បេក្ខជនបេក្ខនារីចំនួន៧៧នាក់មកពីព្រះសហគមន៍កាតូលិកនានា នៃមណ្ឌលសកម្មភាពតាកែវ ត្រូវបានទទួលស្វាគមន៍យ៉ាងកក់ក្តៅចូលក្នុងព្រះសហគមន៍កាតូលិកក្នុងជំហានទី១ ដើម្បីបន្តដំណើរឈ្វេងយល់អំពីព្រះបន្ទូល រហូតទទទួលអគ្គសញ្ញាជ្រមុជទឹក។
ពិធីទទួលប្រព្រឹត្តឡើងកាលពីថ្ងៃទី១៤ ខែកុម្ភៈ ឆ្នាំ២០២១ នៅព្រះវិហារសន្តី ម៉ារីញញឹម ភូមិចំការទៀង ស្រុកត្រាំកក់ ខេត្តតាកែវ ក្រោមអធិបតីអភិបាលភូមិភាគភ្នំពេញ លោក អូលីវីយ៉េ ជ្មីតអ៊ីស្ល៊ែរ ។
ក្នុងពិធីនេះ លោកអូលីវីយ៉េ រួមជាបងប្អូនគ្រីស្តបិរស័ទ បានទទួលស្វាគមន៍បងប្អូនទាំង៧៧រូបនេះយ៉ាងកក់ក្តៅ និងឱឡារិកបំផុត ក្រោយពេលបានដឹងអំពីគោលបំណងយ៉ាងច្បាស់លាស់របស់បងប្អូនដែលបានសុំចូលព្រះសហកមន៍។
មានប្រសាសន៍ទៅកាន់បងប្អូនជំហានទី១ទាំងនេះ លោកអភិបាលអូលីវីយេ បានថ្លែងថា ៖ «ខ្ញុំរំភើបណាស់ដែលមានបងប្អូនច្រើនដូចនេះសុំចូលក្នុងព្រះសហគមន៍។ ខ្ញុំរំភើប ដែលចម្លើយរបស់បងប្អូនសុំចូលព្រះសហគមន៍គឺ ខ្ញុំសុំជំនឿ និងជំនឿនេះណែនាំឲ្យខ្ញុំទទួលជីវិតអស់កល្បជានិច្ច»។
លោកអភិបាលភូមិភ្នំពេញរូបនេះបានបន្តទៀតថា គ្រប់គ្នាមានគោលដៅជីវិត ដែលគោលដៅនៃជីវិតនេះមិនមែននៅលើផែនដីនេះទេ ប៉ុន្តែសម្រាប់ត្រៀមខ្លួនឲ្យបានទៅដល់ស្ថានបរមសុខ។
លោកបានបញ្ជាក់ថា ៖ «នៅក្នុងព្រះយេស៊ូ យើងអាចរកឃើញផ្លូវនៃជីវិតអស់កល្បជានិច្ច។ ផ្លូវនេះចាប់ផ្តើមពេលនេះ យើងសុខចិត្តដើរតាមព្រះយេស៊ូ»។
ដំណើរនេះនាំឲ្យមានការកែប្រែចិត្តគំនិត បន្តិចម្តងៗដើម្បីចូលក្នុងជីវិតរបស់ព្រះយេស៊ូ ដើម្បីចូលក្នុងជីវិតព្រះសហគមន៍ ដើម្បីឲ្យព្រះបន្ទូលចូលក្នុងដួងចិត្តរបស់យើង ណែនាំឲ្យយើងរស់នៅតាមព្រះបន្ទូលដែលយើងបានស្តាប់ពីមួយថ្ងៃទៅមួយថ្ងៃ ដើម្បីទទួលអំណរសប្បាយ និងជីវិតថ្មី។ នេះបើតាមការលើកឡើងរបស់លោកអភិបាលអូលីវីយ៉េ។
លោកក៏បានរំឭកឲ្យបងប្អូន ចេះចែករំលែកអំណរសប្បាយនិងធម៌មេត្តាករុណារបស់ព្រះជាម្ចាស់ដល់បងប្អូនឯទៀតៗ។ ជាពិសេសសូមឲ្យបេក្ខជនបេក្ខនារីចេះអធិដ្ឋាន ទូលអង្វរព្រះជាម្ចាស់ ដោយពោលពាក្យថា «ឱព្រះអម្ចាស់អើយ! សូមអាណិតអាសូរមកដល់ទូលបង្គំផង» ព្រះជាម្ចាស់ជាសេចក្តីស្រលាញ់ព្រះអង្គស្តាប់ពាក្យអង្វរបស់យើង។
