តំណាងគ្រីស្តបរិស័ទព្រះសហគមន៍ចំការទៀង ព្រះវិហារសន្តីម៉ារីញញឹម ឃុំគុស ស្រុកត្រាំកក់ ខេត្តតាកែវ ដឹកនាំដោយលោកអភិបាល អូលីវីយ៉េ ជ្មិតហស្លេរ អភិបាលព្រះសហគមន៍កាតូលិកភូមិភ្នំពេញ បានអញ្ជើញចុះសួរសុខទុក្ខក្រុមគ្រួសារដែលកំពុងជាប់ចត្តាឡីស័ក ចំនួន ៦គ្រួសារ ដែលស្ថិតនៅក្នុងភូមិត្រពាំងព្រីង ឃុំគុស ស្រុកត្រាំកក់ ខេត្តតាកែវ នាថ្ងៃទី០៦ ខែមេសា ឆ្នាំ២០២១នេះ។
នៅក្នុងកិច្ចចុះសួរសុខទុក្ខនេះ លោកអភិបាល អូលីវីយ៉េក៏បានផ្ដល់អនុសាសន៍ដើម្បីលើកទឹកចិត្ត និងណែនាំអំពីរបៀបរក្សាអនាម័យ ការថែទាំសុខភាព និងជូនពរដល់គ្រួសារជាប់ចត្តាឡីស័កទាំងអស់ ឱ្យជៀសផុតពីជំងឺកូវីត១៩នេះ និងសូមទទួលបានសុខភាពល្អ ជាពិសេសសូមព្រះជាម្ចាស់ប្រទានពរដល់ពួកគាត់។
លោក តែ មុន្នីរតនា នាយកការិយាល័យកសិកម្មនៃនាយកដ្ឋានអភិវឌ្ឍន៍ក្រសួងការពារជាតិ និងជាសមាជិកក្រុមការងារថ្នាក់ជាតិចុះជួយភូមិគុស និងភូមិចំការទៀង មានប្រសាសន៍សម្ដែងនូវក្ដីរំភើប ចំពោះកិច្ចការសប្បុរសរបស់ព្រះសហគមន៍ចំពោះគ្រួសារក្រីក្រ។
លោករតនាមានប្រសាសន៍ថា «នេះគឺជាការលើកទឹកចិត្តពួកគាត់ដែលកំពុងធ្វើចត្តាឡឺស័កឱ្យកម្លាំងចិត្ត កាត់បន្ថយការភ័យខ្លាច និងមានសេចក្ដីសង្ឃឹមឡើងវិញ ព្រោះអ្នកទាំងនោះសុទ្ធតែជាអ្នកក្រីក្រ»។ លោកបន្ថែមថា ក្នុងអំឡុងពេលធ្វើចត្តាឡីស័កប៉ុន្មានថ្ងៃមុននេះ លោកអភិបាលខេត្តក៏បានចុះមកសួរសុខទុក្ខនិងបាននាំយកអំណោយមកជូនពួកគាត់ដែរ។
សម្ភារដែលព្រះសហគមន៍បានជូនដល់គ្រួសារនីមួយៗ រួមមាន អង្ករ៥០គីឡូក្រាម មាន់២ក្បាល និងសាច់ជ្រូក មី១កេស ត្រីខ១យួរ ស្វាយ១០គីឡូក្រាម ទឹកសុទ្ធ១កេស ពងមាន់ ៥០គ្រាប់ ស្ករគ្រាប់ដូង ២កញ្ចប់ នំ Cookies ២កញ្ចប់ ដំណាប់ស្វាយ ២ប្រអប់ គ្រឿងទេស មួយចំនួន និងថវិកា២០ម៉ឺនរៀល។
ក្រៅពីក្រុមគ្រួសារទាំង៦នេះ លោកអភិបាលអូលីវីយ៉េ ក៏បានជូនម៉ាស់ អាល់កុល សម្ភារអនាម័យមួយចំនួន និងថវិកាដល់អាជ្ញាធរភូមិ និងប៉ុស្តិ៍រដ្ឋបាលឃុំគុស ដើម្បីចូលរួម ទប់ស្កាត់ជំងឺកូវីដ១៩នេះដែរ។
មកដល់ពេលនេះ ចំនួនអ្នកឆ្លងជាសហគមន៍នៅក្នុងព្រឹត្តិការណ៍២០កុម្ភៈ បានកើនឡើងដល់២៨២៤នាក់ និងមានអ្នកកំពុងសម្រាកពេទ្យចំនួន ១០០៣នាក់ ដែលក្នុងថ្ងៃទី៦ មេសានេះ មានអ្នកឆ្លងថ្មីចំនួន៧២នាក់ និងអ្នកជាសះស្បើយ៤៧នាក់ និងស្លាប់ម្នាក់។ នៅយប់ថ្ងៃទី៦នេះផងដែរ រដ្ឋាភិបាលបានសម្រេចបិទទ្វារខេត្តនីមួយៗ ពោលគឺគ្មានចរាចរណ៍ឆ្លងកាត់ពីខេត្តមួយទៅខេត្តមួយបានទេ ក្នុងរយៈពេល១៤ថ្ងៃ លើកលែងតែភ្នំពេញនិងខេត្តកណ្តាលប៉ុណ្ណោះ៕
អត្ថបទ៖ដាលីស
