នៅក្នុងដំណើរទស្សនៈកិច្ចនិងសួរសុខទុក្ខបុគ្គលិកនិងសិស្សានុស្សនៃសាលាឡាវ៉ាឡា កាលពីព្រឹកថ្ងៃចន្ទ ទី២២ ខែកុម្ភៈ ឆ្នាំ២០២១ អភិបាលព្រះសហគមន៍កាតូលិកភូមិភាគភ្នំពេញ លោកអភិបាល អូលីវីយ៉េ បានលើកឡើងថា ជំងឺកូវីដ១៩ ជួយណែនាំឱ្យគ្រប់គ្នាចេះយកចិត្តទុកដាក់។
លោកបានបន្តថា លោកព្រួយបារម្ភខ្លាចមិនបានមកទីនេះដោយសារជំងឺកូវីដ១៩ ដែលកំពុងរាតត្បាតក្នុងសហគមន៍សារជាថ្មី ប៉ុន្តែដោយសារកូវីដ១៩ បានបង្រៀនមនុស្សឱ្យចេះយកចិត្តទុកដាក់លើវិធានអនាម័យ ការសិក្សា ការធ្វើទំនាក់ទំនង ការយកចិត្តទុកដាក់លើជីវិតខាងផ្លូវវិញ្ញាណ និងចំណុចជាច្រើនទៀត។
លោកអភិបាល អូលីវីយ៉េបានបញ្ជាក់បន្ថែមថា៖ «កូវីដ១៩បានបង្រៀនឱ្យយើងចេះយកចិត្តទុកដាក់លើអនាម័យ ដែលពីមុនយើងមិនសូវរវីរវល់លាងដៃ ពាក់ម៉ាស់ឡើយ ប៉ុន្តសព្វថ្ងៃមិនថានៅកន្លែងណាយើងមានទម្លាប់លាងដៃនិងពាក់ម៉ាស់ ដែលណែនាំឱ្យយើងកែប្រែរបៀបនៃការរស់នៅរបស់យើង»។
លោកបន្តថា ការយកចិត្តទុកដាក់លើការសិក្សា ពេលគ្រប់គ្នាសម្រាកនៅផ្ទះមួយរយៈដោយសារជំងឺកូវីដ១៩ បានណែនាំឱ្យ[យើង]យល់ថាការសិក្សាសំខាន់ណាស់ [យើង]បានយល់អំពីតម្លៃការសិក្សាពេលមិនមានសាលា។
លោកអភិបាលដដែលរូបនេះបានមានប្រសាសន៍ថា ៖ «យើងបានយកចិត្តទុកដាក់លើមិត្តសម្លាញ់របស់យើង យកចិត្តទុកដាក់លើទំនាក់ទំនង យើងបានមករៀននៅទីនេះណែនាំឲ្យយើងមានមិត្តភ័ក្តិច្រើន បង្កើតទំនាក់ទំនង-មិត្តភាព។ ការយកចិត្តទុកដាក់លើបរិស្ថានធម្មជាតិ សាលារបស់យើងមានសួនច្បារស្អាតណាស់ មានផ្កា មានស្មៅ មានដើមឈើ មានសត្វ… ពេលយើងយកចិត្តទុកដាក់លើធម្មជាតិ ធ្វើឱ្យយើងមានសេចក្តីសុខនិងសុខដុមរមនា»។
ចំណុចសំខាន់មួយទៀតដែលលោកអភិបាល អូលីវីយ៉េ បានលើកឡើងក្នុងឱកាសនោះដែរ គឺការយកចិត្តទុកដាក់គោរពចាស់ទុំ។ ការគោរពលោកគ្រូអ្នកគ្រូ បងប្រុស ពូ មីង និងមនុស្សចាស់ទុំផ្សេងៗទៀត ធ្វើឱ្យការសិក្សារបស់ពួកគេទៅមុខរហូតទទួលបានជោគជ័យនៅក្នុងជីវិត។
អភិបាល អូលីវីយ៉េ បានមានប្រសាសន៍ថា ៖ «ការយកចិត្តទុកដាក់លើជីវិតខាងផ្លូវវិញ្ញាណ ទោះបីយើងកាន់សាសនាអ្វីក៏ដោយ យើងមានផ្លូវវិញ្ញាណដែរ។ ផ្លូវវិញ្ញាណសំខាន់ណាស់ដែលណែនាំឱ្យយើងនឹកឃើញថា យើងជាមនុស្សដែលកើតពីព្រះជាម្ចាស់ ណែនាំឲ្យយើងទាំងអស់គ្នាស្រលាញ់គ្នាដូចជាបងប្អូន»។
នាពេលនោះផងដែរ លោកអភិបាលក៏បានរំលឹកដល់បងប្រុស ធៀរី ដែលជាស្ថាបនិកសាលាឡាវ៉ាឡានេះថា បងប្រុសជាមនុស្សម្នាក់ដែលស្រឡាញ់ធម្មជាតិ គាត់ចង់ឱ្យកន្លែងនេះទៅជាកន្លែងកក់ក្តៅសម្រាប់មនុស្សទាំងអស់ ជាពិសេសសម្រាប់កុមារមានពិការភាព។ លោកថា ប្រហែលពេលនេះបងប្រុស ធៀរី នៅឋានលើដើម្បីជួយមើលនិងតាមថែរក្សាទាំងអស់គ្នា។
កុមារី នី ចន្ថា ជាតំណាងសិស្សសាលាឡាវ៉ាឡា បានថ្លែងពីចំណាប់អារម្មណ៍ផ្ទាល់ខ្លួនថា នៅក្នុងភូមិមិនសូវមិនគេរាប់រកគាត់ទេ ដោយសារតែពិការភាពរបស់គាត់ ហើយពេលដែលកុមារីរូបនេះមករៀននៅទីនេះដំបូង គាត់មានអារម្មណ៍ថាភ័យខ្លាច។
កុមារីចន្ថាបានប្រាប់ថា៖ «ដំបូងភ័យខ្លាច ប៉ុន្តែនៅមិនបានយូរប៉ុន្មានផងធ្វើឲ្យខ្ញុំមានអារម្មណ៍សប្បាយចិត្ត ដោយសារមានមិត្តភ័ក្តច្រើន មានលោកគ្រូអ្នកគ្រូដ៏សែនល្អ»។
កុមារីដដែលរូបនេះបានបន្តថា គាត់ចង់រៀនឱ្យបានខ្ពស់ជាពិសេសលើមុខវិជ្ជាគណិតវិទ្យា និងភាសាអង់គ្លេស ដើម្បីបំពេញបំណងធ្វើការងារជាគណនី។
គួរបញ្ជាក់ផងដែរថា សាលាឡាវ៉ាឡា បង្កើតឡើងដោយក្រុមគ្រួសារបងប្រុសម៉ារីស្សនៅឆ្នាំ១៩៩៨ ដើម្បីផ្គត់ផ្គង់ដល់កុមារនិងយុវជនដែលមានពិការភាពរាងកាយ។ សាលានេះមានទីតាំងស្ថិតនៅភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល៕