លោកអូលីវីយ៉េ ក៏បានរំឭកបងប្អូនត្រូវទទួលស្គាល់ភាពទន់ខ្សោយរបស់ខ្លួន ដោយសារព្រះជាម្ចាស់មានព្រះហឫទ័យអាណិតអាសូរ ព្រះអង្គនឹងណែនាំឲ្យបងប្អូនធ្វើដំណើរបន្តិចម្តងៗក្នុងជីវិតថ្មីនៃធម៌របស់ព្រះជាម្ចាស់ លើទឹកដីកម្ពុជា។
បេក្ខជនបេក្ខនារីទាំង៧៧រូបនេះ ជាមនុស្សពេញវ័យមកពីព្រះសហគមន៍កាតូលិក ព្រះវិហារគ្រួសារដ៏វិសុទ្ធ ក្រុងដូនកែវ ព្រះវិហារសន្តប៉ូលអង្គគគីរ ព្រះវិហារសន្តយ៉ូសែប ត្រពាំងក្រញ៉ូង ព្រះវិហារសន្តីម៉ារីកំពង់អំពិល និង ព្រះវិហារសន្តីម៉ារីញញឹមចំការទៀង។
បន្ទាប់ពីធម្មទេសនា បេក្ខជនបេក្ខនារីទាំងនេះបានប្រកាសនៅមុខឈើឆ្កាងថា ៖ « ខ្ញុំសូមយកព្រះយេស៊ូជាទីពឹង ខ្ញុំសូមយកព្រះបន្ទូលជាទីពឹង ខ្ញុំសូមយកព្រះសហគមន៍ជាទីពឹង»។
យុវជន រុំ ឧត្តម បេក្ខជនដែលបានទទួលជំហានទី១ បាននិយាយថា លោកបានសម្រេចចិត្តដើរតាមព្រះយេស៊ូដោយទទួលអប់ជំនឿ ហើយលោកក៏ចង់ស្គាល់ច្បាស់ពីដំណើរជីវិតរបស់ព្រះជាម្ចាស់ ព្រះសហគមន៍ និងចូលបម្រើព្រះសហគមន៍ដូចបងប្អូនគ្រីស្តបរិស័ទផ្សេងទៀត។
យុវជនរូបនេះបានរំឭកឱ្យដឹងថា ដំបូងឡើយលោកគ្មានការចាប់អារម្មណ៍អ្វី ដោយលោកគ្រាន់តែចូលរួមច្រៀងចម្រៀងក្នុងព្រះវិហារ ស្តាប់ព្រះបន្ទូល និងស្តាប់ការពន្យល់ច្រើនរបស់លោកអភិបាល ដែលធ្វើឱ្យយុវជនរូបនេះជឿនិងចង់ក្លាយជាគ្រីស្តបរិស័ទ។ បើទោះបីជាលោកឧត្តមទទួលរងនូវការរិះគន់ពីអ្នកជិតខាងក្នុងភូមិរបស់លោក ថា «ចូលសាសនាដទៃ មិនល្អទេ» ប៉ុន្តែបែរជាគ្រូសាររបស់លោកមិនបានហាមគាត់ឬរិះគន់ទៅលើការចូលខ្លួនបំរើព្រះជាម្ចាស់ឡើយ ដោយឪពុកម្តាយរបស់លោកបាននិយាយថា «ឲ្យតែកូនសប្បាយចិត្ត សូមធ្វើចុះ»។
ចំណែកបេក្ខនារី ពៅ ស្រីម៉ី បានឱ្យដឹងដែរថា ដំបូងឡើយនាងមានគំនិតស្ទាក់ស្ទើរ ប៉ុន្តែក្រោយចូលសិក្ខាសាលាការត្រាស់ហៅកាលពីចុងឆ្នាំ២០១៩ បេក្ខនារីរូបនេះបានចាប់មានជំនឿលើព្រះជាម្ចាស់ ហើយបន្តទទួលការអប់រំជំនឿ។
បេក្ខនារីស្រីម៉ី បានប្រាប់ថា ៖ «ខ្ញុំធ្លាប់មានចិត្តចង់បោះបង់នូវការចូលរួមដំណើរជាមួយព្រះជាម្ចាស់ ប៉ុន្តែខ្ញុំបានសម្រេចចិត្តមកបន្តទទួលការអប់រំជំនឿឡើងវិញ ដោយមានការចូលរួមជាមួយក្រុមសិល្បៈព្រះសហគមន៍ ក្នុងការសម្តែងកម្មវិធីបុណ្យផ្សេងៗរហូតមកដល់ពេលនេះ»។
មុនពេលទទួលអគ្គសញ្ញាជ្រមុជទឹក ក្លាយជាគ្រីបរិស័ទពេញលេញ ពួកគេត្រូវទទួលការអប់រំជំនឿយ៉ាងតិច២ឆ្នាំ៕
