លោកអភិបាលអូលីវីយ៉េ អភិបាលព្រះសហគមន៍កាតូលិកកម្ពុជាភូមិភាគភ្នំពេញ នាព្រឹកថ្ងៃទី១២ ខែមេសា ឆ្នាំ២០២១ បានកោះហៅប្រជុំបន្ទាន់តាមប្រព័ន្ធផ្សព្វផ្សាយសង្គម ZOOM ក្នុងនោះរួមមាន លោកបូជាចារ្យ ទទួលខុសព្រះសហគមន៍កាតូលិកមណ្ឌលសកម្មភាព ភ្នំពេញខាងជើង ភ្នំពេញខាងត្បូង និងភ្នំពេញថ្មី និង អង្គការការីតាសកម្ពុជា ព្រមទាំងការិយាល័យមួយចំនួនមាន សុខភាព យុវជន និងការិយាល័យផ្សព្វផ្សាយព័ត៌មានកាតូលិកកម្ពុជា រួមទាំងគណៈកម្មការស្វាគមន៍ភ្នំពេញថ្មី។
កិច្ចប្រជុំនេះ ធ្វើឡើងក្នុងគោលបំណងរិះគិតបន្ទាន់ ដើម្បីឆ្លើយតបចំពោះសេចក្តីត្រូវការរបស់ បងប្អូន ដែលកំពុងរងផលប៉ះពាល់ធ្ងន់ធ្ងរ ដោយសារមេរោគឆ្លងកូវីដ-១៩។
លោកបូជាចារ្យតាមណ្ឌលនីមួយៗបានជំរាបជូនផែនការដែលបានគ្រោងតាមព្រះសហគមន៍នីមួយៗ នៅក្នុងរាជធានីភ្នំពេញ ក្នុងនោះអង្គការការីតាសក៏បានត្រៀមជាស្រេចដែរ។
ក្នុងអង្គប្រជុំលោកអភិបាលអូលីវីយ៉េ ក៏បានរំឭកបន្ថែម សូមឲ្យលោកបូជាចារ្យ បំពេញកិច្ចការទាំងអស់នេះតាមជាក់ស្តែង ជាពិសេសលើកទឹកចិត្ត គ្រីស្តបរិស័ទគ្រប់រូប ឲ្យបំពេញតួនាទី បំពេញកិច្ចការសង្គហៈ នៅតាមកន្លែងដែលខ្លួនរស់ជាក់ស្តែង «ម្នាក់ៗត្រូវដើរតួនាទីជាសង្គហៈ» និងរស់នៅ ដោយអនុវត្តដូចព្រះសហគមន៍ដើមដំបូង។
សូមជំរាបថា កាលពីថ្ងៃទី១១ មេសា ២០២១ ក្នុងសារពិសេសមួយ ផ្ញើជូនលោកបូជាចារ្យ និងគ្រីស្តបរិស័ទនៅក្នុងភូមិភាគភ្នំពេញ លោកអភិបាល អូលីវីយ៉េ មានប្រសាសន៍ថា៖ «ប្រសិនបើយើងនៅស្ងៀមស្ងាត់មានន័យថាយើងមិនអើពើ ប្រសិនបើយើងមិនអើពើ និងចាប់អារម្មណ៍ ជាមួយអ្នកដទៃ តើយើងជាសាវ័ករបស់ព្រះយេស៊ូឬទេ?»
លោកអភិបាលអូលីវីយ៉េ ជំរុញឱ្យគ្រីស្តបរិស័ទយកចិត្តទុកដាក់ចំពោះបងប្អូន ដែលកំពុងតែជួបនូវទុក្ខលំបាកព្រោះមេរោគឆ្លងកូវីដ-១៩ និងដោយស្ថានភាពត្រូវរាំងខ្ទប់លើតំបន់មួយចំនួននៅរាជធានីភ្នំពេញ។ លោក សង្កត់ធ្ងន់ថា៖ «ខ្ញុំសូមអញ្ជើញ លោកបូជាចារ្យ បងប្រុសបងស្រី និងគ្រីស្តបរិស័ទទាំងអស់ ដែលនៅក្នុងរាជាធានីភ្នំពេញ ត្រូវបើកភ្នែក និងប្រាប់ព័ត៌មាន ពីកន្លែងមានបងប្អូនយើង កន្លែងដែលមានមិត្តសម្លាញ់ កន្លែងដែលយើងឮថាគេកំពុងដាច់ពេល គ្មានម្ហូបអាហារ គេកំពុងពិបាកខ្លាំង។ សូមឲ្យយើងជួយ ទូរសព្ទទៅលោកឪពុក ទូរសព្ទទៅគ្រីស្តបរិស័ទ ដើម្បីឱ្យរៀបចំសកម្មភាពសង្គហៈបន្ទាន់។ កុំឱ្យយើងគិតតែ អំពីយើងផ្ទាល់»។
លោកអភិបាលអូលីវីយ៉េជំរុញឲ្យគ្រីស្តបរិស័ទអនុវត្តន៍វិន័យរបស់ព្រះយេស៊ូតែមួយគឺ៖ «ស្រឡាញ់គ្នាទៅវិញទៅមក ដូចខ្ញុំបានស្រឡាញ់អ្នករាល់គ្នា»។
ជាមួយគ្នានេះលោកបានរំឭកដល់គ្រប់ព្រះសហគមន៍ទាំងអស់ ត្រូវអនុវត្តជាក់ស្តែង «វិធាន ៣ការពារ និង ៣កុំ» ដោយអនុវត្តពិតប្រាកដ កុំឲ្យគ្រាន់តែនិយាយតៗគ្នាតែប៉ុណ្ណឹ គឺត្រូវស្តាប់ទាំងរាជ រដ្ឋាភិបាល ទាំងក្រសួងសុខាភិបាល ទាំងអាជ្ញាធរមូលដ្ឋាននៅតាមកន្លែងនីមួយៗ។ នេះជាចំណុច មូល ដ្ឋានមួយត្រូវអនុវត្ត។ ត្រូវអនុវត្តច្បាប់ ដែលយើងមានសព្វថ្ងៃនៅក្នុងប្រទេសកម្ពុជា ជាពិសេសនៅក្នុងព្រះសហគមន៍ភូមិភាគភ្នំពេញ។ អនុវត្តយ៉ាងជាក់ស្តែង កុំឱ្យបង្កបញ្ហាណាមួយកើតឡើង ក្នុងសហគមន៍ដោយសារយើងជាគ្រីស្តបរិស័ទ៕
