លោកអូលីវីយ៉េ ជ្មីតអ៊ីស្លែរ អភិបាលព្រះសហគមន៍កាតូលិកភូមិភាគភ្នំពេញ បានអញ្ជើញ គ្រប់ព្រះសហគមន៍ ការិយាល័យទាំងឡាយនៅក្នុងភូមិភាគភ្នំពេញ រួមទាំងបុព្វជិត បុព្វជីតា និងសាសនទូតទាំងអស់ ចូលរួមក្នុងការអធិដ្ឋាន២៤ម៉ោងសម្រាប់ព្រះជាម្ចាស់។
ពិធីអធិដ្ឋាននេះ នឹងប្រារព្ធនៅថ្ងៃទី២០ ខែមីនា ឆ្នាំ២០២១ខាងមុខ ចាប់ផ្តើមវេលាម៉ោង ១២ថ្ងៃត្រង់ និងបិទបញ្ចប់នៅថ្ងៃទី២១ ខែមីនា វេលាម៉ោង១២ថ្ងៃត្រង់។ នៅក្នុងពិធីនេះ ក៏បញ្ចូលកម្មវិធីការអធិដ្ឋានសម្រាប់ការត្រាស់ហៅពេញមួយយប់លើកទី៩៩ផងដែរ។
ក្នុងលិខិត ចុះថ្ងៃទី១៨ ខែមីនា ឆ្នាំ២០២១នេះ លោកអូលីវីយ៉េ បានបញ្ជាក់ថា គោលបំណងនៃកម្មវិធីនេះដើម្បីអធិដ្ឋានជាពិសេសសម្រាប់ប្រទេសកម្ពុជានិងពិភពលោកទាំងមូលដែលកំពុង តែប្រយុទ្ធប្រឆាំងនឹងជំងឺកូវីដ១៩។
លោកបានបន្តថា ៖ «យើងអធិដ្ឋានសម្រាប់បងប្អូនទាំងអស់ដែលកំពុងតែរងទុក្ខលំបាកដោយសារមេរោគឆ្លងកូវីដ១៩។ សម្រាប់អស់បងប្អូនជំហានទី២ដែលត្រៀមខ្លួនទទួលអគ្គសញ្ញាជ្រមុជទឹកនាពេលខាងមុខ»។
លោកអូលីវីយ៉េបានបន្ថែមថា ពិធិនេះក៏អធិដ្ឋានដើម្បីឱ្យមានសុខសន្តិភាពនៅក្នុងប្រទេសភូមា សម្រាប់សម្ដេចប៉ាបហ្វ្រង់ស៊ីស្កូ ធ្វើឱ្យមានសុខសន្តិភាព និងភាតរភាពនៅជុំវិញពិភពលោកទាំងមូល ដោយដឹងថា ព្រះយេស៊ូកំពុងតែព្យាបាលមនុស្សគ្រប់គ្នា។ សម្រាប់ខួប១២ឆ្នាំនៃ អគ្គសញ្ញាតែងតាំងលោកអភិបាលអូលីវីយ៉េ ជាអភិបាលព្រះសហគមន៍កាតូលិក (២០ មីនា ២០១០ ដល់ ២០ មីនា ២០២១)។
លោកអភិបាលរូបនេះបានបញ្ជាក់ថា កម្មវីធី២៤ម៉ោងសម្រាប់ព្រះជាម្ចាស់នេះ លោកក៏បានបែងចែកពេលវេលាក្នុងការអធិដ្ឋានទៅព្រះវិហារ ឬផ្ទះរៀងៗខ្លួន ដោយសារមិនអាចចូលរួមជាមួយគ្នា ជាក្រុមតែមួយបានទេ ព្រោះត្រូវអនុវត្តតាមវិធានរបស់ក្រសួងសុខាភិបាល។
កម្មវិធីនេះនឹងផ្ដើមដោយមានពិធីបុណ្យអភិបូជាផ្សាយផ្ទាល់ (LIVE) សម្រាប់មនុស្សទាំងអស់ ហើយបន្តដោយអធិដ្ឋាន ដោយក្រុមការិយាល័យទាំងអស់នៅក្នុងភូមិភាគភ្នំពេញ ធ្វើតាមកន្លែងរៀងៗខ្លួន នាថ្ងៃសៅរ៍វេលាម៉ោង១រសៀល និងក្រុមបន្តបន្ទាប់ដោយបុព្វជិត បុព្វជីតារហូតដល់រសៀលថ្ងៃទី២១ ខែមីនា ឆ្នាំ២០២១ ដោយក្រុមអ្នកស្ម័គ្រចិត្តទាំងអស់ក្នុងភូមិភាគភ្នំពេញ ហើយបញ្ចប់ដោយពិធីគោរពព្រះកាយព្រះគ្រីស្ត និងទានព្រះពរដើរលោកអភិបាលអូលីវិយ៉េ តាមរយៈការផ្សាយផ្ទាល់ផងដែរ សម្រាប់មនុស្សទាំងអស់។
ព្រះសហគមន៍កាតូលិកភូមិភាគភ្នំពេញតែងតែប្រារព្ធកម្មវិធី២៤ម៉ោងសម្រាប់ព្រះជាម្ចាស់ ស្របតាមការណែនាំរបស់សម្ដេចប៉ាបហ្វ្រង់ស៊ីស្កូ។ សម្តេចប៉ាបហ្វ្រង់ស៊ីស្កូ បានណែនាំឲ្យព្រះសហគមន៍ទាំងអស់ក្នុងពិភពលោក រៀបចំកម្មវិធីអធិដ្ឋាន ២៤ម៉ោងសម្រាប់ព្រះជាម្ចាស់នៅក្នុងរដូវអប់រំពិសេស (រដូវ៤០ថ្ងៃ) មានរយៈពេល៨ឆ្នាំហើយ៕
