«សូមយកព្រះយេស៊ូជាគំរូសម្រាប់ជីវិតរបស់យើង ព្រះយេស៊ូធ្វើយ៉ាងណា សូមធ្វើយ៉ាងហ្នឹងដែរ។ ព្រះយេស៊ូស្រលាញ់ សូមឲ្យយើងចេះស្រលាញ់ដែរ។ ព្រះយេស៊ូលើកលែងទោស សូមឲ្យយើងចេះលើកលែងទោសដែរ។ ព្រះយេស៊ូព្យាបាល សូមឲ្យយើងចេះយកចិត្តទុកដាក់..»។
នេះជាការថ្លែងឡើងរបស់អភិបាលភូមិភាគភ្នំពេញ លោកអភិបាលីវីយ៉េ ជ្មីតអ៊ីស្ល៊ែរ ទៅកាន់បេក្ខជនបេក្ខនារីចំនួន៤០នាក់ក្នុងពិធីទទួលអគ្គសញ្ញាលាបថ្ងាស នៅព្រះសហគមន៍ព្រះវិហារសន្ត យ៉ូសែប ស្អាង ខេត្តកណ្តាល នាព្រឹកថ្ងៃទី១៤ ខែកុម្ភៈ ឆ្នាំ២០២១កន្លងមកនេះ។
លោកអភិបាលបានបន្តដោយសុំឲ្យគ្រីស្តបរិស័ទចេះទូលអង្វរព្រះជាម្ចាស់ដូចក្នុងគម្ពីរមនុស្សឃ្លង់ទូលអង្វរព្រះយេស៊ូសុំព្យាបាលគាត់ឲ្យជា។ ហេតុនេះ ត្រូវទូលអង្វព្រះជាម្ចាស់ សូមព្រះអង្គប្រទានជីវិតថ្មី ព្រះវិញ្ញាណថ្មី ខ្យល់ដង្ហើមថ្មី ដែលណែនាំឲ្យធ្វើជាមនុស្សថ្មីដែរ។
លោកលើកឡើងថា «សូមឲ្យយើងមានចិត្តស្មោះចំពោះព្រះអង្គ ចំពោះឪពុកម្តាយ យកចិត្តទុកដាក់ក្នុងការងារ រួមទាំងការងារព្រះសហគមន៍។ សូមយើងទូលអង្វររាល់ថ្ងៃ អធិដ្ឋានរាល់ថ្ងៃ សូមព្រះអង្គអាណិតអាសូរដល់យើង។ យើងជាមនុស្សដែលពោរពេញដោយអំពើបាប យើងចង់មានជីវិតថ្មី»។
លោកអភិបាលរូបនេះក៏បានដាស់តឿនដល់បេក្ខជនបេក្ខនារីចំនួន៤០នាក់ ពេលទទួលជីវិតថ្មីត្រូវចេញទៅប្រកាសនិងលើកតម្កើងសិរីរុងរឿងរបស់ព្រះជាម្ចាស់។ ជាពិសេសបេក្ខជនបេក្ខនារីទាំងនេះទទួលអគ្គសញ្ញាលាបថ្ងាស សូមឲ្យទទួលពន្លឺរបស់ព្រះជាម្ចាស់បំភ្លឺជីវិតជារៀងរហូតពេញមួយជីវិត។
បេក្ខជនបេក្ខនារីទាំង៤០នាក់នេះ ភាគច្រើនជាកូនចៅគ្រីស្តបរិស័ទដែលបានទទួលអគ្គសញ្ញាជ្រមុជទឹកតាំងពីកុមារ។
បន្ទាប់ពីប្រារព្ធពិធីអគ្គសញ្ញាលាបថ្ងាសនិងពិធីអរព្រះគុណព្រះជាម្ចាស់រួច ដោយសារឆ្នាំនេះព្រះសហគមន៍កំណត់ជាឆ្នាំសន្តយ៉ូសែប លោកអភិបាលអូលីវីយេ បានប្រគល់រូបសំណាកសន្តយ៉ូសែប ដល់ព្រះសហគមន៍ ដើម្បីតម្កល់ទុកក្នុងព្រះសហគមន៍ស្អាងនេះសម្រាប់អធិដ្ឋាន។ ក្នុងនោះក៏មានពិធីជូនពរឆ្នាំថ្មី និងអបអរសាទរខួប១២ឆ្នាំ ក្នុងមុខងារជាអភិបាលភូមិភាគភ្នំពេញ របស់លោកអភិបាលអូលីវិយេផងដែរ៕
