេញពីផ្ទះមកមកបន្តការសិក្សានៅទីក្រុងភ្នំពេញ និងស្នាក់នៅក្នុងមណ្ឌលដោយនិស្សិតនេះ។
លោកអភិបាលបានថ្លែងថា ៖ «មណ្ឌលនិស្សិត ជាមណ្ឌលមួយដែលយកចិត្តទុកដាក់អប់រំនិស្សិតឱ្យទៅជាមនុស្សពេញលក្ខណៈ គឺចេះរស់នៅក្នុងសង្គមយ៉ាងត្រឹមត្រូវ ចេះគោរពគ្នាទៅវិញទៅមក ចេះបង្កើតទំនាក់ទំនងជាមួយអ្នកដទៃ ក៏ដូចជាជាមួយព្រះជាម្ចាស់ដែរ ហើយថែរក្សាជីវិតដែលព្រះជាម្ចាស់ប្រទានឱ្យយើង»។
លោកអូលីវីយ៉េសង្ឃឹមថាឆ្នាំនេះ និស្សិតទាំងអស់ចេះរស់នៅជាមនុស្សដែលចេះបត់បែន និងយកចិត្តទុកដាក់រៀន ទោះបីតាមបណ្ដាញសង្គមក៏ដោយ។
លោកប៊ុន សុបិន្ត ជំនួយការសម្របសម្រួលមណ្ឌលនិស្សិត្យព្រះសហគមន៍កាតូលិកកម្ពុជា បានលើកឡើងផងដែរថា ឆ្នាំនេះមណ្ឌលបើកឆ្នាំសិក្សាយឺត ដោយសារបញ្ហានៃការរីករាលដាលនៃជំងឺកូវីដ១៩។
លោកបានប្រាប់ឱ្យដឹងថា៖«អ្វីដែលជាគោលការណ៍របស់មណ្ឌលនិស្សិតបើកឆ្នាំសិក្សា គឺ ដើម្បីឱ្យអាណាព្យាបាលឆ្នាំទីមួយបានស្គាល់ពីមណ្ឌល ដែលជាកន្លែងកូនៗរបស់គាត់មករស់នៅ»។
លោកប៊ុន សុបិន្តបានបញ្ជាក់បន្ថែមថា ឆ្នាំនេះមណ្ឌលនិស្សិតព្រះសហគមន៍កាតូលិកកម្ពុជាទទួលនិស្សិតជំនាន់ទី២៣ចំនួន១៧នាក់ មកពីតាមបណ្ដាខេត្តមួយចំនួននៅក្នុងប្រទេសកម្ពុជាតាមរយៈព្រះសហគមន៍កាតូលិកទាំងបីភូមិភាគ។
ជំនួយការរូបនេះបានបន្តថា មណ្ឌលនិស្សិតមាន៤ចំណុចដើម្បីជួយដល់និស្សិតក្នុងការទទួលការសិក្សាដោយជោគជ័យគឺ ការសិក្សាផ្ទាល់ខ្លួនរបស់ពួកគាត់ម្នាក់ៗ, ការអភិវឌ្ឍខ្លួនទៅតាមទេពកោសល្យនិងអំណោយទានធម្មជាតិ, ជីវិតរួមគឺរស់នៅជាក្រុមដោយចេះសម្រប ឥរិយាបទចំពោះគ្នាទៅវិញទៅមកដើម្បីត្រៀមខ្លួនធ្វើការនៅក្នុងសង្គម។
លោកបន្តថា ចំណុចចុងក្រោយគឺការរីកចម្រើនផ្លូវវិញ្ញាណរបស់និស្សិតម្នាក់ៗ ដោយនិស្សិតជាកាតូលិកត្រូវចូលរួមកម្មវិធីអភិបូជានិងអានអត្ថបទព្រះគម្ពីរ រីឯនិស្សិតដែលជាពុទ្ធសាសនិកយើងមានកម្មវិធីសម្មាធិរៀងរាល់ល្ងាចថ្ងៃសុក្រផងដែរ។
មណ្ឌលនិស្សិតព្រះសហគមន៍កាតូលិកកម្ពុជា បានបង្កើតឡើងក្នុងឆ្នាំ១៩៩៨ និងបានជួយដល់និស្សិតក្រីក្រដែលមកពីចម្រុះខេត្តក្រុងក្នុងប្រទេសកម្ពុជា ឱ្យរៀននៅក្នុងសាកលវិទ្យាល័យនានាក្នុងទីក្រុងភ្នំពេញសរុប៣៧៤នាក់ និងបានបញ្ចប់ការសិក្សាដោយជោគជ័យចំនួន៣៥៧នាក់។ បច្ចុប្បន្ន មណ្ឌលនេះមាននិស្សិតកំពុងស្នាក់នៅចំនួន៦៤នាក់ ក្នុងនោះមាននិស្សិតស្រីចំនួន៣៤នាក់ ហើយនិស្សិតឆ្នាំទីមួយមានចំនួន១៧នាក់ផងដែរ៕
