បន្ទាប់ពីអាជ្ញាធរបានបិទជាបណ្តោះអាសន្នសហគមន៍ជ្រៃធំ ដោយធ្វើការឃាត់ការធ្វើដំណើរចេញ អូលីវីយ៉េ ជ្មីតអ៊ីស្ល៊ែរ អភិបាលព្រះសហគមន៍កាតូលិកភូមិភាគភ្នំពេញ បានជួយជាគ្រឿងបរិភោគ តាមរយៈអង្គការការីតាសកម្ពុជា ដល់ព្រះសហគមន៍ជ្រៃធំ ព្រះវិហារសន្តយ៉ូសែប ក្នុងស្រុកកោះធំ ដើម្បីជូនដល់ប្រជាពលរដ្ឋចំនួន១០០គ្រួសារក្នុងតំបន់នោះ។
ទាំងនេះជាការយកចិត្តទុកដាក់និងព្រួយបារម្ភអំពីសុខទុក្ខរបស់បងប្អូនដែលស្ថិតនៅកន្លែងមានលារផ្ទុះនូវការឆ្លងមេរោគកូវីដ១៩ក្នុងព្រឹត្តិការណ៍សហគមន៍២០កុម្ភៈ។
លោកអភិបាលបានផ្តល់នូវសម្ភារទាំងនោះដល់បងប្អូនដែលកំពុងតែធ្វើចត្តាឡីស័កនៅតាមគេហដ្ឋានរបស់ខ្លួន ដោយគ្រឿងឧបភោគទាំងនេះត្រូវបានដឹកជញ្ជូនទៅដល់ព្រះសហគមន៍ជ្រៃធំ កាលពីថ្ងៃទី១៦ ខែមីនា ឆ្នាំ២០២១ ហើយគ្រោងនឹងចែកជូនបងប្អូនខ្វះខាត ចាស់ជរា ដែលស្ថិតនៅក្នុងតំបន់ហាមឃាត់នេះនៅថ្ងៃទី១៨ មីនា ២០២១។
តាមការបញ្ជាក់របស់បងស្រី ម៉ាថា ជាដូនជីកាតូលិកតំណាងព្រះសហគមន៍មណ្ឌលសកម្មភាពទន្លេបាសាក់ បានឱ្យដឹងថា ការរីករាលដាលជំងឺកូវីដ១៩ក្នុងតំបន់នេះ ចេះតែមានបន្តបន្ទាប់ជារៀងរាល់ថ្ងៃ ហើយអាជ្ញាធរបានរឹតត្បិតសកម្មភាពនានា ដើម្បីរក្សាសុវត្ថិភាពសុខភាពរបស់ប្រជាជនទាំងអស់។
បងស្រីបន្តថា៖ «រាល់ថ្ងៃប្រជាជនដែលនៅក្នុងភូមិក្រោយព្រះវិហារ មិនអាចចេញទៅណាបានទេ សូម្បីតែផ្ទះអ្នកលក់ដូរក៏ត្រូវបិទទ្វារដែរ ដូច្នេះប្រជាជនក្នុងភូមិ ជួបការលំបាកជាខ្លាំង»។
ដូនជីរូបនេះបន្តថា ដោយស្ថិតនៅក្នុងស្ថានភាពបែបនេះ លោកអភិបាលអូលីវីយ៉េ បានសម្រេចជូនគ្រឿងបរិភោគដល់ប្រជាជនខ្វះខាតក្រីក្រ និងចាស់ជរា។
គណៈកម្មការព្រះសហគមន៍ បានសម្រេចចែកជូនបងប្អូនខ្វះខាតក្រីក្រ និងចាស់ជរានៅជិតព្រះវិហារម្ដង២០គ្រួសារដោយអនុវត្តន៍តាមវិធានរបស់ក្រសួងសុខាភិបាល រីឯអ្នកដែលនៅឆ្ងាយ គណៈកម្មការនឹងយកទៅជូនដល់ផ្ទះ។
បងស្រីម៉ាថាបានបន្ថែមថា៖ «ពេលទទួលដំណឹងថាលោកអភិបាលអូលីវីយ៉េ នឹងជូនអំណោយដល់អ្នកដែលជាប់នៅក្នុងតំបន់ហាមឃាត់នៅព្រះសហគមន៍ជ្រៃធំ ខ្ញុំពិតជារំភើបចង់យំ ដែលលោកអភិបាលយកចិត្តទុកដាក់ដល់កូនចៅដែលនៅឆ្ងាយ»។
ជាមួយគ្នានេះគណៈកម្មការនៅព្រះសហគមន៍ជ្រៃធំ បានត្រៀមជំនួយសម្រាប់៣០០គ្រួសារទុកសម្រាប់សប្ដាហ៍ក្រោយផងដែរ ដោយសារមិនដឹងថា ជំងឺនេះនឹងបន្តរីករាលដាលទៀតឬយ៉ាងណាឡើយ ជាពិសេសយើងត្រូវជួយអ្នកខ្វះខាតក្រីក្រ ជនពិការ ចាស់ជរា និងអ្នកជំងឺ សុទ្ធតែជាអ្នកដែលព្រះសហគមន៍ត្រូវយកចិត្តទុកដាក់។
តាមរបាយការណ៍របស់ក្រសួងសុខាភិបាលបានឲ្យដឹងថា គិតត្រឹមថ្ងៃទី១៧ ខែមីនានេះ កម្ពុជាមានអ្នកមានវីរុសកូវីដ១៩សរុបចំនួន ១៥០៥នាក់ ដោយក្នុងនោះអ្នកដែលបានឆ្លងក្នុងព្រឹត្តិការណ៍សហគមន៍២០កុម្ភៈមានរហូតដល់៩៩០នាក់។ ក្នុងនោះដែរ អ្នកដែលបានជាសះស្បើយចំនួន៨៤០នាក់ អ្នកជំងឺកំពុងសម្រាកព្យាលបាលចំនួន៦៦២នាក់ និងមានអ្នកស្លាប់ចំនួន០១នាក់៕
